काठमाडौं– केही समय अगाडिको जस्तै मूल्य सोचेर डेल आइ थ्री ल्यापटप किन्न थानकोटदेखि न्यूरोड पुगेका विकाश डंगोलले न्यूरोडका धेरै पसल चहारे।
‘पहिले ३५ हजारसम्म आउँथ्यो। अहिले त ५३ हजार पो भन्छ। त्यो पनि सामान छैन लगे लैजानुस् नलगे दाममा एक रुपैयाँ पनि छुट हुँदैन भन्छ,’ उनले सुनाए।
जीबराज पौडेल बुटवलमा सफ्वेयर डिजाइन कम्पनी खोल्नका लागि राम्रो गुणस्तरका ल्यापटपको खोजिमा न्यूरोड तिर भौँतारिइरहेका थिए। न्यूरोडका अधिकांश पसल चहार्दा पनि उनले खोजेजस्ता ल्यापटप फेला पारेनन्।
‘पुतलीसडकका सबै कम्प्युटर पसल डुल्दा पनि खोजेजस्तो ल्यापटपहरु पाइएन। ठिकै खालका ल्यापटपको मूल्य पनि पहिलेभन्दा झण्डै आधा महंगो भएको रहेछ,’ उनले सुनाए।
अहिले बजारमा राम्रो कम्पनीका ल्यापटपको अभाव छ। खोजेजस्तो ल्यापटप पनि छैन। अत्यन्त खाँचो परेपछि ग्राहकहरुले महंगो मूल्य तिरेर गुणस्तरहीन ल्यापटप पनि किन्न बाध्य छन्।
‘खोजेको नपाएपछि पसलेले जुन राम्रो भन्यो त्यही उठाउने हिँड्ने गर्नुको विकल्प छैन। त्यही पनि चर्को मूल्यमा,’ जीबराज पौलेलले थपे।
न्यूरोडस्थित ताम्राकार कम्प्लेक्सका ल्यापटप व्यापारी राजेशसिंह ठकुरी ल्यापटपको मागअनुसार आपूर्ति नभएकाले डिस्प्लेकै लागि समेत ल्यापटपको अभाव भएको बताउँछन्।
उनको पसल खालीजस्तै भइसकेको छ। मोबाइलमा भएको पसलको पुरानो फोटो देखाउँदै उनले भने, ‘हेर्नुस् पहिले मेरो पसलमा यतिका धेरै ल्यापटप थिए। हिजोआज हेर्नुस् त मेरो पसलमा बिक्री हुने एचपी र डेलको ल्यापटपकै अभाव छ।’
लकडाउन खुकुलो भएर व्यापार सुरु हुँदाको बेलादेखि ल्यापटपको व्यापार बढेको छ। यतिबेला त्यो बेलाको जस्तो व्यापार छैन तर सामानको अभावमा आएका ग्राहकलाई पनि रित्तै फर्काउनुपर्ने अवस्था छ।
‘आजभोलि सामान छैन। सामान मगाउँदा पनि बाटो खर्च नै महंगो छ। एउटा ल्यापटपमा अहिले १२ देखि १५ हजारसम्म मूल्य बढेको छ,’ उनले भने, ‘अहिले मूल्य बढेसँगै नक्कली सामान ल्याएर कम मूल्यमा बेचेजस्तो देखाउने प्रवृत्ति पनि बढेको छ।’
न्यूरोडकै अर्का ल्यापटप व्यापारी राम कार्की कोरोना महामारीका कारण सबैतिर खर्च बढेकाले ल्यापटपको मूल्य बढेको बताउँछन्।
‘ल्यापटपको मूल्य हामीले मात्रै बढाएको होइन। बाटो खर्च बढेको छ। अहिले सामान ल्याउन सकिएको छैन। थोरै ल्याएको पनि महंगो पर्छ,’ उनले भने।
लकडाउनको समयमा निकै बढेको ल्यापटपको व्यापार केही समययता फेरि खस्किएको व्यापारीहरु बताउँछन्। लकडाउनमा भर्चुअल माध्यमबाट अध्ययन, अध्यापन तथा अन्य प्रयोजनका लागि समेत ल्यापटपको माग बढेको थियो। अहिले केही समय यता ग्राहकले खोजेको सामान समेत ल्याउन नसक्दा दिनभरी पसल कुरेर बस्नुपर्ने अबस्था सिर्जना हुने बिक्रेताहरु बताउँछन्। घर तथा कार्यालयको प्रयोजनका लागि समेत ल्यापटपको व्यापार निकै फस्टाएको थियो।
बढ्यो कालोबजारी
बजारमा ल्यापटपको अभाव भएको मौकामा पछिल्लो समय कालोबजारी बढ्न थालेको पाइएको छ। व्यापारीहरुका अनुसार एउटा ल्यापटपमा ७ हजारदेखि १५ हजारसम्म मूल्य वृद्धि भएको छ। कतिपय व्यापारीहरुले त भएको सामान पनि लुकाउने र महंगी सिर्जना गर्ने गरेको पाइएको छ।
त्यस्तै पहिले ल्याएर स्टक रहेका सामानमा पनि कोरोना महामारीका कारण मूल्य बढेको भन्दै व्यापारीहरुले ल्यापटप महंगोमा बिक्री गर्न थालेका छन्।
यहि मौकामा कतिपय व्यापारीहरुले कमगुणस्तरका सामान बिक्री गरेर ग्राहकहरुलाई झुक्याउने समेत गरेको पाइएको छ। नियमनको अभावमा यस्ता विकृतिहरु बढ्दै गएका छन्।
बजारमा ल्यापटपको माग बढ्दै गएको र मागअनुसार आपूर्ति हुन नसक्दा मूल्य चर्किएको हुन सक्ने कम्प्युटर एशोसिएसन नेपाल (क्यान) का अध्यक्ष नवराज कुँवर बताउँछन्।
अध्यक्ष कुँवरका अनुसार पछिल्लो समय ल्यापटप आपूर्ति गर्दा लाग्ने ढुवानी शूल्क समेत बढेको छ जसले गर्दा पनि ल्यापटपको मूल्य बढेको छ । ल्यापटप किन्दा ग्राहक पनि सचेत हुनुपर्ने उनको बुझाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
-1749801778.jpg)
-1749797959.png)
-1749826086.png)
