काठमाडौं– रुकुम पश्चिमको चौरजहारी नगरपालिका–८ सोतीमा ६ ज्यान जाने गरी भएको घटनामा ३४ जनालाई प्रतिवादी बनाएर मुद्दा दायर गरिएको छ।
सोतीकी मल्ल थरकी एक युवतीसँग भएको प्रेम सम्बन्धलाई विवाहमा परिणत गर्न भन्दै गत जेठ १० जाजरकोटका नवराज विकसहित १९ जना सोती पुगेका मध्ये ६ जनाको हत्या भएको थियो। सोही घटनाका ३४ अभियुक्तविरुद्ध प्रहरीले आइतबार अदालतमा मुद्दा दायर गरेको छ।
यस घटनाका बारेमा प्रहरीले कसरी थाहा पायो? घटनास्थल पुग्ने पहिलो प्रहरी के भन्छन्? यसबारे सबैभन्दा पहिला घटनास्थल पुगेका प्रहरी सहायक निरीक्षक सन्तोष लामिछानेले यस्तो बयान दिएका छन्।
मिति २०७७।०२।१० गते दिनभर म कार्यरत ईलाका प्रहरी कार्यालय चौरजहारी रुकुम पश्चिमको कार्यालयमा नै थिए। सोही समयमा कार्यालयमा जिल्ला रुकुम पश्चिम चौरजहारी नगरपालिका वडा नं ८ सोती गाउँमा जाजरकोटबाट केटाहरु आएका छन्।
झगडा हुनेवाला छ भनी सोही वडाका वडा अध्यक्ष डम्बर बहादुर मल्लले मोबाईल बाट कार्यालयको लेन्डलाईन नं ०८८–४०११०० मा सोही दिनको अ १७ ः १५ बजेतिर सुचना दिए पछि तत्कालै मोटरसाईकलमा साथमा मैले प्रहरी जवान श्यामजंग शाहलाई लिई कार्यालयबाट करीब ७ किमी उत्तर पुर्व पर्ने उक्त सोती गाउँमा पुग्नै लाग्दा मानिस कोही देखिन। त्यससपछि मैले सञ्चार सेटमार्फत हामी अघी भनेको स्थानमा पुगौं, यहाँ त मानिस कोही छैन, कहाँ हो भनी सोधेपछि कार्यालयबाट कुनै जानकारी आउनु भन्दा अगाडी बाटोमा एक जना स्वयम् सेवक भाईलाई देखेपछि यहाँ झगडा भएको भनी हाम्रो कार्यालयमा सुचना गएको छ कुन ठाउँमा हो? झगडा भएको भनी सोधपुछ गयौं।
उनले यहाँ होईन झगडा भएको तपाईलाई कस्ले गलत सूचना दिएछ तल जिल्ला रुकुम पश्चिम चौरजहारी नगरपालिका वडा नं ८ औल जिउँला मध्य पहाडी लोक राजमार्ग भेरी नदी बगर स्थित सोती गाउँका मानिसहरु दौडिदै लखट्दै गएका छन् र केही केटाहरु भाग्दै छन् भनेपछि उक्त स्थानमा पुग्दा थुप्रै मानिसहरु सडक बाटो तथा भेरी नदी बगरमा भेला जम्मा भएको देखेँ।
१ जना केटालाई सडक बाटोमा केही व्यक्तिहरुले कुटपिट गरी रहेका थिए। अर्को १ जना केटालाई भेरी नदी किनारबाट केही व्यक्तिहरुले पिट्दै सडक बाटो तर्फ धकेल्दै हान्दै तान्दै ल्याउदै गरेका थिए।
अन्य थुप्रै मानिसहरुले भेरी नदी बगरमा केही केटाहरुलाई कुटपिट गरिरहेको देखेपछि मैले के को झगडा हो ? किन मानिसलाई कुटपिट गरेको भनी हप्काई मेरो साथमा गएको प्र.ज. श्यामजंग शाहलाई सडक नजिक छोडी यी घाईते र कुटपिट गर्नेहरुलाई राम्रोसँग हेर्नु कसैलाई कुटपिट गर्न र भाग्न नदिनु भनी म सिधै नदी बगरमा पुग्दा ५ जना केटाहरुलाई केही व्यक्तिहरुले निर्घात कुटपिट गरिरहेका थिए।
म पुग्दा निज व्यक्तिहरुले कुटपिट गर्न छाडे र घाईते मध्येका सुदिप खड्कालाई कसले तिमीहरुलाई कुटपिट गर्यो भनी सोधपुछ् गर्दा सोही स्थानमा रहेका सन्तोष मल्ल, टोप बहादुर मल्ल, परिवर्तित नाम ५६ रुकुम पश्चिम ३६(३) समेतका व्यक्तिहरुले म समेतका साथीहरुलाई लखेट्दै ढुङगा, मुढा, लाठी समेतले प्रहार गर्दै यहाँसम्म ल्याई निर्घात कुटपिट गरेका हुन भन्दै थिए।
