काठमाडौं- नेपाली नागरिकलाई नक्कली भुटानी शरणार्थी बनाएर अमेरिका लैजाने भन्दै भएको करोडौं ठगी प्रकरणमा आफू निर्दोष रहेको दाबी गर्दै प्रतिरक्षामा उत्रिएका नेकपा एमालेका उपाध्यक्ष तथा पूर्वगृहमन्त्री रामबहादुर थापा (बादल)का छोरा प्रतीक ८ महिनादेखि फरार छन्।
भुटानी शरणार्थी प्रकरणमा संलग्न भएकोबारे मिडियामा प्रतीकको नाम सार्वजनिक भएपछि आफू निर्दोष रहेको भन्दै उनले त्यसको प्रतिवाद गरेका थिए। वैशाख २१ गते विज्ञप्ति समेत निकालेर उनले आफूमाथि लागेको आरोपको खण्डन गर्दै अनुसन्धानमा सहयोग गर्ने बताएका थिए।
‘मेरो संलग्नता नरहेको शरणार्थी प्रकरणमा पनि झुटो आरोपसहित मेरो नाम जोडिएकोप्रति खेद प्रकट गर्दै खण्डन गर्दछु। तर संवेदनशील विषय भएकाले आरोप लगाइएका विषयमा सम्बन्धित निकाय, न्यायालयप्रतिको आस्था र सम्मान स्वरुप अनुसन्धान प्रक्रियालाई इमानदारीपूर्वक सहयोग गर्ने प्रतिबद्धता व्यक्त गर्दछु,’ थापाले विज्ञप्तिमार्फत भनेका थिए।
अनुसन्धानमा सहयोग गर्छु भनेर विज्ञप्ति निकालेको ८ महिना बितिसक्दा समेत उनी फरार छन्। त्यसो त अनुसन्धानमा सहयोग गर्ने भन्दै विज्ञप्ति निकालेको बेला पनि प्रतीक ‘भूमिगत’ नै थिए।
यो ठगी गिरोहका सदस्य पक्राउ पर्न सुरु भएदेखि नै प्रतीक फरार रहेको त्यतिबेला प्रहरीले जनाएको थियो। ठगी प्रकरणमा काठमाडौं उपत्यका अपराध अनुसन्धान कार्यालयले चैत १२ गते तीन जनालाई पक्राउ गरेपछि नै प्रतीक सम्पर्कविहीन भएका थिए।
यो प्रकरणमा चैत १२ गते ३ जना पक्राउ परेपछि उनी भारत पुगेको बताइएको थियो। तर त्यसपछि उनी अहिलेसम्म कहाँ छन् भन्नेबारे अहिलेसम्म केही पत्ता लाग्न सकेको छैन। पक्राउ पूर्जी जारी भएर प्रहरीको खोजी सूचीमा रहेका उनी अहिलेसम्म फेला पर्न सकेका छैनन्। जबकि यो ठगी प्रकरणका उनी एक नाइके नै रहेको प्रहरीको दाबी छ।
प्रतीकले आमा नैनकला थापालाई समेत पैसा बुझ्न लगाएको भन्दै पक्राउ परेका अभियुक्तले प्रहरीसमक्ष बयान दिएका थिए। अहिलेसम्म फरार रहेका प्रतीक अहिले पनि भरतमै हुनसक्ने प्रहरी अधिकारीहरुको आशंका छ।
प्रतीक मात्रै होइन, यो प्रकरणमा पक्राउ पुर्जी नै जारी भएर फरार भएका अन्य व्यक्ति पनि छन्। तत्कालीन गृहमन्त्री बादलका सुरक्षा सल्लाहकार इन्द्रजित राई अहिले पनि पुर्पक्षका लागि कारागारमा छन्। उनकै छोरा निरज भने अहिलेसम्म फरार छन्।
उनको पनि अवस्था अहिलेसम्म पत्ता लाग्न सकेको छैन। थापा र राईजस्तै फरार सूची सुनसरी घर भई अमेरिका बस्दै आएका अशोक पोखरेल, मोरङका धीरेन राई, मुख्य अभियुक्त केशवप्रसाद दुलालकी श्रीमती दीपा हुमागाञी, काठमाडौंका राजेश अर्याल, पाँचथरका मोहनराज राई, काठमाडौंकै आशिष बुढाथोकी, थुनामा रहेका अर्का अभियुक्त सागर राईकी श्रीमती सावदेन लिम्बु, रौतहटका निरन्जनकुमार खरेल र झापाका सुनिल बुढाथोकी अहिलेसम्म फरार छन्।
