काठमाडौं– धनगढी प्रिमियर लिग (डिपिएल) दुई महिना पछाडि सारेको छ। माघ ५ गते हुने तय भएको डिपिएल अब चैत १७ गतेबाट हुने भएको छ।
आयोजक धनगढी क्रिकेट एकेडेमीले डिपिएलका लागि खेलाडी दर्ता आजबाट सुरु भएको जनाएको छ। डिपिएल खेल्न चाहने खेलाडीले माघ २५ सम्म आफ्नो नाम दर्ता गराइसक्नु पर्नेछ।
खेलाडी दर्तापछि डिपिएलका लागि आगामी फागुन ५ मा अक्सन गरिनेछ। अक्सनमा खेलाडीलाई तीन समूहमा विभाजन गरेर छनोट गरिनेछ। पहिलो श्रेणीमा ३ वर्षदेखि राष्ट्रिय टिममा रहेका, दोस्रो श्रेणीमा उमेर समूहबाट खेलेका खेलाडी हुनेछन्। तेस्रो श्रेणीमा राष्ट्रिय क्रिकेट खेलाडी हुनेछन्।
प्रत्येक टिममा १५ खेलाडी हुनेछन्। जसमा पहिलो श्रेणीका कम्तिमा २, दोस्रो श्रेणीका कम्तिमा ३ र तेस्रो श्रेणीका कम्तिमा ५ खेला८ हुनु पर्नेछ। एक टिमले २ विदेशी खेलाडी र धनगढीमा हुने ट्यालेन्ट हन्टबाट छानिएका १ खेलाडीलाई राख्नु पर्नेछ।
विजेतालाई २५ लाख रुपैयाँ प्रदान गरिनेछ। उपविजेतालाई १० लाख, तेस्रो हुने टिमलाई ३ लाख र चौथो टिमलाई २ लाख प्रदान गरिनेछ। अघिल्लो सिजन विजेतालाई १५ तथा उपविजेतालाई ७ लाख प्रादन गरिएको थियो। यस्तै प्रत्येक खेलको म्यान अफ दि म्याचलाई १० हजार तथा म्यान अफ दि सिरिजलाई टिभिएस अपाचे मोटरसाइकल प्रदान गरिनेछ।
अघिल्लो संस्करणमा ६ सहरका ६ टिमबीच प्रतिस्पर्धा भएको थियो। जसमा टिम चौराहा धनगढी, सीवाईसी अत्तरिया, रुपन्देही च्यालेन्जर्स, विराटनगर किङ्स, कन्चनपुर आईकोनिक र काठमाडौ गोल्डेन्सले सहभागिता जनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
