तीन महिनामै जीवन बिमा कम्पनीले कमाए १ अर्ब २६ करोड

बैंक/बिमा/सेयर

तीन महिनामै जीवन बिमा कम्पनीले कमाए १ अर्ब २६ करोड महामारीकै बीच कसरी बढ्यो नाफा?

अरुण सापकोटा बिहीबार, मंसिर ४, २०७७ ०६:०३

काठमाडौं- जीवन बिमा कम्पनीहरुले चालु आर्थिक वर्ष २०७७/७८ को पहिलो तीन महिनामा १ अर्ब २६ करोड रुपैयाँ नाफा आर्जन गरेका छन्। १९ वटा जीवन बिमा कम्पनीले कोभिड महामारीका बीच पनि गत वर्षको यही अवधिको तुलनामा २४.२९ प्रतिशतले नाफा बढाएका हुन्।

बिमा कम्पनीको अधिकांश कोष बैंक तथा वित्तीय संस्थामा निक्षेपका रुपमा बसेको हुन्छ। बैंकको ब्याजदर बढ्दा कम्पनीको नाफामा उल्लेख्य सुधार हुन्छ भने ब्याजदर घट्दा नाफा पनि खुम्चिने गरेको छ। अधिकांश जीवन बिमा कम्पनको नाफामा सुधार देखिए पनि केही कम्पनीले भने यही बेला घाटा व्यहोर्नु परेको पनि छ। युनियन लाइफ इन्स्योरेन्स कम्पनी, राष्ट्रिय बिमा संस्थान र सन नेपाल लाइफ इन्स्योरेन्स कम्पनीको नाफामा गत वर्षकोभन्दा कमजोर भएको छ।

'बैंक तथा वित्तीय संस्थामा महँगो ब्याजदरमा पैसा जम्मा गर्ने कम्पनीको मुनाफामा राम्रो सुधार देखिएको छ। बैंक तथा वित्तीय संस्थाले केही समयदेखि निक्षेपको ब्याजदर घटाइरहेका छन्। केही कम्पनीमा यसको असर तत्काल नदेखिए पनि आगामी दिनमा देखिन सक्छ,' बिमाविज्ञ रवीन्द्र घिमिरेको भनाइ छ। बिमा कम्पनीहरुले आफूसँग भएको कोष बैंकमा जम्मा गरेर स्वतः आर्जन हुने ब्याज आम्दानीबाहेक अन्य आम्दानी नदेखिएको घिमिरेको विश्लेषण छ।

जीवन बिमा कम्पनीको न्यूनतम चुक्ता पुँजी २ अर्ब रुपैयाँ तोकिएको छ। पुराना जीवन बिमा कम्पनीको पुँजी २ अर्ब पुगिसकेको छ भने एउटा नयाँ जीवन बिमा कम्पनी पुर्याउने क्रममा छन्। गएका वर्षमा नयाँ जीवन बिमा कम्पनीहरुले आफूसँग भएको पुँजी बैंकमा जम्मा गरेर त्यसको ब्याजबाटै नाफा देखाउँदै आएकोमा यस वर्ष कतिपय नयाँ जीवन बिमा कम्पनीको नाफामा कमी आएको छ। ती कम्पनीले व्यवसाय विस्तारका क्रममा शाखा सञ्जाल तथा कर्मचारी खर्च बढेकाले नाफा बढाउन सकिरहेका छैनन्।

त्यस्तै पुराना कम्पनीको नाफामा भने उल्लेख्य सुधार भएको देखिएको छ। कम्पनीहरूका प्रमुख कार्यकारी अधिकृतले जसरी पनि नाफा सुधार गर्ने रणनीति अख्तियार गरेकाले पनि नाफा बढ्न योगदान गरेको घिमिरेको भनाइ छ। चार वर्षे कार्यकालमा जसरी भए पनि पोलिसी बिक्री गरेर आफ्नो प्रस्तुति देखाउने रणनीतिका कारण तत्कालका लागि सुधार देखिए पनि दीर्घकालीन रूपमा यो घातक सावित हुन सक्ने उनको विश्लेषण छ।

अहिले धेरै नाफा देखाउन तथा धेरै व्यापार देखाउन करोड करोड रुपैयाँका पोलिसी बिक्री गराउने तर भोलिका दिनमा बीमितले पोलिसीलाई निरन्तरता दिने विषयमा भने नसोच्ने गरेको उनले आरोप लगाए।

