काठमाडौं– चार पटकको विश्व च्याम्पियन जर्मनीले ८ मिनेट एसियाको ‘सुपरपावर’ जापानी स्ट्राइकरलाई रोक्न नसक्दा खेल गुमाएको छ।
बुधबार राती जर्मनीविरूद्ध पहिलो हाफमा एक गोलले पछाडि परेको अवस्थालाई उल्ट्याउँदै जापान २–१ गोलले विजयी भयो। यो जितसँगै जापानले पनि जर्मनीको २१ खेलको अपराजित यात्रालाई टुंगो लगाएको छ।
जर्मनीविरूद्ध विश्वकपमा जापानको यो पहिलो जित हो। सन् १९७८ यता पहिलो हाफमा अग्रता बनाएर पनि खेल गुमाएको जर्मनीको दोस्रो दुःखद पराजय हो। त्यतिबेला जर्मनीलाई ३–२ गोलले अस्ट्रियाले पराजित गरेको थियो।
जापानको जितमा रिस्तु दोअन र तासुमा असानो हिरो सावित भए। रिस्तुले मैदान प्रवेश गरेको ४ मिनेटभित्रै बराबरी गोल गरे। उनी ७१ मिनेटमा मिडफिल्डर आओ तानाकालाई प्रतिस्थापन गर्दै मैदान प्रवेश गरेका थिए।
जापानले यसअघि पनि एक मिनेट अगाडि डिफेन्डर हिरोकी साकाईको स्थानमा आक्रामक मिडफिल्डर ताकुमी मिनामिनोलाई प्रवेश गराएको थियो। बराबरी गोलका लागि उनले नै सुरुमा बल मिलाएका थिए।
जर्मनीले पेनाल्टीको सहयोगले पहिलो हाफको ३३ मिनेटमा एकाई गुण्डोगानले गोल गर्दै अग्रता दिलाएका थिए।
जापानले दोस्रो हाफमा आफ्नो रणनीति परिवर्तन गरेको थियो। उसले आक्रामणको धारलाई तीब्र बनाउने क्रममा पाँच खेलाडी परिवर्तन गरेको थियो।
जसमा युवा मिडफिल्डर ताकेफुसा कुबोलाई प्रतिस्थापन गर्दै डिफेन्समा ताकेहिरो तोमियासुलाई ४६ मिनेटमा प्रवेश गराएको थियो भने त्यसको १० मिनेटपछि डिफेन्डर योतु नागातोमालाई मैदानबाट झिकेर मिडफिल्डर काउरु मितोमालाई प्रवेश गराएको थियो। रिस्तुले पहिलो गोल गर्दा मिनामिनोलाई बल उपलब्ध गराउने खेलाडी उनै मितोमा थिए।
यतिबेला दोस्रो प्रतिस्थापनको रूपमा स्ट्राइकर दाइजेन माइदाको ठाउँमा अर्का आर्सनलका पूर्वविङर ताकुमा आसानो मैदानभित्र प्रवेश गरेका थिए। उनले नै ८३ मिनेटमा निर्णायक दोस्रो गोल गरेका थिए। उनलाई गोलका लागि इताकुराले बल मिलाएका थिए।
यसपालिको विश्वकपमा दुई दिनभित्र दुई एसियाली देशले ठूलो उलटफेर गरेका हुन्। मंगलबार राती साउदी अरेबियाले अर्जेन्टिनालाई पनि एक गोलले पछि पारेको अवस्थामा २–१ गोलले पराजित गरेको थियो।
यो खेलमा पनि अर्जेन्टिनाले पहिलो हाफमा पेनाल्टीमार्फत् नै गोलको अग्रता लिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1749826086.png)
