अनुगमनका लागि महिनामा सात पटकसम्म पुगेपछि वीरगञ्ज बालसुधार गृहमा तनाव

सुरक्षा/अपराध

नेपाल लाइभ मंगलबार, चैत १९, २०८१ १९:४०

पर्सा– वीरगञ्जको बालसुधार गृहमा रहेका बाल कैदीबन्दीले सुधार गृहमा खाना, बासलगायतको समस्या भएको भन्दै मंगलबार होहल्ला गर्दै तोडफोड गर्न थालेपछि स्थिति तनावग्रस्त बनेको छ ।

सुधार गृहमा बाल कैदीबन्दीहरूले होहल्ला गर्दै तोडफोड गर्न खोजेको सूचना पाए लगत्तै त्यहाँ पुगेको प्रहरीले स्थिति नियन्त्रणमा लिएको पर्साका प्रहरी प्रवक्ता किशोर लम्सालले जानकारी दिए ।

अहिले सुधार गृहभित्रै असन्तुष्ट बाल कैदीबन्दीहरूसँग पर्साका प्रमुख जिल्ला अधिकारी गणेश अर्याल, प्रहरी उपरीक्षक मिश्र, प्रहरी नायब उपरीक्षक किशोर लम्सालसहितको टोलीले छलफल गरी उनीहरूको माग सम्बोधन गर्ने आश्वासन दिएपछि स्थिति सामान्य भएको प्रवक्ता लम्सालले जानकारी दिए ।

बाल सुधार गृहमा विभिन्न कसुरमा संलग्न १२७ जना बाल कैदीबन्दीहरू छन् । तर सुधार गृहको क्षमता ५० जनासम्मको छ । बाल कैदीबन्दीहरू आक्रोशित हुनुमा सरकारी संघ संस्थादेखि, गैरसरकारी संघसंस्था धेरै आउने गरेको कारण रहेको पनि बताइएको छ ।

महिनामा अनुगमनका लागि भन्दै सातपटकसम्म टोलीहरु आउने तर सुधार भने नभएपछि बाल कैदीबन्दी आक्रोशित बनेका हुन् । समस्या समाधानका लागि पटक–पटक आश्वासन पाए पनि अहिलेसम्म समस्या समाधान नभएको भन्दै मंगलबार बाल कैदीबन्दीले होहल्ला गर्दै नाराबाजी गरेका हुन् ।

यसअघि २०८० भदौ २६ गते पनि बालसुधार गृहमा बाल कैदीबन्दीहरूबीच नै आपसमा झडप हुँदा ११ बालकैदीबन्दी र ३ जना प्रहरी घाइते भएका थिए ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

मधेशकेन्द्रित ७ दलको ‘संघीय लोकतान्त्रिक मोर्चा’ घोषणा

तीनकुनेको हिंसामा सरकारको हात छ, लाठीसमेत नभएका प्रदर्शनकारीमाथि गोली चलाइयो : राजेन्द्र लिङ्देन

कुलमान र हितेन्द्रको रिटमा सुनुवाइ सकियो, आजै आदेश आउने