काठमाडौं– प्रहरी प्रधान कार्यालयले आन्तरिक रुपमा लिएको प्रि–स्याट परीक्षाको प्रश्नपत्र ‘लिक’ भएको घटनाको अनुसन्धान गरेको समितिले एसपीसहित ३५ जनालाई कारबाही सिफारिस गरेको छ। चार वटै सिफ्टका प्रश्नपत्रहरु बाहिरिएको समितिको निष्कर्ष छ।
गएको १६ साउनमा लिइएको दोस्रो सिफ्टको प्रश्नपत्र बाहिरिएको जानकारी पाएपछि अनुसन्धान सुरु गरेको समितिले चार वटै सिफ्टका प्रश्नपत्र लिक भएको निष्कर्ष निकालेको हो। प्रहरी प्रधान कार्यालयले १५ र १६ साउनमा दुई–दुई सिफ्ट गरी चार सिफ्टमा प्रि–स्याटको परीक्षा सञ्चालन गरेको थियो। उक्त परीक्षा पुनः गर्नुपर्ने निष्कर्ष पनि समितिले निकालेको प्रहरी प्रधान कार्यालय स्रोतले जनाएको छ।
दोस्रो दिनको दोस्रो सिफट्को प्रश्नपत्र लिक भएपछि प्रहरी प्रधान कार्यालयले प्रहरी महानिरीक्षक शैलेश थापा क्षेत्रीको सचिवालयका प्रहरी नायब महानिरीक्षक (डीआईजी) वसन्तकुमार लामाको संयोजकत्वमा ६ सदस्यीय छानबिन समिति गठन गरेको थियो। समितिले चार वटै सिफट्को प्रश्नपत्र आउट भएको निष्कर्ष निकाल्दै प्रतिवेदन बुझाउने तयारी गरेको प्रधान कार्यालय स्रोतले नेपाल लाइभलाई जानकारी दिएको छ। स्रोतले भन्यो ‘सुरुमा एक सिफ्टको मात्रै प्रश्नपत्र लिक भएको भन्ने थियो। पछि अनुसन्धानको क्रममा चार वटै सिफट्को प्रश्नपत्र लिक भएको खुलेको हो।’
यी चार वटै प्रश्नपत्र लिकमा युएन शाखामै कार्यरत परिचर सुरेश बम र साइबर ब्यूरोमा कार्यरत हवल्दार कुमार शाहको प्रत्यक्ष संलग्नता रहेको समितिको ठहर छ। आर्थिक लाभ लिने उद्देश्यले उनीहरुले प्रश्नपत्र लिक गरेको समितिले ठहर गरेको छ।
शाहको योजनामा परिचर बमले प्रश्नपत्र 'आउट' गरेको पाइएको छ। प्रिन्ट गरिएकामध्ये राम्रोसँग नबुझिने खालका प्रश्नपत्रहरु युएन शाखाका एसपी अनुपम शमशेर राणाको ड्रयरमा राखिएको थियो। बमले ती प्रश्नपत्रहरु चोरी गरी आउट गरेको पाइएको अनुसन्धान समितिले निष्कर्ष निकालेको छ।
शाहले यसअघि पनि चोरी गर्थे प्रश्नपत्र
हवल्दार शाह आठ वर्षसम्म युएन शाखामा कार्यरत थिए। उनको चालचलन ठीक नभएको भन्दै केही समयअघि मात्रै त्यहाँबाट साइबर ब्यूरोमा सरुवा गरिएको थियो। उनकै योजनामा प्रश्नपत्र चोरी भएको समितिले पत्ता लगाएको हो। अनुसन्धानका क्रममा उनले यसअघि पनि प्रि–स्याटको प्रश्नपत्र चोरी गरेको पाइएको प्रहरी प्रधान कार्यालय स्रोतले जनाएको छ।
अनुसन्धान समितिका एक सदस्यले नेपाल लाइभसँग भने, ‘शाहले यस पटक मात्रै होइन यसअघि पनि प्रश्नपत्र आउट गरेको हामीसँग स्वीकार गरेका छन्। उनी प्रि–स्याट प्रश्नपत्र चोरी गर्ने पेशेवर नै रहेछन्।’
