काठमाडौं- नेपाल स्टक एक्सचेञ्ज (नेप्से)मा सूचीकृत भइ सेयर कारोबार भइरहेका लघुवित्त कम्पनी ५१ वटा छन्। ती कम्पनीले चालु आर्थिक वर्षको आफ्नो वित्तीय विवरण सार्वजनिक गरिसकेका छन्।
चालु आवको पहिलो त्रैमाससम्म ५१ मध्ये ४१ वटा लघुवित्त कम्पनीले आफ्नो नाफा गत आर्थिक वर्षको यसै अवधिको तुलनामा बढाएका छन्। बाँकी आठ कम्पनीको नाफा घटेको छ भने दुई कम्पनी ऋणात्मक अवस्थामा रहेका छन्।
चालु आर्थिक वर्षको पहिलो त्रैमाससम्म आरएमडीसी लघुवित्त वित्तीय संस्थाले सबैभन्दा धेरै नाफा कमाएको छ। उक्त कम्पनीले पहिलो त्रैमासमा २६ करोड २४ लाख २२ हजार रूपैयाँ नाफा कमाएको छ। कम्पनीले यस वर्ष गत आर्थिक वर्षको सोही अवधिमा भन्दा ३३३.१६ प्रतिशतले नाफा बढाएको वित्तीय विवरण सार्वजनिक गरेको हो। गत आर्थिक वर्षको यसै अवधिमा आरएमडीसीको खुद नाफा छ करोड पाँच लाख ८३ हजार रुपैयाँ थियो।
यसैगरी, चालु आवको पहिलो त्रैमासमा धेरै नाफा कमाउनेमा दोस्रो बनेको छ छिमेक लघुवित्त। यस कम्पनीको नाफा पहिलो त्रैमासम्म २१ करोड ४१ लाख छ हजार रुपैयाँ रहेको छ। कम्पनीको नाफा गत वर्षको यसै अवधिको भन्दा २३१.५४ प्रतिशतले बढेको हो। गत आर्थिक वर्षको पहिलो त्रैमासमा कम्पनीको नाफा छ करोड ४५ लाख ८० हजार रुपैयाँ मात्र थियो।
समिट लघुवित्त वित्तीय संस्थाले सबैभन्दा धेरै प्रतिशतले नाफा बढाएको छ। उक्त लघुवित्तले चालु आवको पहिलो त्रैमासमा गत आवको सोही अवधिको तुलनामा १४०८५.९२ प्रतिशतले नाफा बढाएको हो। गत आर्थिक वर्षको पहिलो तीन महिनामा दुई लाख ६६ हजार रुपैयाँ नाफा आर्जन गरेको समिटले चालु आवको सोही अवधिमा नाफा तीन करोड ९२ लाख ९५ हजार रुपैयाँ पुर्याएको कम्पनीद्वारा सार्वजनिक वित्तीय विवरणमा उल्लेख छ।
कुन लघुवित्तको नाफा कति?
लघुवित्त कम्पनीहरूको पछिल्ला दुई आर्थिक वर्षको पहिलो त्रैमास (साउन-असोज)मा कमाएका नाफा (रु. हजारमा)
नाडेवको नाफामा सबैभन्दा धेरै गिरावट
चालु आर्थिक वर्षको पहिलो त्रैमाससम्ममा नाडेव लघुवित्त वित्तीय संस्थाको खुद नाफा सबैभन्दा धेरै घटेको छ। यस संस्थाको नाफा यस त्रैमाससम्म आउँदा ७९.३८ प्रतिशतले घटेको छ। गत आर्थिक वर्षको पहिलो त्रैमासमा चार करोड ५६ लाख ३१ हजार रुपैयाँ नाफा कमाएको कम्पनीले यस वर्षको सोही अवधिमा ९४ लाख ११ हजार रुपैयाँ मात्र नाफा कमाएको हो।
यस्तै, चालु आवको पहिलो त्रैमाससम्म सपोर्ट लघुवित्तको नाफा पनि ६९.९५ प्रतिशतले घटेर १३ लाख ७७ हजार रुपैयाँमा सीमित भएको छ। गत आर्थिक वर्षको सोही अवधिमा उक्त कम्पनीले ४५ लाख ४२ हजार रुपैयाँ नाफा कमाएको थियो।
चालु आवको पहिलो त्रैमाससम्म आरएसडीसी लघुवित्त र किसान लघुवित्तको नाफा क्रमशः ४७.९० प्रतिशत र ३५.४९ प्रतिशतले घटेको छ। यस अवधिमा नयाँ सारथी लघुवित्तको नाफामा पनि गिरावट आएको छ। यस कम्पनीको नाफा चालु आवको पहिलो त्रैमासमा २.९३ प्रतिशतले घटेको छ।
यही अवधिमा डिप्रोस लघुवित्त वित्तीय संस्थाको खुद नाफा १२.३७ प्रतिशतले घटेर १७ करोड ३५ लाख ८७ हजार रुपैयाँमा सीमित भएको छ। गत आर्थिक वर्षको यसै अवधिमा कम्पनीको नाफा १९ करोड ८० लाख ९३ हजार रुपैयाँ थियो।
यस्तै, चालु आर्थिक वर्षको पहिलो त्रैमासम्म फरवार्ड कम्युनिटी लघुवित्त वित्तीय संस्थाको खुद नाफामा पनि गिरावट आएको छ। यस वर्षको पहिलो त्रैमासम्म यस कम्पनीको नाफा ६.१५ प्रतिशतले ओरालो लागेको छ। चालु आर्थिक वर्षको पहिलो त्रैमासम्म फर्स्ट माइक्रोफाइनान्स कम्पनीको नाफामा पनि गिरावट आाएको छ। यस कम्पनीको नाफा यस अवधिसम्म आउँदा ०.२३ अंकले घटेको छ। चालु आर्थिक वर्षको पहिलो त्रैमाससम्म नेप्सेमा सूचीकृत आठ लघुवित्त कम्पनीको नाफा घटेको छ।
ऋणात्मक लघुवित्त
चालु आवको यस अवधिसम्म दुई लघुवित्त कम्पनी ऋणात्मक अवस्थामा छन्। घोडाघोडी लघुवित्त सात लाख ५० हजार रुपैयाँ ऋणमा छ। यस्तै, नेपाल सेवा लघुवित्त आठ लाख ४५ हजार रुपैयाँले ऋणात्मक रहेको छ। गत आर्थिक वर्षको यसै अवधिमा घोडाघोडी लघुवित्तले पाँच लाख ५८ हजार रुपैयाँ र नेपाल सेवा लघुवित्त कम्पनीले १६ लाख ७७ हजार रुपैयाँ नाफा कमाएका थिए। यस वर्ष भने कम्पनीको खुद नाफा ऋणात्मक बन्न पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
