काठमाडौं- नेकपा अध्यक्ष एवम् प्रधानमन्त्री केपी ओली र अर्का अध्यक्ष पुष्पकमल दाहाल ‘प्रचण्ड’ले आ-आफ्नो अडान नछोड्दा मन्त्रिपरिषद् पुनर्गठनका विषय पेचिलो बन्दै गएको छ। मंगलबार लगातार पाँचौ दिनको छलफल भएपनि दुवै अध्यक्षले आफ्नो अडान नछोड्दा छलफलले कुनै निष्कर्ष निकाल्न सकेको छैन।
बिहीबारदेखि मन्त्रिपरिषद् पुनर्गठनमा केन्द्रित भएर अध्यक्षद्वय ओली-प्रचण्डले दैनिक छलफल गर्दै आएका छन्। ओली-प्रचण्डले पुनर्गठनकै विषयलाई लिएर गत बिहीबार, शुक्रबार, आइतबार, सोमबार र मंगलबार समेत छलफल गरेका थिए।
मंगलबार मध्यान्न १२ बजेदेखि करिब तीन घण्टा छलफल भएपनि कुनै निष्कर्षमा नपुगी छलफल टुंगएको प्रधानमन्त्रीको सचिवालयले जनाएको छ। अध्यक्ष ओलीले स्थायी कमिटी र सचिवालय बैठकको स्पिरिटलाई समाउन नसक्दा पुनर्गठनमा ढिलाई भएको प्रचण्ड निकट एक स्थायी कमिटी सदस्यले जानकारी दिए।
पार्टी कमिटीले गरेको निर्णयलाई प्रधानमन्त्रीले मान्न आनाकानी गर्न थालेपछि प्रचण्ड भने प्रधानमन्त्रीप्रति पुन सशंकित भएको बताइएको छ। अप्ठ्यारो पर्दा सबै मान्न तयार हुने ओली सजिलो हुँने बित्तिकै सबै बिर्सने गरेको भन्दै प्रचण्ड सशंकित भएको ओलीइतर पक्षका नेताहरुको ठहर छ।
‘प्रधानमन्त्री ओली कमरेड खाली आफ्नै जिद्दी गर्नुहुन्छ। आफूलाई जुन जुन मन्त्रीसँग कुरा मिल्दैन। जसले आफूले भने जस्तो गर्दैन त्यस्ता मन्त्रीलाई मात्रै हटाउने धम्की दिनुहुन्छ,’ ती स्थायी कमिटी सदस्यले भने, ‘जो सबैभन्दा धेरै विवादित र भ्रष्ट छन् ती मन्त्रीलाई काखी च्याप्नु हुन्छ। त्यस्तो भए कसरी कुरा मिल्छ? जबसम्म स्वच्छ छवि भएका नेता सरकारमा हुँदैनन्। तबसम्म पुुर्नगठन गर्नु नगर्नुको कुनै अर्थ हुँदैन।’
प्रचण्डले सबैभन्दा विवादित भएका मन्त्री र प्रभावकारी काम गर्न नसकेका मन्त्रीलाई पहिलो प्राथमिकता दिएर हटाउनु पर्ने पक्षमा उभिएका छन्। धेरैभन्दा धेरै स्वच्छ छवि भएका मन्त्रीलाई सरकारमा नलगेसम्म सरकारले पार्टीको पक्षमा महाल बनाउन नसकिने प्रचण्डको बुझाइ छ। अबको मन्त्रिपरिषद पुनर्गठनले भावी नेकपाले चुनाव जित्ने वा हार्ने फैसला गर्ने भएकाले योग्य, सक्षम र स्वच्छ छवि भएका व्यक्तिलाई राखेर पुनर्गठन गर्नुपर्ने प्रचण्डको मत राखेको ती स्थायी कमिटी सदस्यले बताए। प्रधानमन्त्री ओलीले आफूलाई अनुकुल हुने मात्रै मन्त्री राख्न खोज्दा समस्या भइरहेको नेताहरुले बताएका छन्।
ओलीले आफ्नो मन्त्रिपरिषद्मा रक्षामन्त्री ईश्वर पोखरेल र स्वास्थ्यमन्त्री भानुभक्त ढकाललाई राखिराख्न सबैभन्दा धेरै बल गरेर राख्न खोजेको प्रधानमन्त्रीका एक सल्लाहकारको भनाइ छ।
स्रोतका अनुसार सरकारमा सबैभन्दा धेरै बदनाम भएपनि पोखरेल र ढकाललाई कुनै हालतमा हटाउन नहुने अडान ओलीले दोहार्याई रहेका छन्। यदि उनीहरुलाई हटाए कुनै मन्त्रीलाई नहटाएर रिक्त मन्त्रालयमा नयाँलाई जिम्मेवारी दिएर पुनर्गठन गर्ने पक्षमा उभिएका छन्। ओलीले प्राय पूर्व माओवादी समूहबाट आफूलाई सहयोग नगरेको भन्दै धेरै मन्त्रीलाई हटाउन खोजेका छन्।
श्रममन्त्री रामेश्वर राय यादव, खानेपानीमन्त्री विना मगर, शिक्षामन्त्री गिरिराजमणि पोखरेल, वनमन्त्री शक्तिबहादुर बस्नेतलाई प्रधानमन्त्री ओलीले दोहोर्याउन चाहेका छैनन्। गृहमन्त्री रामबहादुर थापा, उर्जामन्त्री वर्षमान पुन र उद्योगमन्त्री लेखराज भट्टलाई हटाउन नहुने पक्षमा प्रधानमन्त्री उभिएका छन्। पूर्वमाओवादी बाहेकबाट खेदकुदमन्त्री जगतबहादुर विश्वकर्मा, भूमिमन्त्री पद्मा अर्यालले चाहेमा हटाउने योजना बनाएका छन् प्रधानमन्त्रीले।
तर, प्रचण्ड रक्षा पोखरेल, स्वास्थ्य मन्त्री ढकालसहित प्रभावकारी काम गर्न नसकेका १२ भन्दा धेरै नेताले जिम्मेवारी पाउनेगरी पुनर्गठन गर्नुपर्ने पक्षमा छन्।आफूले भने जस्तो नभए ओलीले रिक्त भएका तीन मन्त्रालय सहित दुई मन्त्रालय फोडेर पाँच नयाँ मन्त्रीलाई जिम्मेवारी दिएर पुनर्गठन गर्नुपर्ने सर्त राखेका छन्।
ओलीले स्थायी कमिटी र सचिवालय बैठकको सुझावलाई नजरअन्दाज गरेको प्रचण्डले बताउने गरेका छन्। यदि पार्टी कमिटीको निर्णय बमोजिम पुनर्गठन नभए वरिष्ठ नेता झलनाथ खनाल र माधवकुमार नेपाल पक्षलाई समेत मनाउन गाह्रो हुने भन्दै प्रचण्ड कन्भिन्स गराउन लागिरहेको बताइएको छ। तर, ओली आफ्नो अडानबाट टसमस नभएपछि पुनर्गठनको प्रक्रिया अझै लम्बिने देखिएको छ।
प्रचण्ड नेता वामदेव गौतम र नारायणकाजी श्रेष्ठलाई मन्त्री बनाउनु पर्ने लबिङ गरेका छन्। तर ओलीले दुवै जनालाई कुनै हालतमा मन्त्री बनाउन नसकिने आफ्नो अडान दोहोर्याई रहेको बालुवाटार स्रोतले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
