काठमाडौं– चिकित्सा क्षेत्र सुधारको माग गर्दै डा गोविन्द केसी १६औं अनसन बस्न इलाम पुगे। पुस २५ देखि उनले आमरण अनसन थाले। त्यसको दुई दिनपछि एक युवकले पनि इलाम चोक बजारको लाकुरी चौतारामा अनसन थाले।
उनको अनसनको उद्देश्य भने डा केसीको भन्दा भिन्न छ। डा केसीका मागसँग असहमति जनाउने पक्षका लागि विजय थापाको अनसन बलियो बहाना भएको छ। डा केसीसँग विपरीत माग राखेका उनलाई डा केसीविरोधी समूह ‘सेलिब्रिटी’ बनाउन लागिपरेको छ।
डा केसीको झाँको झार्न उनलाई समर्थन गर्ने एक समूह सक्रिय छ। तर, उक्त समूह थापाको विगतसँग भने अनभिज्ञ छ।
डा केसीविरुद्ध अनसन बसेपछि उनको पृष्ठभूमि खोज्दै जाँदा थापा आपराधिक क्रियाकलापमा संलग्न भएको नेपाल लाइभले फेला पारेको छ ।
थापाको आपराधिक पृष्ठभूमि
ओखलढुंगाको साबिक सिस्नेरी गाविस ४ का थापा २०५८ सालमा बसाइँ सरेर उदयपुरको कटारी आएका थिए। उनको परिवार कटारी नगरपालिका–४ मा बस्थ्यो। पछिल्लो समय भने उनको परिवार कटारीबाट बसाइँ सरेर काठमाडौं कपनको तेन्जिङ चोकमा बस्दै आएको छ।
थापा नेपाली सेनाका पूर्व जमदार तेजबहादुर थापाका जेठा छोरा हुन्। त्रिवेणी उच्च मावि कटारीमा उनले कक्षा १० सम्म अध्ययन गरे। त्यहीँबाट २०६५ सालमा एसएलसी दिएका उनी अनुत्तीर्ण भएको उक्त विद्यालयका एक शिक्षकले नेपाल लाइभलाई बताए। तर, अहिले उनी स्नातक पढ्दै गरेको भन्ने समाचारसमेत आएका छन्। यसबारे प्रस्ट पार्दै ती शिक्षकले भने, ‘हाम्रो स्कुलबाट चाहिँ एसएलसी पास गरेका होइनन्। अन्तैबाट पास गरेर स्नातक पढेको भए जानकारी भएन।’
एसएलसी दिँदै गरेको समयमा पनि उनी कटारी प्रहरीको खोजी सूचीमा थिए। स्थानीय व्यवसायीहरुलाई धम्क्याउने र तत्कालीन माओवादी युवा संगठन वाइसिएलको नाम लिँदै व्यवसायीबाट रकम असुल्ने गरेको बुझिएको छ।
प्रहरीको खोजी सूचीमा भएकाले उनले छिमेकी जिल्ला सिन्धुलीको डम्बरखाडी गाउँका एक व्यक्तिको घरमा बसेर एसएलसी परीक्षा दिएको जानकारहरु बताउँछन्।
उनले केही युवा जम्मा पारेर आफ्नो समूह बनाई फसेको पैसा उठाउने र त्यसबाट कमिसन लिनेसमेत गरेको बुझिएको छ। यसैगरी उदयपुरको चुरे जंगलबाट हुने काठ तस्करीमा समेत उनको नाम जोडिएको थियो।
आफ्नो सञ्जाल विस्तार गर्दै उनले तराईसम्म पुर्याएका थिए। तराईमा उनले आफूलाई ‘शिवा’ भनेर चिनाएका थिए। अहिले पनि उनलाई चिन्नेले ‘शिवा’ नामबाटै चिन्छन्।
तराईमा आपराधिक क्रियाकलाप गर्नकै लागि २०६७ साल जेठमा संयुक्त क्रान्तिकारी मुक्ति मोर्चा नामक संगठन खोलिएको थियो। उक्त संगठनको थापा महासचिव थिए। त्यसबेला हालका आइजिपी सर्वेन्द्र खनाल धनुषा प्रहरी प्रमुख थिए। उक्त संगठन गठन भएको भोलिपल्टै खनाल नेतृत्वको प्रहरीले महासचिव थापा र उक्त समूहका सैन्यप्रमुख ज्वालामुखी उपनामका सिरहा बडहरामाला– ३ बस्ने १९ वर्षीय वीरेन्द्र सदालाई पक्राउ गरेको थियो।
