काठमाडौं- सत्तारुढ नेपाल कम्युनिस्ट पार्टी (नेकपा) को सचिवालयको शुक्रबारको बैठक सकिएको छ। बैठकले छलफलको कार्यसूची तय गरेको प्रवक्ता नारायणकाजी श्रेष्ठले जानकारी दिए।
'आजको सचिवालयको बैठकमा पार्टीमा उत्पन्न संकट, समस्या र त्यसको समाधानलाई कार्यसूची बनाएर छलफल गर्ने निष्कर्ष निकालियो। त्यो कार्यसूची अन्तर्गत स्वभाविक रुपमा त्यसअघिको स्थायी कमिटीको बैठकको निर्णयको कार्यान्वयनको सन्दर्भ; कर्णाली, पर्सा लगायत विविध ठाउँका घटनाक्रम, कोभिड १९ रोकथाम, नियन्त्रण, उपचार र त्यसले पैदा गरेको आर्थिक संकट र यसबीचमा पार्टी र सरकारका विषय, गोयल भ्रमण लगायतका कुराहरु पनि छलफल हुने नै छन्', उनले भने।
श्रेष्ठका अनुसार, मुख्य कार्यसूची चाहिँ पार्टीमा उत्पन्न संकट, समस्या र त्यसको निवारण र समाधानलाई केन्द्रमा राखेर छलफल गर्ने तय भएको छ।कार्यसूचीमा छलफल गर्नका लागि सदस्यहरुलाई अध्ययन सामग्री पनि वितरण गरिएको छ।
'कार्यकारी अध्यक्षले बैठकको आग्रह गर्नुभएको र बैठक बस्न नसकेको स्थितिमा कार्यकारी अध्यक्षसहित हामी पाँच जना सचिवालय सदस्यले अध्यक्ष केपी ओलीलाई सहमतिमा बैठक बस्न आग्रह गरेको पत्र, त्यसको जवाफमा अध्यक्ष केपी शर्मा ओलीले प्रचण्डलाई लेख्नुभएको पत्र उक्त पत्रको जवाफमा केपी शर्मा ओलीलाई प्रचण्डले लेख्नुभएको पत्र, पार्टीको संकट र त्यसको निवारणको सन्दर्भमा सचिवालयमा छलफलका लागि प्रचण्डले तयार गरेको प्रस्ताव र स्थायी कमिटीको बैठकपछि जारी गरिएको अन्तरपार्टी निर्देशिका आज सबै सचिवालयका सदस्यहरुलाई अध्ययनका लागि सबै वितरण गरिएको छ', श्रेष्ठले भने।
ती सबै सामग्रीहरुको अध्ययन गरिसकेपछि नै पार्टीमा गम्भीर र समग्रतामा छलफल गरी पार्टी एकताको रक्षा गर्दै पार्टीलाई अझ सुदृढ बनाउने र पार्टी र सरकारका सामु रहेका ऐतिहासिक जिम्मेवारीको कार्यभारलाई पूरा गर्ने दिशातिर जाने निष्कर्ष निकाल्नु उपयुक्त हुने निष्कर्ष आजको बैठकको थियो।
सचिवालयको अर्को बैठक मंसिर ३ गते दिउँसो १ बजे बस्ने तय भएको श्रेष्ठले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
