कसैले कल्पनासमेत नगरेको महामारीले हामीसामु निकै ठूलो चुनौती थपिदिएको छ। याे चुनौतीसँग जुध्न हामीले सक्दो पहल गरिरहेका छाैं। गत चैत ११ गतेदेखि लकडाउन भयो। त्यसयता म कुनै दिन घर बसेको छैन। हरेक दिन जनताको सेवामा खटिएकी छु। हाम्रो कीर्तिपुर नगरपालिका पुरै खटिएकाे छ। तर यसरी खट्दाखट्दै पनि नगरवासीमा कोरोना संक्रमण देखिन थालेको छ। सुरुमा प्रभावित जिल्लाबाट आएकाहरुमा देखिएको कोरोना अहिले नगरपालिकाका केही स्थानीयमा समेत देखिन थालेको छ। बिहीबारसम्म संक्रमितको संख्या ३६ पुगेको छ। शुक्रबारको विवरण आइसकेको छैन।
अर्कातिर कोरोनाले अर्थतन्त्र पनि धरासायी बनाएको छ। कोरानाका कारण उत्पादनमूलक कामहरु प्रायः ठप्प हुँदा जनतामाथि अर्को समस्या थपिएको छ। दिनभरि काम गरेर बिहान-बेलुका छाक टार्ने वर्गलाई अहिले निकै समस्या परेको छ। मध्यम वर्ग तथा व्यापार, व्यवसाय गर्नेहरुको समस्या पनि आफ्नै छ। नगरपालिका समस्याले जेलिएको छ। हामीमाथि चुनौती थपिएका छन्। तर पनि हामीले विकास निमार्णका केही काम अहिले पनि गराइरहेका छौं। भौतिक दुरी कायम राख्दै ठाउँ-ठाउँमा सञ्चालन भइरहेका सडक, बाटोघाटो निर्माणका कामलाई निरन्तरता दिएका छौं।
हामी जनप्रतिनिधि भएको तेस्रो वर्ष पूरा भएर चौथो वर्षमा प्रवेश गर्ने बेला, याे विकास निमार्णका काममा फड्को मार्ने बेला हो। तर जुन उद्देश्य हामीले लिएका थियौं, त्यसअनुसारको काम भन्दा पनि यतिबेला हामी सेवामुलक काममा खटिएका छौं।
कोरोना रोकथाम तथा नियन्त्रणका लागि क्षमताले भ्याएसम्मका काम गरिरहेका छौं। यो वर्षको बजेट बनाउँदा नै हामीले स्वास्थ्यलाई पहिलो प्राथमिकता दिएर कोरोना नियन्त्रणका लागि बजेट छुट्याएकाले बजेटको अभाव झेल्नु परेको अवस्था छैन। हामीले १ करोेड ५० लाख आकस्मिक कोषमा राखेका थियौं। अहिले यसैबाट चलाइराखेका छौं। संक्रमण बढ्दै गयो भने त अब हामीसँग भएको स्रोतले धान्ला भन्न सकिन्न । अहिलेसम्म चाहिँ प्रदेश तथा संघीय सरकारको सहयोगमा सक्दो पहल गरिरहेका छौं।
अहिले कोरोना रोकथाम तथा नियन्त्रणका लागि कन्ट्याक्ट ट्रेसिङ तथा पिसीआर परीक्षणको दायरा फराकिलो बनाउने काम भइराखेको छ। बिहीबारसम्म हाम्रो नगरपालिकामा ७०४ जनाको कन्ट्याक्ट ट्रेसिङ भएको छ। कोरोना पोजिटिभ देखिएका संक्रमितहरुको व्यवस्थापनका लागि हामीले आइसोलेसन सेन्टर विस्तारलाई जोड दिएका छौं।
हामीले हाम्रो कीर्तिपुरस्थित जनस्वास्थ्य केन्द्रीय कार्यालयमा २ सय बेडको क्वारेन्टाइन तयार गरेका थियौं। त्यसलाई हामीले आइसोलेसनमा परिणत गरेका छौं। त्यसैगरी टियुको रिसर्च सेन्टरमा भेन्टिलेटरसहितको २० बेडको आईसोलेसन छ हामीसँग।
कीर्तिपुर अस्पतालमा अहिले पनि भेन्टीलेटरसहितको २० बेडको आइसोलेसन बनाउन तयारी अवस्थामा छ। हिकास्ट कलेजस्थित ३० देखि ४० बेड सम्मको आवश्यकताअनुसारको आइसोलेसन बनाउने तयारीमा नगरपालिका छ ।
आफ्नो घरमा सुरक्षित रुपमा आइसोलेसनमा बस्ने वातावरण भएकाहरु होम आइसोलेसनमै बस्नु भएको छ। उहाँहरुको निगरानीका लागि पनि हामीले स्वास्थ्यकर्मी परिचालन गरेका छौं। स्वास्थ्यकर्मीहरु संक्रमितहरुसँग नियमित सम्पर्कमा हुनुहुन्छ। सबैजसो बिरामीको अवस्था सामान्य छ।
तर फ्रन्टलाईनमा खटेर काम गर्ने स्वास्थ्यकर्मीहरुकोे सम्मानका लागि समुदायमा सचेतना फैलाउनुपर्ने देखिएको छ। जनचेतनाको अभावकै कारण स्वास्थ्यकर्मीहरुसँग समुदाय त्रसित भएको वा उहाँहरु प्रति केही अमानवीय व्यवहारका घटना बढेका छन्। अहिले अधिकांश स्थानको अवस्था यस्तै छ। कीर्तिपुरको पनि सोही अवस्था हो। स्वास्थ्यकर्मीहरुलाई घर भाडामा लिएर राख्छौं भन्दा पनि नपाएको अवस्था छ। हामीले पनि हाम्रोे कन्ट्याक्ट ट्रेसिङ टिमलाई चाहिँ नगरपालिकाभित्रै राखेर काम गराउँछौं भनेका थियौँ। भीडभाड क्षेत्रमा दिनभरि खटिएका स्वास्थ्यकर्मीहरुलाई सहज होस् भनेर क्वारेन्टाइनका लागि शान्त र फराकिलो ठाउँ खोजेका थियौं। तर पाइएन। यो पनि समुदायवासीले नबुझेकै कारणले हो ।
हामीले फ्रन्टलाईनमा खटिएर काम गर्ने स्वास्थ्यकर्मीहरुलाई प्रोत्साहन तथा हौसला दिइरहेका छौं। सरकार, जनप्रतिनिधि, सञ्चारमाध्यम, समुदाय सबै तर्फबाट उहाँहरुको हौसला बढाउन जरुरी छ।
(कीर्तिपुर नगरपालिकाकी उपमेयर खड्कासँग नेपाल लाईभकर्मी निर्मला घिमिरेले गरेको संवादमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1751267101.jpg)
-1751273553.jpg)
-1749826086.png)