कम्पनीको नाफासँगै बिमा शुल्क आर्जनमा पनि सुधार भैरहेको छ। कम्पनीहरुले पहिलो तीन महिनामा ३२ अर्ब ३२ करोड रुपैयाँ बिमा शुल्क आर्जन गरेका छन्। गत वर्षको यही अवधिको तुलनामा कम्पनीहरुले ३१ प्रतिशतले बिमा शुल्क आर्जन बढाएका हुन्। कम्पनीले गत वर्ष २४ अर्ब ६६ करोड रुपैयाँ बिमा शुल्क आर्जन गरेका थिए। नाफासँगै व्यवसाय पनि सुधार गरिरहेकोले गर्दा सकारात्मक रुपमा लिन सकिने विज्ञहरु बताउछन्।

जीवन बिमा कम्पनीहरुले पहिलो त्रैमासमा आर्जन गरेको नाफा

जीवन बिमा कम्पनी	नाफा		वृद्धि (%)
जीवन बिमा कम्पनी	असोज २०७७	असोज २०७६	वृद्धि (%)
नेपाल लाइफ इन्स्योरेन्स	229002	204432	12.02
प्राइम लाइफ इन्स्योरेन्स	120774	100255	20.47
नेशनल लाइफ इन्स्योरेन्स	118371	115396	2.58
सूर्या लाइफ इन्स्योरेन्स	101610	78793	28.96
एशियन लाइफ इन्स्योरेन्स	94048	40233	133.76
मेट लाइफ इन्स्योरेन्स	75511	65562	15.17
लाइफ इन्स्योरेन्स कर्पोरेसन	57926	23678	144.64
राष्ट्रिय बिमा संस्थान	10272	17480	-41.24
गुराँस लाइफ इन्स्योरेन्स	42771	31947	33.88
रिलायबल लाइफ इन्स्योरेन्स	65903	58119	13.39
रिलायन्स लाइफ इन्स्योरेन्स	30073	18514	62.43
युनियन लाइफ इन्स्योरेन्स	24191	55657	-56.54
सन नेपाल लाइफ इन्स्योरेन्स	25478	35012	-27.23
आइएमइ लाइफ इन्स्योरेन्स	43081	29582	45.63
प्रभु लाइफ इन्स्योरेन्स	30924	12294	151.54
महालक्ष्मी लाइफ इन्स्योरेन्स	24271	21460	13.10
ज्योती लाइफ इन्स्योरेन्स	72222	37641	91.87
सानिमा लाइफ	35178	19820	77.49
सिटिजन्स लाइफ इन्स्योरेन्स	61158	50130	22.00
जम्मा	1262764	1016005	24.29

विगतका वर्षहरू जस्तै यसवर्ष पनि सबैभन्दा नाफा गर्ने जीवन बिमा कम्पनीमा नेपाल लाइफ इन्स्योरेन्स छ। नेपाल लाइफले १२ प्रतिशलते नाफामा सुधार गरेर २२ करोड ९० लाख रुपैयाँ आर्जन गरेको छ।

दोस्रो स्थानमा यस वर्ष प्राइम लाइफ इन्स्योरेन्स छ। प्राइम गत वर्ष तेस्रो स्थानमा थियो। त्यस्तै तेस्रो स्थानमा रहेको नेसनल लाइफले ११ करोड ८३ लाख रुपैयाँ नाफा आर्जन गरेको छ।

यस वर्ष सूर्या लाइफले उल्लेख्य सुधार गरेको छ। नयाँ आएका १० जीवन बिमा कम्पनी मध्ये सबैभन्दा धेरै ज्योति लाइफले ७ करोड रुपैयाँ नाफाँ आर्जन गरेको छ। १० वटै नयाँ कम्पनीको नाफा भने ४१ करोड २४ लाख रुपैयाँ रहेको छ।

त्यस्तै पुराना जीवन बिमा कम्पनीको मुनाफा ८५ करोड २ लाख रुपैयाँ रहेको छ। जम्मा नाफाको ३२.६६ प्रतिशत नयाँ जीवन बिमा कम्पनीको रहेको छ भने ६७.३३ प्रतिशत पुराना बिमा कम्पनीको रहेको छ। नयाँ बिमा कम्पनीहरुले नाफामा पनि पुराना बिमा कम्पनीलाई टक्कर दिन थालेका हुन्।