जाँचका क्रममा प्रहरीले दुवैलाई धनुषाको ढल्केबर–३ बाट त्यसबेला हतियारसहित पक्राउ गरेको थियो। त्यसबेला प्रहरीले उनीहरूका साथबाट नाइन एमएमको सिक्सर पेस्तोल एक थान, एक राउन्ड गोली, संयुक्त क्रान्तिकारी मुक्ति मोर्चा हस्तलिखित पत्र र तीन थान मोबाइल बरामद गरेको थियो।
त्यसबेलाका धनुषाका एसपी सर्वेन्द्र खनालले गरेको पत्रकार सम्मेलनमा पक्राउ परेका थापासहित दुवैले सिरहा, धनुषा, महोत्तरी, उदयपुर र सिन्धुलीमा पार्टी विस्तार गरेर सदरमुकाममा बम विस्फोट गराउने योजना बनाएको स्वीकार गरेका थिए। (२०६७ मा हतियारसहित पक्राउ परेपछि प्रहरीले सार्वजनिक गर्दा कालो सर्टमा विजय थापा, हे. तस्बिर)
पक्राउ परेका उनलाई हातहतियार तथा खरखजाना मुद्दामा पुर्पक्षका लागि थुनामा राख्न महोत्तरीको जलेश्वर कारागार पठाइएको थियो। २०६७ असार १८ गते पुर्पक्षका लागि जेल चलान भएका थापा झन्डै एक वर्षपछि २०६८ बैसाख १८ गते धरौटीमा रिहा व्यक्ति हुन्।
जलेश्वर कारागारबाट रिहा भएपछि पनि उनको आपराधिक क्रियाकलाप रोकिएन। व्यवसायीलाई धम्काउँदै अवैध रुपमा गाडीहरुबाट कर भन्दै अवैध रकम उठाउने गरेको थाहा भएपछि उनलाई फेरि इलाका प्रहरी कार्यालय, कटारीले २०७० भदौ १९ गते पक्राउ गर्यो।
कटारीका तत्कालीन डिएसपी किसनसिंह थापाको टोलीले उनलाई पक्राउ गरेको थियो। पछि सार्वजनिक अपराधमा मुद्दा दायर भएर अनुसन्धान सुरु भएको थियो।
उनी ०७० असोज १३ गते २८ हजार रुपैयाँ धरौटी बुझाएर छुटेका थिए।
उनलाई ओखलढुंगा र उदयपुर जिल्लाको सिमानामा पर्ने लेखानी गाविसस्थित घुर्मीबाट जिल्ला निकासी हुने वस्तुको अवैध कर असुल्ने धन्दामा संलग्न भएको आरोप पनि लागेको थियो। निकासी करका नाममा ओखलढुंगा, सोलुखुम्बु र खोटाङ गरी तीन जिल्लाका व्यवसायी तथा गाडीबाट उनले रकम असुलेको उजुरी आएपछि इलाका प्रहरी कार्यालय, कटारीले उनलाई त्यसबेला पक्राउ गरेको थियो।
कटारीकै च्याङ्गा भन्ने ठाउँमा २०७० सालमा जग्गा किनबेचको कुराकानी गरेर नकिनेको भन्दै उनले सिन्धुलीका एक किसानलाई धम्क्याएका थिए। खलोमा धान झार्दै गरेका किसानलाई उनले ‘जग्गा किन्छस् कि उडाइदिऊँ’ भन्दै धम्की दिएका थिए। स्थानीय व्यवसायीहरुलाई धम्क्याउँदै रकम असुल गर्ने उनीविरुद्ध सिरहा प्रहरीमा समेत हातहतियार तथा खरखजना मुद्दा चलेको स्रोतले बताएको छ।
सिरहा प्रहरीको रेकर्ड अनुसार २०७१ चैत २५ मा हातहतियार तथा खरखजाना मुद्दामा थापासहित सिरहा मिर्चैया नगरपालिका ५ का उमेश मण्डल पक्राउ परेका थिए। उनीहरुको साथबाट दुई राउन्ड गोली लोड भएको पेस्तोल प्रहरीले बरामद गरेको थियो। थापा सिरहामा पनि हातहतियार तथा खरखजाना मुद्दामा जेल बसेर मुक्त भएका व्यक्ति हुन्।
यस्ता आपराधिक क्रियाकलापमा संलग्न तिनै थापा अहिले डा गोविन्द केसीविरुद्ध अनसन बसिरहेका छन्। गोविन्द केसीलाई गत शुक्रबार बिहानै काठमाडौं ल्याएपछि थापा पनि सँगसँगै काठमाडौं आइपुगे। ९ बुँदे मागसहित अनसनमा रहेका उनी पनि त्रिवि शिक्षण अस्पतालमै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749979333-1749983311.jpg)
-1749801778.jpg)
-1749797959.png)
-1749826086.png)
