काठमाडौं– वाणिज्य बैंकहरूको कर्जाको ब्याजदर महंगो बन्दै गएको छ। एक वर्षमा बैंकको आधार दर औसत २.७५ प्रतिशत बढेको छ। आर्थिक वर्ष २०७७/७८ को असार मसान्तदेखि २०७८/७९ को असार मसान्तसम्म आउँदा बैंकहरूको आधार दर (बेस रेट) औसतमा २.७५ प्रतिशतले बढेको हो।
आर्थिक वर्ष २०७७/७८ को असार मसान्तसम्ममा औसत ६.७४ प्रतिशत रहेको बैंकहरूको आधार दर गत आर्थिक वर्ष २०७८/७९ को असार मसान्तसम्म आउँदा ९.४९ प्रतिशत पुगेको छ। बैंकहरूको स्प्रेड दरमा वृद्धि हुँदा यसले आधार दरमा वृद्धि भएको बैंकर भुवन दाहाल बताउँछन्।
जसले गर्दा बैंकहरूको कर्जाको ब्याजदर महंगो भएको देखिन्छ। २०७७/७८ असार मसान्तसम्म औसतमा ३.६ प्रतिशत रहेको बैंकहरूको स्प्रेड दर २०७८/७९ को असार मसान्तसम्म आउँदा ०.६८ प्रतिशतले बढेर ४.२८ प्रतिशत पुगेको छ। बैंकहरूले ऋणीलाई कर्जा दिँदा आधार दरमा प्रिमियम थपेर कर्जा दिने गर्दछन्।
आधार दर भनेको बैंकले आफ्नो सम्पूर्ण खर्च जोडेर निकालिने विवरण हो। आधार दरमा बैंकको खर्च मात्र उठाउने गरिन्छ। आम्दानी गर्नका लागि बैंकले आधार दरमा प्रिमियम थपेर कर्जा लगानी गर्ने गर्दछन्। आधार दरमा जोडिएको प्रिमियमबाट बैंकले नाफा आर्जन गर्ने बैंकर दाहाल बताउँछन्।
यसैगरी, स्प्रेड दर भनेको निक्षेप र कर्जाको बिचको ब्याजदर अन्तर हो। कुनै बैंकले कर्जामा १२ प्रतिशत र निक्षेप लिँदा ८ प्रतिशत दिएको छ भने त्यसको बिचको अन्तर ४ प्रतिशत स्प्रेड दर हो। बैंकहरूको स्प्रेडदर ४.४ प्रतिशतभन्दा धेरै हुन नहुने नेपाल राष्ट्र बैंकको निर्देशन छ।
सबैभन्दा धेरै आधार दर कुमारी बैंकको
आर्थिक वर्ष २०७८/७९ को असार मसान्तसम्म ६ वाणिज्य बैंकको आधार दर १० प्रतिशतभन्दा माथि रहेको छ। २०७८/७९ को असार मसान्तसम्म सबैभन्दा धेरै बेस रेट भएको बैंक कुमारी बैंक हो। यस बैंकको आधार दर २०७८/७९ असार मसान्तसम्म १०.५७ प्रतिशत रहेको छ। बैंकको आधार दर २०७७/७८ को भन्दा २.६७ प्रतिशतले बढेको हो। २०७७/७८ असार मसान्तसम्म बैंकको आधार दर ७.९ प्रतिशत थियो।
२०७८/७९ को असार मसान्तसम्म सिभिल बैंकको आधार दर १०.४६ प्रतिशत रहेको छ। यसैगरी, सेन्चुरी बैंकको आधार दर १०.२३ प्रतिशत रहेको छ। सिटिजन्स बैंकको १०.०९ प्रतिशत, सनराइज बैंकको १०.०१ प्रतिशत र मेगा बैंकको आधार दर १०.०१ प्रतिशत रहेको छ।
२०७८/७९ को असार मसान्तसम्म १४ वटा बैंकको आधार दर ९ प्रतिशतभन्दा माथि रहेको छ। लक्ष्मी बैंकको ९.९९ प्रतिशत, प्राइम बैंकको ९.९९ प्रतिशत, हिमालयन बैंकको ९.८८ प्रतिशत, माछापुच्छ्रे बैंकको आधार दर ९.८६ प्रतिशत र बैंक अफ काठमाडौंको आधार दर ९.८३ प्रतिशत रहेको छ।
२०७८/७९ को असार मसान्तसम्म सानिमा बैंकको आधार दर ९.७१ प्रतिशत, नेपाल एसबीआई बैंकको आधार दर ९.६१ प्रतिशत र सिद्धार्थ बैंकको ९.४५ प्रतिशत रहेको छ। यसैगरी, ग्लोबल आईएमई बैंकको ९.४ प्रतिशत, एनएमबी बैंकको ९.३८ प्रतिशत, एनआईसी एसिया बैंकको ९.२५ प्रतिशत र प्रभु बैंकको आधार दर ९.२४ प्रतिशत रहेको छ।
आव २०७८/७९ को असार मसान्तसम्म आउँदा पाँच बैंकको आधार दर ८ प्रतिशतभन्दा माथि रहेको छ। कृषि विकास बैंकको ८.९ प्रतिशत, एभरेष्ट बैंकको ८.८२ प्रतिशत, स्ट्याण्डर्ड चार्टर्ड बैंकको ८.८१ प्रतिशत, नेपाल इन्भेष्टमेन्ट बैंकको ८.५४ प्रतिशत र नबिल बैंकको ८.७७ प्रतिशत आधार दर रहेको छ।
कुन बैंकको स्प्रेड दर कति?
आर्थिक वर्ष २०७८/७९ को असार मसान्तसम्म बैंकहरूको निक्षेप र कर्जाको बीचको ब्याजदर अन्तर (स्प्रेड दर) औसत ४.२८ प्रतिशत रहेको छ।
यस अवधिसम्म २२ वटा बैंकको स्प्रेड दर ४ प्रतिशतभन्दा माथि रहेको बैंकहरूले सार्वजनिक गरेको वित्तीय विवरणमा उल्लेख छ। बाँकी चार बैंकको स्प्रेड दर ३ प्रतिशतभन्दा माथि रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