निजको नाक मुखबाट रगत समेत वगिरहेको थियो। निज रुदै थिए। नदी पारी पनि थुप्रै मानिसहरुको भेला जम्मा थियो। नदी तरेर गएका केटाहरुलाई समेत कुटपिट गरिरहेका थिए। मैले त्यहीं नजिकका व्यक्तिहरुलाई हप्काई नियन्त्रणमा लिएं र नदी पारीको भिडलाई नियन्त्रण गर्नका लागि मैले जिप्रका जाजरकोटलाई खबर गरिदिनु भनी संचार सेट मार्फत मेरो कार्यालयमा खबर गरे।
त्यसको केही समय पछि अस्थायी प्रहरी पोष्ट होलु जाजरकोटबाट प्रहरीहरु आई तिनीहरुलाई नियन्त्रणमा लियौं। मैले नदीको बिच बगरमा भएका घाइते ५ जना केटाहरुलाई सडकमा ल्याएपछि वडा अध्यक्ष डम्बर बहादुर मल्ललाई देखेँ। मैले निजलाई तपाई जनप्रतिनिधी जस्तो मान्छे भएर पहिला मान्छे कुट्ने अनि प्रहरीलाई खबर गर्ने भनी घाईतेहरु मध्ये एक जनाको कपडा (भेष्ट) खोली लागेको निलडाम समेत देखाई दिएपछि निज वडा अध्यक्ष केही बोलेनन्।
सडक बाटोमा घाईते अवस्थामा रहेका महेश कार्की समेतले हामीहरुलाई कुटपिट गर्ने उहाँ नै हो भनी वडा अध्यक्ष डम्बर बहादुर मल्ल समेतका केही व्यक्तिहरुलाई भन्दै थिए।
सोही समयमा इलाका प्रहरी कार्यालय चौरजहारीको प्रहरी भ्यान समेत आई पुग्यो र उक्त भ्यानलाई जाजरकोट साइडमा रहेका घाईतेहरुलाई लिन कालेगाउँ पुल नजिक पठाई चाइना बगर साइडबाट चौरजहारीतर्फ आउँदै गरेको भौतिक पुर्वाधारको गाडीमा भेरी नदीको बिच बगरमा फेला परेका ५ जना घाइते र सडक बाटो नजिक रहेका २ जना गरी ७ जना घाईतेलाई सोही गाडीमा राखी मैले उपचारको लागि मानव बिकास सामुदायिक अस्पताल चौरजहारी पुर्याएँ।
उपचार तथा सोधपुर्छ गर्दा जाजरकोटबाट सोती गाउँमा नवराज बिक समेत १८ जना केटाहरु आएको अवस्थामा गाउँलेहरुले ढुङ्गा मुढा समेतले प्रहार गरी लखेट्दै भेरी नदीमा पुर्याई निर्घात कुटपिट समेत गरी केही साथीहरु बेपत्ता भएका छन् भनेका थिए।
सोही दिनको राती अन्दाजी ८÷९ बजेको समयमा सोही भेरी नदीमा नवराज बिकको लाश फेला परेको थाहा पाएको हुँ। अन्य ५ जना बेपत्ता भएको र भेरी नदी तरी पारी गएका ५ जना केटाहरुलाई जाजरकोटबाट आएको प्रहरी टोलीले उद्दार गरी उपचारको लागि ईप्रका चौरजहारीको गाडीमा पठाएपछि जम्मा घाइते १२ जना भएको थाहा पाएको हुँ।
घटना बारेमा बुझ्दा जाजरकोटबाट आएका नवराज बिक समेतका १८ जना केटाहरुलाई सोती गाउँका मानिसहरुले ढुङ्गा मुढा समेतले प्रहार गर्दै छेका हाली भेरी नदीमा पुर्याई कुटपिट समेत गरी घाइते मध्येका केही साथीहरु भेरी नदीमा मृत अवस्थामा फेला परेको थाहा पाएको हुँ।
घटनाको सूचना दिने व्यक्तिले सही स्थान पहिचान नगरी सूचना दिएकोले वास्तविक घटनास्थलमा पुग्न नै करिब १२÷१५ मिनेट भन्दा बढी ढिलो भएकोले ६ जना व्यक्तिहरुको ज्यानै गएको र १२ जना घाइते भएका हुन् भन्ने समेत व्यहोराको कागज।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749627050.jpg)
-1749627522.jpg)
