काठमाडौं- मंसिर ४ मा हुने प्रतिनिधि सभा निर्वाचनका लागि काठमाडौं- २ मा तीन जना महिला उम्मेदवारबीच प्रतिस्पर्धा हुँदैछ। सत्ता गठबन्धनका तर्फबाट पूर्वसभामुख ओनसरी घर्ती मगर, राष्ट्रिय स्वतन्त्र पार्टीबाट सोविता गौतम र राष्ट्रिय प्रजातन्त्र पार्टीबाट कुन्तीदेवी पोखरेल उम्मेदवार बनेका छन्।
को हुन् ओनसरी घर्ती?
२०४६ सालमा अनेरास्ववियुबाट विद्यार्थी राजनीतिमा प्रवेश गरेकी ओनसरी माओवादी जनयुद्धमा सामेल भइ जनमुक्ति सेनाको बटालियन कमिसारसम्म भइन्।
२०६४ को पहिलो संविधान सभा निर्वाचनमा समानुपातिक तर्फबाट संविधान सभा सदस्य बनेकी ओनसरी २०७० को दोस्रो संविधान सभा निर्वाचनमा रोल्पा- २ बाट सभासद् चुनिइन्। २०७४ मा भने उनी समानुपातिकबाटै सांसद् बनिन्।
पहिलो महिला सभामुख बनेकी ओनसरीले २०६८ मा युवा तथा खेलकुद मन्त्रीको जिम्मेवारी समेत सम्हालेकी थिइन्। यो पटक भने उनी रोल्पाबाट काठमाडौं झरेकी छन्। सत्ता गठबन्धनमा भएको सिट बाँडफाँटअनुसार काठमाडौं- २ माओवादीको भागमा परेपछि उनी संघीय राजधानीबाट प्रतिनिधि सभामा उम्मेदवार बनेकी छिन्।
को हुन् कुन्ती पोखरेल?
राष्ट्रिय प्रजातन्त्र पार्टी (राप्रपा)की केन्द्रीय सदस्य कुन्ती युवा उद्यमीका नामबाट पनि परिचित छन्। लामो समयदेखि राप्रपाको राजनीतिमा सक्रिय उनी अहिले काठमाडौं-२ बाट प्रतिनिधि सभा सदस्य उम्मेदवार बनेकी छिन्।
सामाजिक काम र महिला हिंसा विरुद्धका अभियानमा सक्रिय कुन्ती राष्ट्रिय गैरसरकारी संस्था समन्वय विभागकी अध्यक्ष हुन्।
को हुन् सोविता गौतम?
सोविता राष्ट्रिय स्वतन्त्र पार्टीका तर्फबाट काठमाडौं- २ मा उम्मेदवार बनेकी छिन्। २७ वर्षीया सोविता अधिवक्ता र टेलिभिजन कार्यक्रम निर्माता र प्रस्तोता हुन्।
नेपाल युवा संस्था सञ्जालको निवर्तमान वोर्ड सदस्य रहेकी सोविताले नेपाल स्वास्थ्य अनुसन्धान परिषद्को कानुनी सल्लाहकार भएर काम गरेकी छन्।
सुशासनका तीन अजेण्डा
ओनसरीले सुशासनका सम्बन्धमा डिजिटल प्रशासनको अवधारणालाई मूर्त रुप दिने प्रतिवद्धता जनाएकी छिन्। उनले आफ्नो प्रतिवद्धतापत्रमा आर्थिक पारदर्शिता, शून्य भ्रष्टाचारको नीति लागु गर्ने उल्लेख गरेकी छन्। त्यस्तै, सरकार र सरकारको मातहतमा रहेका कार्यालयहरुको जनताप्रतिको जवाफदेहिता सुनिश्चित गर्ने उनले जनाएकी छिन्।
सोविताले भने छ्ट्टै सुशासनको सम्बन्धमा वाचापत्र अघि सारेकी छैनन्। उनको पार्टीले जनताका लागि सरकार सञ्चालन भन्ने मुल नाराका साथ झन्झटरहित सरकारी सेवाका लागि जिम्मेवार, प्रभावकारी र पारदर्शी सरकार सञ्चालनको वाचा गरेको छ।
‘भ्रष्टाचार गरिन्न, गर्नेलाई छोडिन्न’ भन्ने नारासहित भ्रष्टाचार देश विकासको प्रमुख बाधक भएकाले यस विरुद्ध निर्मम रुपमा प्रस्तुत हुने पनि स्वतन्त्र पार्टीले वाचा गरेको छ।
त्यस्तै, महिला तथा अन्य लिंगका व्यक्तिहरुलाई समाजमा स्वतन्त्र, आत्मनिर्भर र सम्मानित बनाउँदै समाज विकासको मुलधारमा स्थापित गराउने पनि उनको प्रतिवद्धता छ।
राप्रपाकी उम्मेदवार कुन्तीको पार्टीले सुशासनमा बरु नष्ट हुन्छौं, भ्रष्ट हुँदैनौँ भन्ने मुल नाराका साथ उच्चस्तरीय नागरिक आयोग गठन गरी २०४६ पछिका उच्चपदस्थ नेता तथा कर्मचारीको सम्पत्ति छानविन गरी अवैध सम्पत्ति जफत गर्ने कानुनी व्यवस्था गरिने उल्लेख गरेको छ।
