काठमाडौं– आगामी २५ गते हुने राष्ट्रपति निर्वाचनका लागि आठ दलीय गठबन्धनमा आबद्ध दलहरुले आफ्ना सांसदहरुलाई संयुक्त रुपमा नमुना मतदान गराउने भएका छन्।
राष्ट्रपतिमा आफ्नो उम्मेदवारबाहेक अन्यत्र मत पर्ने वा बदर हुने सम्भावजनालाई अन्त्य गर्न गठबन्धनले यस्तो तयारी गरेको हो। राष्ट्रपति निर्वाचनका कारण गत पुस १० गते बनेको गठबन्धन भत्किएर ८ दलीय गठबन्धन बनेको थियो।
दलहरूले आफ्नो मतलाई बदर नगर्न र मतको दुरुपयोग हुन नदिनका लागि आगामी २४ गते नमुना मतदानको अभ्यास गराउने तयारी गरिरहेको कांग्रेसका सहमहामन्त्री एवम् प्रतिनिधि सभा सदस्य बद्री पाण्डेले जानकारी दिए।
यस्तै सत्ता गठबन्धनभित्र रहेको जसपाका नेता राजेन्द्र श्रेष्ठले राष्ट्रपतिलाई मतदान गर्ने मतदाताको सूचीमा रहेकाहरुलाई सिकाउने तयारी भइरहेको तर समय भने निश्चित भइनसकेको बताए।
नेपाली कांग्रेस, नेकपा माओवादी केन्द्र, नेकपा एकीकृत समाजवादी, नागरिक उन्मुक्ति, जनमत, जसपा, जनमोर्चा र लोसपासहित सम्मिलित ८ दलीय गठबन्धनले काठमाडौंमा बिहीबार संयुक्त अभिमुखीकरण कार्यक्रमको आयोजना गरेको छ।
कांग्रेस सहमहामन्त्री पाण्डेले भने, ‘बिहीबार आठ दलको संयु्क्त कार्यक्रम आयोजना गरिएको छ। १९ गते सातवटै प्रदेशका सांसदहरुलाई अभिमुखीकरण गरिनेछ।’ उनले प्रदेशमा जसको बहुमत छ उसैले कार्यक्रम आयोजना गर्ने जानकारी दिए। जहाँ सबै दलका शीर्ष पदाधिकारीहरुको सहभागिता रहनेछ।
यस्तै २५ गते राष्ट्रपतिको निर्वाचनका लागि मतदान गर्न आउने प्रदेश सांसदहरुलाई मतदान सिकाउनका लागि २४ गते काठमाडौंमा गठबन्धनले नमुना मतदान गराउनेछ।
दुई पूर्व सभामुखबीच रोचक प्रतिस्पर्धा
राष्ट्रपतिका लागि दुई जना पूर्व सभामुख प्रतिस्पर्धामा छन्। आठ दलीय गठबन्धनका तर्फबाट साझा उम्मेदवारका रुपमा कांग्रेसका वरिष्ठ नेता रामचन्द्र पौडेल छन् भने एमालेबाट सुवासचन्द्र नेम्वाङ छन्।
पौडेल यसअघि नै सभामुख, उप प्रधानमन्त्रीलगायत विभिन्न मन्त्रालयको मन्त्री भइसकेका छन्। २०४८को संसदीय निर्वाचनमा तनहुँ क्षेत्र नं १ बाट र २०५२ तथा २०५६ को निर्वाचनमा तनहुँ क्षेत्र नं २ बाट उनी निर्वाचित भएका थिए।
पौडेल संविधानसभा चुनाव २०६४ मा तनहुँ २ बाट निर्वाचित भएका थिए। ०६५ सालमा उनी नेपाली कांग्रेस संसदीय दलको नेता भएका थिए। २०७० मा सम्पन्न संविधान सभाको दोस्रो निर्वाचनमा उनी तनहुँ–२ बाट प्रतिनिधि सभाका लागि पाचौंपटक निर्वाचित भए।
पञ्चायत विरोधी आन्दोलनमा लागेका कारण उनले पटक–पटक गरी १४ वर्ष जेल जीवन निर्वाह गरिसकेका छन्। २०६७ सालमा भने एमालेका तत्कालीन अध्यक्ष झलनाथ खनालसँग प्रधानमन्त्रीमा पौडेलले प्रतिस्पर्धा गरेका थिए। खनालसँग प्रधानमन्त्रीको प्रतिस्पर्धामा उनी १७ पटकसम्म पराजित भएका थिए।
यता एमालेबाट राष्ट्रपतिका उम्मेदवार रहेका सुवासचन्द्र नेम्वाङ पनि बलिया दाबेदार हुन्। उनी २०४८ सालदेखि नै नेपाली राजनीतिमा सक्रिय छन्। २०४८, ०५२मा राष्ट्रिय सभाको उपाध्यक्ष बनिसकेका नेम्वाङ पटक–पटक मन्त्रीसमेत भइसकेका छन्।
०६४ र ०७० को दुवै संविधानसभामा नेम्वाङ अध्यक्ष थिए। कानुनका विज्ञका रूपमा चिनिएका नेम्वाङले कानुन विषयमा स्नातकसम्म अध्ययन गरेका छन्।
गठबन्धनको भरोसामा ढुक्क पौडेल
राष्ट्रपतिका लागि नयाँ गठबन्धन बनाउँदै आठ दलले साझा उम्मेदवारमा सहमति जनाएका कारण पौडेल ढुक्क छन्। राष्ट्रपतिको निर्वाचनका लागि प्रतिनिधि सभा सदस्य, राष्ट्रिय सभा सदस्य र प्रदेश सभा सदस्यहरुले मतदान गर्न पाउँछन्।
पौडेललाई समर्थन गरेको आठ दलीय गठबन्धनसँग ३१ हजार ९ सय १७ मतभार छ। जितका लागि न्यूनतम २६ हजार ३ सय १५ मतभार आवश्यक पर्छ। अहिले गठबन्धनसँग भएको मतभारका कारण पौडेल आफू निर्वाचित हुनेमा ढुक्क छन्।
एमालेको दौडधुप जारी
पुस १० गतेको सहमति लत्याउँदै नयाँ गठबन्धन बनाउन प्रधानमन्त्री प्रचण्ड हिँडेपछि सरकारबाट बाहिरिएको एमालेले सुवासचन्द्र नेम्वाङलाई राष्ट्रपतिको उम्मेदवार बनाएको छ। यतिबेला एमाले नेम्वाङलाई जिताउनका लागि दलहरुसँग दौडधुपमा लागेको छ।
कांग्रेस बाहेकका पार्टीहरुलाई सहयोगका लागि पत्राचार गरेको एमालेले बिहीबारदेखि उनीहरुका कार्यालयमै पुगेर सहयोग मागिरहेको छ। बिहीबार मात्रै एमालेबाटै विभाजित भएर बनेकी नेकपा एकीकृत समाजवादीको पार्टी कार्यालयमा पुगेर एमाले नेताहरुले राष्ट्रपतिमा सघाउन अपिल गरेका छन्। यस्तै बिहीबार नै राष्ट्रिय स्वतन्त्र पार्टीको कार्यालयमा पनि पुगेर एमाले नेताहरुले सहयोग मागेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
