काठमाडौं– नेपाली कांग्रेसका सभापति शेरबहादुर देउवाले एक पक्षको विरोधलाई वेवास्ता गर्दै निर्णयको क्रमलाई निरन्तरता दिएका छन्। वरिष्ठ नेता रामचन्द्र पौडेल पक्षले सर्वाधिक विरोध गर्दै आएको विभाग गठनलाई पूर्णता दिने क्रममा देउवा लागेका छन्। विधानको प्रावधान सभापतिले मिचेको जनाउँदै पौडेल पक्षले ध्यानाकर्षण गराए पनि देउवाले निर्णय रोकेका छैनन्।
४७ विभाग बनाएका देउवाले आइतबार अबेर १० विभागलाई विस्तार गरेका छन्। त्यसअघि तीन विभागका सदस्य थपिसकेका थिए। आफू निकटका व्यक्तिलाई २० विभागको प्रमुखको जिम्मेवारी तोकेका देउवाले सदस्यहरुमा पनि संस्थापन पक्षकालाई प्राथमिकता दिएका छन्।
शक्तिशाली विभागको रुपमा परिचित संगठन विभागलाई ४१ सदस्यीय बनाइएको छ। गोपालमान श्रेष्ठ प्रमुख रहेको उक्त विभागमा सचिवको जिम्मेवारी विनकुमार विश्वकर्मालाई दिइएको छ। विश्वकर्मा झापा निवासी हुन्।
हरिप्रसाद नेपाल संयोजक रहेको शिक्षा विभागलाई विस्तार गरेर ४० सदस्यीय बनाइएको छ। चितवनका शेषनाथ अधिकारी उपप्रमुख रहेको उक्त विभागमा कास्कीका कृष्णप्रसाद पौडेल सचिव बनेका छन्। यातायात व्यवसायी समन्वय विभागको नेतृत्वमा महेन्द्र यादव छन्। यादवले सम्हालेको विभाग ४१ सदस्यीय बनाइएको छ।
मुस्लिम आयोग ३८ सदस्यीय बनाइएको छ। देउवा निकट फरमुल्लाह मन्सुर प्रमुख रहेको उक्त विभागमा अब्दुल खान सचिव बनेका छन्। अजयकुमार चौरसियाको नेतृत्वमा बनाइएको तराई–मधेश समन्वय विभागमा सप्तरीका श्रीप्रसाद राउत उपप्रमुख बनेका छन्। ३९ सदस्यीय तराई–मधेश समन्वय विभागको सचिव रामनारायण प्रसाद कुर्मी बनेका छन्।
संघीय मामिला तथा प्रदेश समन्वय समिति ४० सदस्य बनेको छ। रमेश रिजालको नेतृत्वमा रहेको विभागमा सदस्यहरु मात्रै थपिएको छ। अम्बिका बस्नेत नेतृत्वको वन, वातावरण तथा वित्त व्यवस्थापन समिति ३९ सदस्यीय बनेको छ। १३औं महाधिवेशनमा पौडेल पक्षधर रहेर पछिल्लो समय देउवा निकट बनेका आनन्द ढुङ्गानाले एक विभाग सम्हालेका छन्। ढुङ्गाना नेतृत्वको वित्तीय तथा सहकारी संस्था समन्वय विभाग ३९ सदस्यीय बनेको छ। उक्त विभागको उपप्रमुखमा गोविन्दबहादुर मल्ल चयन भएका छन्।
आइतबार नै विस्तारित स्थानीय तह समन्वय विभाग ३८ सदस्यीय बनेको छ। केन्द्रीय सदस्य अर्जुनप्रसाद जोशीले उक्त विभागको जिम्मेवारी गत माघमा पाएका थिए। गत जेठमा विस्तारित तरुण विभाग ४१ सदस्यीय बनेको छ। तरुण विभागमा सचिवको जिम्मेवारी श्यामप्रसाद श्रेष्ठले पाएका छन्। खेलकुद विभागको नेतृत्व पूर्वमन्त्री मोहनबहादुर बस्नेतले प्राप्त गरेका छन्।
२९ सदस्यीय खेलकुद विभागमा उपप्रमुख मोहन कुमार राई छन् भने सचिवमा मीनकृष्ण महर्जन मनोनित भएका छन्। साउन ५ मा देउवाले महिला विभाग विस्तार गरेका थिए। ३८ सदस्यीय महिला विभागको नेतृत्व ईश्वरी न्यौपानेलाई दिइएको छ। महिला विभागको सचिवमा लक्ष्मी खतिवडा मनोनित भएकी छन्।
चरणबद्ध विभाग गठन गरेका सभापति देउवाले प्रमुख तोकेर पनि केही विभाग गठन विस्तार तेस्राे चरणमा पनि गरेका छैनन्। पार्टी प्रवक्ता विश्वप्रकाश शर्माको नेतृत्वमा रहेको सूचना सञ्चार तथा प्रचार विभागले पूर्णता पाउन सकेको छैन। सीता गुरुङले सम्हालेको आदिवासी जनजाति विभाग, गोविन्द भट्टराई प्रमुख रहेको नेपाल जनसम्पर्क विभाग, चिनकाजी श्रेष्ठले सम्हालेको उद्योग व्यापार विभाग आइतबार विस्तार भएका छैनन्।
त्यस्तै श्रमिक तथा ट्रेड युनियन, राज्य प्रशासन र संस्था समन्वय विभागले पूर्णता पाउन सकेको छैन। ती विभागमा क्रमशः शिव हुमागाईं, केशव बुढाथोकी र एनपी साउद प्रमुख छन्।
महाधिवेशन भएको दुई महिनाभित्र गठन हुनुपर्ने विधानको व्यवस्था थियो। विभागमा हाल मनोनयन गर्नुलाई संस्थापनइतर पक्षले महाधिवेशन प्रभावित पार्ने खेलका रुपमा बुझेको छ। नेता कार्यकर्ता व्यवस्थापन गरी नतिजा देउवाले आफ्नो पक्षमा पार्ने डर अर्को समूहमा छ। देउवा निकट केन्द्रीय सदस्य मीन विश्वकर्माले विधानकै समयावधिमा विभाग गठन हुन नसक्नु पौडेल पक्षको असहयोग कारण भएको आरोप लगाए।
गत साता देउवाले बोलाएको पदाधिकारी बैठकमा विभागको विषय संस्थापनइतर नेताहरुले उठाएका थिए। देउवाले आफ्नो निर्णय फिर्ता गर्न तयार नभएको नेता अर्जुननरसिंह केसीले बताएका थिए। गत साता शीर्ष तहको बैठकमा एक पक्षले आपत्ति जनाएपनि आइतबार देउवा थप अघि बढ्दै विभागका सदस्य मनोनयन गरे।
प्रत्येक विभागमा ५१ सदस्यसम्म पुर्याउन सकिने विधानको व्यवस्था छ। विस्तार गरिएका विभागमा सिमिति संख्या अर्को समूहलाई खाली राखेको बताइएको छ। संस्थापन पक्षले विस्तार गरेको विभागमा दुई तिहाइ बढी संख्यामा मनोनयन भइसकेको छ। सांसद पदमा रहेकाहरुलाई विभागमा स्थान नदिने प्रावधान बनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