यी सबै फरार अभियुक्त अहिले ‘पर्ख र हेर’ को अवस्थामा रहेका छन्। यो ठगी प्रकरणमा पक्राउ परेर पुर्पक्षमा रहेकाहरुले उच्च अदालत पाटनमा दायर गरेको रिटको अहिले सुनुवाइ भइरहेको छ। यदि उच्च अदालत पाटनले उनीहरुलाई साधारण तारेख तथा धरौटीमा रिहा गर्ने आदेश दिएको अवस्थामा उनीहरु अदालतमा उपस्थित हुनसक्ने बताइएको छ। ‘यसअघि जिल्ला अदालतले नै पुर्पक्षमा जेल नपठाएको फरार भएकाहरु त्यतिबेलै उपस्थित हुन्थे तर जिल्ला अदालतले पुर्पक्षमा थुनामा पठाएपछि सबै फरार नै भए। अब उच्चले जिल्लाको आदेश उल्टाउँदै साधारण तारेख तथा धरौटीमा रिहा गरेको अवस्थामा फरार भएका अभियुक्तहरु उपस्थित हुन सक्छन्,’ भुटानी प्रकरणको अनुसन्धान गरेका एक अधिकारी भन्छन्।
यो प्रकरण मुद्दाको पुनरावेदन सुनुवाइ अहिले उच्च अदालत पाटनमा भइरहेको छ। अबको केही दिनमै उच्चले यसको फैसला सुनाउनेछ। प्रतिवादीको पक्षमा फैसला आएको अवस्थामा फरार रहेका प्रतीकसहितका व्यक्ति सार्वजनिक हुन सक्छन्। यदि उच्चले पनि जिल्लाकै आदेशलाई सदर गरको अवस्थामा उनीहरु अझै फरार नै रहने प्रहरी अधिकारीहरुको बुझाइ छ।
२०७९ चैत १२ गते तीन जनालाई पक्राउ गरेर सुरु भएको अनुसन्धानले ३० जनालाई प्रतिवादी बनाउँदै मुद्दा दायर भएको थियो। ६० दिनसम्म चलेको लामो अनुसन्धानको क्रममा नेपाली कांग्रेसका प्रभावशाली नेता तथा पूर्वगृहमन्त्री समेत रहेका बालकृष्ण खाणदेखि नेकपा एमालेका सचिव तथा पूर्वउपप्रधानमन्त्री समेत भइसकेका प्रतिनिधि सभाका बहालवाला सांसद टोपबहादुर रायमाझी, नेपाल सरकारका बहालवाला सचिव टेकनारायण पाण्डेसहित हाइप्रोफाइल व्यक्ति पक्राउ परेका थिए। हाइप्रोफाइलसहित विभिन्न मितिमा १८ जनालाई पक्राउ परेर मुद्दा चलाइएको थियो।
ठगी, संगठित ठगी, राज्यविरुद्धको कसुर, लिखतसम्बन्धी कीर्ते र एकीकृतको कसुरमा जिल्ला अदालत काठमाडौंमा मुद्दा दर्ता गरिएको थियो। प्रतिवादीहरुले २८ करोड रुपैयाँ भन्दा बढी ठगी गरेको भन्दै सोही अनुसारको बिगो मागदाबी समेत गरिएको थियो।
उनीहरुमध्ये जिल्ला अदालत काठमाडौंका न्यायाधीश प्रेमराज न्यौपानेको इजलासले लक्ष्मी महर्जनलाई ५ लाख र टंक गुरुङलाई १० लाख धरौटीमा रिहा गर्न आदेश दिएको थियो। बाँकी १६ जना भने पुर्पक्षका लागि कारागार चलान भएका थिए। पछि यही केसमा फरार रहेका केशव तुलाधर पक्राउ परेर अदालत उपस्थित गराइएको थियो। असार ३१ गते माधवप्रसाद घिमिरेको इजलासले तुलाधरलाई १५ लाख धरौटीमा छाड्न आदेश दिएपछि उनी पनि रिहा भएका थिए।
धरौटीमा रिहा भएका र पुर्पक्षमा कारागार चलान भएका सबैले जिल्ला अदालत काठमाडौंको आदेशविरुद्ध उच्च अदालत पाटनमा पुनरावेदनको निवेदन दिएका थिए। उक्त निवेदनको सुनुवाइ अहिले अन्तिम चरणमा पुगेको छ। उच्च अदालतका न्यायाधीशद्वय जनक पाण्डे र प्रकाश खरेलको संयुक्त इजलासमा निरन्तर हेर्दा हेर्दैमा राखेर सुनुवाइ भइरहेको छ। अब रामशरण केसी, केशव तुलाधर सागर राईको पक्षको प्रतिरक्षा बहस हुन बाँकी छ।
उनीहरुको तर्फबाट प्रतिरक्षा बहस सकिएपछि सरकारी वकिल पक्षले थुनामै राख्नुपर्ने मागसहित वादीको पक्षबाट बहस गर्नेछन्।
सरकारी वकिल पक्षको बहस सकिए थुनामै राख्ने वा धरौटी तथा साधारण तारेखमा रिहा गर्ने भन्ने आदेश आउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
