काठमाडौं- संगिता बस्नेत नामको फेसबुक आइडीबाट दोलखाका २४ वर्षीय एक युवकलाई 'फ्रेन्ड रिक्वेस्ट' आयो।
ती युवकले संगितालाई साथी बनाउने सहमतिका लागि एसेप्ट बटन दबाए। संगिता र ती युवकबीच कुराकानी सुरु भयो। उनीहरु एक अर्काका मिल्ने साथी बने।
प्रेम र विवाहका बारेमा समेत उनीहरु खुलेर कुरा गर्न थाल्छन्। ती युवकले आफू अविवाहित भएको बताउँछन्।
त्यसपछि संगिताले ती युवकलाई एक दिन भनिन्, ‘तपाईंलाई एक केटीले (फेसबुकमा सुन्दर तस्बिर भएका देखाउँदै) एकदमै मन पराउँछिन्। म नम्बर पनि दिन्छु। फेसबुक आइडीको लिंक पठाइदिउँला। राम्रो केटी हो विवाह गर्दा पनि हुन्छ। कुरा गर्नुस्।’
त्यसपछि ती युवकले संगिताले पठाएकै फेसबुक लिंकको आइडी भएको सुन्दर तस्बिर राखेर बनाइएको फेसबुक अकाउन्टमा फ्रेन्ड रिक्वेस्ट पठाउँछन्। उनीहरु फेसबुकमा साथी बने।
त्यसपछि उनीहरुबीच कुराकानी हन थाल्यो। ती युवतीले पनि आफूले एकदमै मन पराएको कुरा सेयर गर्न थालिन्। उनीहरु बीच देखादेख नभएपनि प्रेम झाँगिन्छ। अन्तरंग कुराकानी गर्छन्। छिट्टै बिहे गर्ने र घरजम गर्नेसम्मका कुरा फेसबुकमै निर्णय हुन थाल्छन्।
000
सोही क्रममा एक दिन संगिताले ती युवकलाई तपाईले मन पराएकी ती युवती बिरामी परेको सुनाइन्। यति मात्र होइन उनलाई सहयोग गर्नुस् भनेर दबाब पनि दिइन्। ती युवकले पनि विश्वास गर्छन्।
जोसँग विवाह हुने निश्चित भइसकेको छ, ऊ नै बिरामी परेपछि त सहयोग गर्नै परो भन्दै सहयोग गर्ने वाचा संगीतालाई दिन्छन्।
आफूले विवाह गर्न लागेकी युवतीको उपचारका लागि दिनू भन्दै युवकले संगितालाई ४ लाख ५५ हजार रुपैयाँ आइएमई गरिदिए।
त्यसको केही समयपछि युवकले आफूले मन पराएकी बिरामी युवती भेट्न खोज्छन्। यो कुरा संगीतालाइ पनि सुनाउँछन्। त्यसपछि संगिताले उक्त युवती उपचारका क्रममा भारत गएको तर उनको मुत्यु पनि उतै भएको युवकलाई बताउँछिन्।
000
तर यो कुरामा युवकलाई शंका लाग्यो। आफू ठगिएको हुनसक्ने भन्दै ती युवकले अपराध महाशाखामा उजुरी दिए। उनकै उजुरीका आधारमा अनुसन्धानमा खटिएको प्रहरी टोलीले संगीतालाई पक्राउ गर्यो।
एक सुन्दर युवतीको तस्बिर राखेर संगिताले फेक फेसबुक आइडी बनाएर ठगेको रहस्य पनि खुल्यो। यसबारे ती युवकलाई केही जानकारी थिएन।
000
उनै संगिताले नै फेक फेसबुक आइडी बनाएर ती युवकसँग कुरा गरेर ठगी गरेको प्रहरी अनुसन्धानबाट खुलेको छ।
आफ्नो वास्तविक आइडीबाट पनि कुरा गर्ने र फेक आइडीबाट अर्कै सुन्दर युवती बनेर कुरा गरेर उनले ती युवकलाई मोटो रकम ठगी गरेकी थिइन्।
पक्राउ परेकी संगिता भनिने युवती दोलखाको शैलुङ गाउँपालिका-५ की २३ वर्षीय कल्पना बस्नेत हुन्।
उनलाई महानगरीय प्रहरी अपराध महाशाखाको टोलीले शनिबार बेलुका टेकुबाट पक्राउ गरेको हो।
संगीताको साथबाट प्रहरीले मोबाइल फोन र दुई वटा सिम पनि बरामद गरेको छ।
पक्राउ परेकी संगितालाई कारबाहीका लागि महानगरीय प्रहरी परिसर काठमाडौं पठाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749797959.png)
-1749826086.png)