शाह आफूले परीक्षा नदिने भए पनि प्रश्नपत्र चोरी गरी आर्थिक लेनदेनमा अरुलाई दिने गरेको समितिले जनाएको छ। यस वापत उनले राम्रो आर्थिक आर्जन गरेको खुलेको छ।
सबै सिफ्टका परीक्षा रद्द गरिने
१६ साउनमा लिइने दोस्रो सिफट्को प्रश्नपत्र आउट भएको जानकारी परीक्षा सुरु हुनुपूर्व नै पाइएकाले प्रहरी प्रधान कार्यालयले उक्त प्रश्नपत्र रद्द गरी अर्कै प्रश्नपत्रबाट परीक्षा सञ्चालन गरेको थियो। जस कारण परीक्षा नै रद्द गर्नुपर्ने अवस्था नरहेको प्रहरी अधिकारीले बताउँदै आएका थिए।
तर, अनुसन्धानका क्रममा चार वटै सिफ्टका प्रश्नपत्र आउट भएको खुलेपछि सबै परीक्षा नै रद्द गर्नुपर्ने समितिले निष्कर्ष निकालेको छ। ‘पहिला परीक्षा सुरु हुनुभन्दा अघि एक सिफ्टको मात्रै प्रश्नपत्र आउट भएको भन्ने थियो। त्यसपछि अर्कै प्रश्नपत्रबाट परीक्षा लिइएको थियो। तर, अनुसन्धाका क्रममा चार वटै सिफ्टको आउट भएको खुलेपछि रद्द गनुपर्ने निष्कर्ष निकालिएको छ,’ स्रोतले भन्यो।
अब प्रि–स्याटको परीक्षा पुनः लिनुपर्ने भएको छ। युएनका प्रतिनिधिको रोहबरमा स्याटको अन्तिम परीक्षा लिनुपर्ने हुन्छ। परीक्षा लिनुअगावै प्रहरी प्रधान कार्यालयले प्रि–स्याटमा पास भएकाहरुको सूची पठाउनु पर्छ। आउँदो अक्टोबरमा अन्तिम परीक्षा हुने भएकाले त्यो अगाडि नै प्रि–स्याटमा पास हुनेको विवरण पठाउनु पर्ने हुन्छ। त्यस कारण जतिसक्दो चाँडै पुनः परीक्षा सञ्चालन गरिने प्रहरी प्रधान कार्यालय स्रोतले नेपाल लाइभलाई जानकारी दियो।
३५ जनालाई कारबाही सिफारिस
अनुसन्धान समितिले ३५ जनालाई कारबाही सिफारिस गर्ने तयारी गरेको छ। परिचरदेखि एसपीसम्म कारबाहीको सूचीमा रहेको स्रोतले जानकारी दिएको छ।
प्रश्नपत्र चोरी गर्ने परिचर सुरेश बम र चोरी गर्न लगाउने हवल्दार कुमार शाहको मुख्य भूमिका रहेको निष्कर्ष निकाल्दै समितिले उनीहरुलाई जागिरबाटै बर्खास्त गर्नुपर्ने सिफारिससहितको प्रतिवेदन बुझाउने तयारी गरेको छ। अन्यको हकमा ग्रेड घटुवादेखि तलब वृद्धि रोक्का, नसिहत र सचेतसम्मका कारबाहीको सिफारिस गरिएको स्रोतको भनाइ छ।
‘प्रश्नपत्र लिक हुनेमा विभिन्न व्यक्तिका विभिन्न भूमिका देखिएका छन्। कोही प्रत्यक्ष संलग्न रहेको देखिन्छ भने कोहीको सामान्य भूमिका देखिएको छ। उनीहरुलाई त्यही अनुसार कारबाहीको सिफारिस गर्ने तयारी छ’ स्रोतले नेपाल लाइभसँग भन्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
