काठमाडौं– हत्या भएको तीन महिना बितिसक्दा समेत ५९ वर्षीय भारतीय नागरिक सत्यनारायण पारिख हत्याको गुत्थी प्रहरीले फुकाउन सकेको छैन।
सानेपास्थित गुसिटोल बस्ने पारिखको हत्या अनुसन्धानका क्रममा तीन महिनासम्म दर्जनौसँग सोधपुछदेखि नियन्त्रणमा लिएर अनुसन्धान गर्दा समेत कुनै ‘क्लू’ प्रहरीले फेला पार्न सकेको छैन। विभिन्न प्राविधिक पाटो, म्यानुअल अनुसन्धान गर्दा पनि हत्याको निचोडर्फत प्रहरी पुग्न सकेको छैन।
पारिख हत्यालाई नजिकबाट नियालेका महानगरीय प्रहरी अपराध महाशाखाका एसएसपी चन्द्रकुवेर खापुङ भन्छन्, ‘पारिखको हत्या जेरिझैं जेलिएको छ। विभिन्न कोणबाट अनुसन्धान गर्दा सुरुवाती क्रममा निकै आशावादी भएपनि अन्तिममा प्रगति भने जहाँको त्यहीँ हुन्छ।’
सानेपास्थित गुसिटोल तीनतले घर भाडामा लिएर बसेका पारिखकोमा काम गर्न दुई महिला घरमा नियमित आउँथे। दुई दिनसम्म उनको घरमा ताला लागेपछि प्रहरीले २० असारमा ताला तोडेर घरभित्र पस्दा उनी मृत भेटिएका थिए।
प्रहरीले उनको हत्या नै भएको ठहर गरे पनि तीन महिना बितिसक्दा समेत अभियुक्त पहिचान नै गर्न सकेको छैन। हत्याको अनुसन्धान महानगरीय प्रहरी परिसर ललितपुर र महाशाखाले तीन महिनासम्म गरेपनि टुंगोमा पु¥याउन नसकेपछि केन्द्रीय अनुसन्धान ब्यूरो सीआईबीले पनि अनुसन्धान सुरु गरेको छ। सीआईबीका डीआईजी धीरजप्रताप सिंह भने अनुसन्धान सकारात्मक दिशामा अघि बढेको दाबी गर्छन्।
हत्यामा संलग्न भएको हुनसक्ने व्यक्ति सिसी टिभी फुटेजमा समेत कैद भएको देखिएको छ। उक्त फुटेजमार्फत् पनि विभिन्न कोणबाट अनुसन्धान अघि बढाइएको डीआईजी सिंह बताउँछन्।
न्यूरोडको एट्लान्टिक कम्युटर प्रालिमा सेल्सम्यानको रुपमा काम गर्ने सत्यनारायणले आफ्नो घरमा काम गर्न दुई महिला राखेका थिए। उनीहरूलाई परिसर ललितपुर र महाशाखाले सोधपुछ समेत गरेर छाडेका थिए। अहिले फेरि सीआईबीले उनीहरूमाथि पनि अनुसन्धान अघि बढाएको छ।
सत्यनारायण १८ असारसम्म काम गर्न आउने महिलाको फोन सम्पर्कमा रहनु, शनिबार काम गर्न नभ्याउने बताउनु र सोही रात उनको हत्या हुनु जस्ता कारणले महिला अझै शंकाको घेरामा छन्।
सिंगो घर नै भाडामा लिएका सत्यरानायण दोस्रो तलामा सुत्ने गर्थे। भान्छा पनि दोस्रो तलामै थियो। सबैभन्दा माथिल्लो तलामा उनले कार्यालयका सामान राख्थे। पहिलो तला भने खाली थियो।
मुख्य गेट र ढोका बन्द थियो। तर, झ्यालको जाली काटिएको थियो। ग्रिल बिनाको झ्याल खुल्लै थियो। लामखुट्टे छेक्न जाली लगाइएको हुनाले त्यसलाई काटेर कोही भित्र प्रवेश गरेजस्तो देखिएको प्रहरी अधिकारी बताउँछन्।
पारिख घोप्टो अवस्थामा पलङमाथि मृत भेटिएका थिए। वर्ष दिनअघि दुर्घटनामा परेका कारण खुट्टामा लगाइएको ‘ब्याण्डेज’ समेत फुकालिएको थिएन। शरीरको माथिल्लो भागमा रगतका टाटा थिए। सत्यनारायणका दुई वटा मोबाइल थिए। एउटा अलिअलि फुटेको र अको टुक्रा–टुक्रा अवस्थामा प्रहरीले फेला परेको थियो।
