समाचार

बुधबार कालापानी जाँदै सशस्त्र प्रहरी, सेनाकाे हेलिकाेप्टरले बन्दोबस्तीका सामान पनि लैजाने

नारायण अधिकारी सोमबार, वैशाख २९, २०७७ १६:३३

काठमाडौं- दार्चुलाको व्यास गाउँपालिकास्थित कालापानी क्षेत्रको सुरक्षार्थ सुरक्षा फाैज पठाइने भएकाे छ। गृहमन्त्री रामबहादुर थापाकाे निर्देशनपछि सुरक्षा फाैज पठाउन लागिएकाे हाे।

सुरक्षा फाैज पठाउनका लागि नेपाली सेनासँग हेलिकाेप्टर मागिएकाे गृह स्रातले जनाएकाे छ। सेनाकाे हेलिकाेप्टरमा बुधबार सुरक्षा फाैज पठाउने तयारी भएकाे छ।

कालापानी क्षेत्रको सुरक्षार्थ सशस्त्र प्रहरी बल मुख्यालयले आफ्नो जनशक्ति खटाउने तयारी गरेको हाे। विकट कालापानी क्षेत्रमा हेलिकोप्टरमार्फत् बन्दोबस्तीका सामान लिएर सशस्त्र प्रहरीको टोली खटाउने तयारी गरेको सशस्त्र प्रहरी स्रोतले नेपाल लाइभलाई जानकारी दियो।

‘कालापानी क्षेत्रमा बोर्डर आउट पोस्ट (बिओपी) राख्ने तयारी पहिलेदेखि नै थियो। तर अहिले सीमा विवाद देखिएपछि तत्कालै फौज पठाउन लागिएको हो। यसको गृहकार्य भइरहेको छ,’ सशस्त्र स्रोतले भन्यो।