काठमाडौं–गुण्डा नाइके समीरमानसिंह बस्नेतलाई भेट्न केन्द्रीय कारागार पुगेको आरोप लागेका प्रहरी वृत्त स्वयम्भूका डीएसपी मिलन केसीले गम्भीर लापरबाही गरेको छानबिन समितिले निस्कर्ष निकालेको छ।
जिल्ला प्रहरी परिसर काठमाडौंका एसपी दिनेशराज मैनाली नेतृत्वको तीन सदस्यीय समितिले बुझाएको प्रतिवेदनमा डीएसपी केसीको गम्भीर लापरबाही औंल्याइएको काठमाडौं परिसरका एसएसपी सुदीप गिरीले बताए।
डीएसपी केसी कुनै आपराधिक मनसायले कारागार गएको नदेखिएको तर लापरबाही भने गम्भीर देखिएको एसएसपी गिरीको भनाइ छ।
आफ्नो क्षेत्राधिकारभन्दा बाहिर गएर जेलमा रहेका गुण्डा नाइकेलाई भेट गर्ने वातावरण मिलाउनु नै डीएसपी केसीको गम्भीर लापरबाही रहेको समितिको निष्कर्ष छ।
जिल्ला प्रहरी परिसर काठमाडौंका एसपी दिनेशराज मैनाली नेतृत्वको तीन सदस्यीय छानबिन समितिले डीएसपी केसीलाई विभागीय कारबाहीका लागि सिफारिस गरेको हो। छानबिन सकेर बुझाएको प्रतिवेदनमा विभागीय कारबाहीका लागि सिफारिस गरिएको पाइएको काठमाडौंका एसएसपी गिरीले बताए।
कारागारमा पुगेर डीएसपी केसी आफैंले गुण्डा नाइके बस्नेतलाई नभेटेको तर अन्य व्यक्तिलाई भेटका लागि सहजीकरण गरेको छानबिन समितिकाे ठहर छ। आफ्नो क्षेत्रभन्दा बाहिर गएर भेट गर्दा माथिल्लो निकायलाई जानकारी गराउनु पर्नेमा विना जानकारी कारागार पुगेको पनि समितिले औंल्याएको छ।
गलत मनसायले आफैंले भेट गरेको भन्दा पनि पदीय दुरुपयोग गरेर विवादास्पद पृष्ठभूमिका व्यक्तिलाई भेटका लागि सहजीकरण गरिदिएको समितिले निस्कर्ष निकालेको छ।
जेठ २९ गते केसी अर्का विवादास्पद पात्र अमृत केसीलाई लिएर बस्नेतलाई भेट्न कारागार पुगेको खुलेको थियो।
बस्नेत २०७४ असोजमा निर्माण व्यवसायी महासंघका अध्यक्ष शरदकुमार गौचनलाई बानेश्वरमा गोली हानी हत्या गरकोे आरोपमा पुर्पक्षका लागि कारागारमा छन्। साढे २ करोड रुपैयाँ कमिसन नदिएपछि गौचनको हत्या भएको खुलेको थियो।
कारागारमा रहँदासमेत बस्नेतले आपराधिक गतिविधि सञ्चालन गरेको आरोपसमेत लाग्दै आएको थियो। केही समयअघि तत्कालीन गृहमन्त्री रामबहादुर थापाका सहोदर भाइलाई समेत प्रयोग गरेर बस्नेतले जेलभित्रबाटै आपराधिक धन्दा सञ्चालन गरेको आरोप लागेको थियो।
त्यसपछि केन्द्रीय अनुसन्धान ब्यूरो सिआइबीले गृहमन्त्री थापाका भाइ नरेश थापासहित ८ जनालाई समेत पक्राउ गरेर आपराधिक लाभको कसुरमा मुद्दा चलाएको थियो।
दुई डीएसपीको देखिएन कैफियत
केन्द्रीय कारागारको सुरक्षामा डीएसपी नवीनकिशोर प्रधानको कमाण्डमा टोली खटिएको छ। स्वयम्भू वृत्तका डीएसपी केसी र जनसेवा वृत्तका डीएसपी शालिकराम शर्मा समेतले केन्द्रीय कारागार पुगेर भेटघाट गरेको बताइएको थियो।
यस विषयमा समेत छानबिन गर्दा समितिले डीएसपी प्रधान र शर्माको भने कुनै कैफियत नदेखिएको पाइएको जनाएकाे छ। कारागारमा खटिएका डीएसपी प्रधान र केसी ब्याचमेट भएकाले तेस्रो व्यक्तिले जेलमा रहेका गुण्डा नाइके बस्नेतलाई भेट गर्न खोजेपछि केसीले सहजीकरण मात्रै गरिदिएको औंल्याइएको छ।
‘प्रधान र केसी ब्याचमेट हुन् र तेस्रो व्यक्तिले गुण्डा नाइकेलाई भेट गर्न खोजेपछि केसीले सामान्य रुपमा लिँदै मेरै साथी छ म भेट गराइदिइहाल्छु भनेर भेट गर्ने वातावरण मात्रै मिलाइएको देखियो’ एसएपी गिरीले भने, ‘यस्तो भेटलाई स्वयम्भूका डीएसपीले हल्का रुपमा लिएको देखियो। यो उहाँको गम्भीर लापरबाही हो।’
आपराधिक व्यक्तिसँग कसैले किन भेट गर्न खोज्दैछ? आफ्नो क्षेत्रभन्दा बाहिर रहेको ठाउँमा भेटका लागि किन सहजीकरण गर्ने जस्ता विषयलाई गम्भीर रुपमा नलिई भेट गर्ने वातावरण मिलाई दिने केसीको गल्ती रहेको औंल्याइएको छ।
प्रधान भने आफ्नो कार्यक्षेत्रमै रहेको र गुण्डा नाइकेसँग कुनै भेट नगरेकाले उनको कमजोरी नदेखिएको बताइएको छ । यता डीएसपी शर्मा पनि फोन गरेर चिया खान बोलाएपछि चिया पिएर मात्रै फर्किएकाले उनको पनि कमजोरी नदेखिएको एसएसपी गिरीले बताए।
कुख्यात अपराधीलाई भेट्दा भिडियो रेकर्डिङ गर्नुपर्ने सुझाव
एसपी मैनाली नेतृत्वको छानबिन समितिले अबदेखि यस्तो गल्ती नदोहोरिनका लागि भन्दै चार बुँदे सुझावसमेत दिएको छ।
गम्भीर, जघन्य तथा संवेदनशील अपराधमा कैद भुक्तान गरिरहेका कैदीलाई भेटघाट गर्नुपर्दा आफ्नो नजिकको नातेदार (बुबा, आमा, श्रीमती र सन्तान) बाहेक अन्यलाई भेटघाट गर्न बन्देज लगाउनु पर्ने समितिले उल्लेख गरेको छ।
भेटघाट गर्दा पनि तोकिएको निकायबाट खटिएका प्रहरी कर्मचारीको अनिवार्य उपस्थिति हुनुपर्ने सुझाव दिइएको छ।
तेस्रो बुँदामा अनुसन्धानको प्रयोजनबाहेक अन्य अवस्थामा सम्बन्धित कारागारबाहिरका प्रहरीलाई समेत भेटघाट गर्न बन्द लगाउनुपर्ने सुझाव प्रतिवेदनमा उल्लेख गरिएको एसएसपी गिरीले बताए ।
यसरी भेटघाट गर्दा भेटघाटको समयमा भएका कुराकानीलाई भिडियो रेकर्डिङ गर्नुपर्ने औल्याइएको छ ।
.
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
-1749367495.jpg)