सीसीटीभी फुटेजको हुलियाबाट दर्जनौं नियन्त्रणमा
पारिखकको हत्या भएपछि प्रहरीले वरपरका सीसीटीभी फुटेज पनि नियालेको थियो। सो क्रममा सिसी टिभी क्यामेराको फुटेजमा दुई वटा मोटरसाइकलमा चार जना सत्यनारायण बस्ने घरसम्म पुगेको दृश्य कैद भएको थियो।
तर, उनीहरू घरैभित्र छिरे/नछिरेको दृश्य भने फुटेजमा कैद छैन। सीसीटीभी फुटेजमा सत्यनारायण बस्ने घरअगाडि दुई वटा मोटरसाइकल रोकर अघि बढेकोसम्म देखिएको तर घरभित्र प्रवेश गरेको भने देखिँदैन। यसरी राति करिब १० बजेतिर उनीहरू पहिलो पटक पारिख बस्ने घर अघि पुगेर फर्किन्छन्। दोस्रो पटक करिब ११ बजेपछि त्यही हुलिया भएको मान्छे फेरि त्यसैगरी पारिखकको घर अघि पुगेर मोटरसाइकल रोकेर अघि बढ्छन्।
सीसीटीभीमा उक्त दृश्य देखिए पनि राति भएकाले प्रष्ट नहुनु, मोटरसाइकलको नम्बर समेत नखुल्नुले अनुसन्धानमा अफ्ठ्यारो भएको महानगरीय प्रहरी अपराध महाशाखाका एसएसपी खापुङ बताउँछन्।
त्यसपछि सीसीटीभी फुटेजमा देखिएको उक्त हुलियासँग मेल खाने खालका मान्छेमाथि निगरानी राखेर अनुसन्धान गर्दा समेत केही तथ्य फेला नपरेको एसएसपी खापुङले बताए।
‘हामीले फुटेजमा देखिएको हुलियासँग मिले खाने दर्जनौं मान्छे नियन्त्रणमा लिएर पनि सोधपुछ ग¥यौं। तर, केही नयाँ तथ्य खुल्न सकेन’, उनले भने।
प्रहरले उक्त हुलियासँग मेल खाने, आपराधिक पृष्ठभूमिका भएका, पटके चोरदेखि लागूऔषध कारोबारीसम्म गरी करिब ५० भन्दा बढीलाई पटक पटक गरी नियन्त्रणमा लिएर अनुसन्धान गरे पनि पारिखकको हत्या अनुसन्धान भने जहाँको त्यहीँ छ।
रुद्राक्ष व्यापारीसम्म नियन्त्रणमा, उपलब्धी शून्य
अनुसन्धानका क्रममा पारिखसँग एकमुख रुद्राक्ष भएको भन्ने विषय प्रहरीको कानमा परेको थियो। बहुमूल्य भनिएको उक्त रुद्राक्ष लुटपाट गर्नका लागि पारिखको हत्या गरिएको हुनसक्ने अनुमान गर्दै प्रहरीले त्यसतर्फ पनि अनुसन्धान गरेको थियो।
सो क्रममा रुद्राक्ष देख्ने भनिएका व्यक्तिदेखि रुद्राक्षसम्बन्धी कारोबार गर्नेसम्मलाई प्रहरीले नियन्त्रणमा लिएर सोधपुछ गरेको थियो। त्यो पाटोबाट अनुसन्धान गर्दा पनि केही उपलब्धी हात पार्न प्रहरीले सकेन।
‘एकमुखे रुद्राक्ष थियो भन्ने हामीले सुनेपछि रुद्राक्ष व्यापारीदेखि रुद्राक्ष देख्नेसम्मलाई नियन्त्रणमा लिएर हामीले सोधपुछ गर्यौं। तर, त्यसबाट पनि केही खुल्न सकेन’ एसएसपी खापुङले सुनाए।
गौलोचन भन्ने वस्तु पारिखसँग रहेको भन्ने सुनेपछि प्रहरीले त्यसमाथि पनि अनुसन्धान गरेको थियो। त्यसबाट अनुसन्धानका लागि प्रहरीले कुनै रोडम्याप फेला सकेन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