विद्यमान सम्पत्ति शुद्धीकरण ऐनमा सुधार ल्याइने राप्रपाको घोषणापत्रमा जनाइएको छ। त्यस्तै, राजनीतिक दलरहित संवैधानिक परिषद निर्माण गर्नुपर्ने घोषणापत्रमा उल्लेख छ।
प्रचारशैली
ओनसरीले घरदैलो अभियान कात्तिक १७ गतेदेखि कागेश्वरी मनोहरा नगरपालिका- ९ बाट सुरु गरेकी हुन्। यसअघि भने उनले विभिन्न कार्यक्रममा आफ्ना एजेण्डा प्रस्तुत गर्दै आएकी छन्।
ओनसरीले घरदैलोमा आफ्नो परिचय दिँदै मत मागिरेहकी छिन्। उनको साथमा सत्ता गठबन्धनका कार्यकर्ता छन्। उनी कांग्रेस, माओदावी र एकीकृत समाजवादीका झण्डा लिएर घरघरमा मत माग्दै आएकी छन्।
ओनसरीले यो क्षेत्रको विकास गर्न नसके सांसदबाटै राजीनामा दिने बताउँदै आएकी छन्। लामो राजनीतिक बिरासत बोकेकी ओनसरीलाई यो क्षेत्रमा एमालेका मणिराम फुयाँल, सोविता र कुन्तीको डर छ।
माओवादीको आफ्नै पकड क्षेत्र नभएकाले यो क्षेत्रमा उनलाई सत्ता गठबन्धनको मात्र भर छ। उनको राजनीतिक जीवन, सामान्य जीवनशैली भएको छवि, कहिल्यै विवादित नभएकी र गठबन्धनको समर्थनमा जित निकाल्न सक्ने आकलन गरिएको छ।
ओनसरी जस्तै सोविता पनि काठमाडौंका युवाहरुको रोजाइमा परेकी अनुहार हुन्। उनको प्रचारप्रसार भने उम्मेदवारीको घोषणासँगै भएको हो। उनी युवाहरुको साथ लिएर हातमा घण्टी बोक्दै मत मागिरहेकी छिन्।
भ्रष्टाचारमुक्त देश बनाउने नै उनको मुल मन्त्र रहेको छ। उनलाई कलाकारहरु वर्षा शिवाकोटीदेखि उषा उप्रेतीसम्मले समर्थन जनाएका छन्। सोविता घरदैलोमा गएर वृद्धवृद्धाका हात आफ्नो टाउकोमा राख्दै आर्शिवाद लिएर मत माग्दै आएकी छिन्।
सोविता सामाजिक सञ्जालमा पनि निकै सक्रिय रहेकी उनी छोटो समयमै युवा पुस्तामाझ र्चित भएकी छन्। भर्खरै सम्पन्न स्थानीय तहको निर्वाचनमा काठमाडौं महानगरपालिकाको मेयरमा स्वतन्त्र उम्मेदवार बालेन शाहले जितेसँगै युवा पुस्ता अग्रसर भएको जानकार बताउँछन्। धरानदेखि धनगढीसम्म स्वतन्त्रको लहर चलेसँगै सोविताले जित निकाल्न सक्ने उनका समर्थको भनाइ छ।
३५ वर्षीया कुन्ती पनि घरदैलो अभियानमा व्यस्त छिन्। उनी कहिले होटेलतिरका कार्यक्रममा त कहिले गाउँतिरका चौतरीमा उभिएर भाषण गर्दै मत मागिराखेकी छन्। उनको मुख्य चुनावी एजेण्डा भने ओनसरीलाई लक्षित गरी पर्यटक उम्मेदवारलाई मत नहालौँ, स्थानीयलाई जिताउँ भनेर मत मागिरहेकी छन्।
यो चुनाव धर्मयुद्ध जस्तै भएकोले महाभारतकी कुन्तीले जस्तै धर्मयुद्धमा जिताउन अपिल गर्दै हिँडिराखेकी छन्। उनी मतदातासँग सनातनी धर्मको संरक्षण, युवा रोजगारी तथा महिला, बालबालिका र वृद्धवृद्धाको साथमा रहने भन्दै घरदैलोमा मत मागिराखेकी छन्।
यो क्षेत्रबाट २०७४ मा तत्कालीन एमालेका नेता एवं अहिलेका एकीकृत समाजवादीका अध्यक्ष माधव नेपालले जितेका थिए। उनी त्यो बेला एमालेका तर्फबाट वाम गठबन्धनका साझा उम्मेदवार थिए। नेपालले २७ हजार ३६६ मत ल्याउँदा कांग्रेसका दीपक कुईंकेलले १४ हजार ९०३ मत प्राप्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749370216.png)
-1749368132.jpg)
-1749200817.png)
