प्रचण्डलाई ओलीको प्रस्ताव- मंसिरमा महाधिवेशन गरौं, तपाईँ अध्यक्ष बन्नुस्

राजनीति

वीरेन्द्र ओली शनिबार, साउन ३, २०७७ २२:०४

फाइल तस्बिर

काठमाडौँ- सत्तारुढ दल नेकपाभित्रको विवाद पेचिलो बनिरहेका बेला अध्यक्ष तथा प्रधानमन्त्री केपी ओलीले अर्का अध्यक्ष पुष्पकमल दाहाल ‘प्रचण्ड’समक्ष मंसीरमा महाधिवेशन गरेर एकीकृत दलको अध्यक्ष बन्न आग्रह गरेका छन्। प्रधानमन्त्री ओलीको यस्तो प्रस्तावप्रति अध्यक्ष प्रचण्ड मौन छन्।

प्रधानमन्त्री निवास बालुवाटारमा शनिबार बसेको सचिवालय बैठकमा प्रधानमन्त्री ओलीले अर्का अध्यक्ष प्रचण्डलाई मंसिरमा महाधिवेशन गरी एकीकृत पार्टीको अध्यक्ष बन्न प्रस्ताव गरेपछि वरिष्ठ नेता माधव नेपालले यसप्रति असन्तुष्टि व्यक्त गरेका छन्।

नेता नेपालले ‘दलको एकता प्रक्रिया अझै नटुंगिएकाले मंसिरमा महाधिवेशन अनुकूल नहुने’ बताएका थिए। स्रोतका अनुसार उनले ओलीको प्रस्तावप्रति बैठकमा बोल्दै भनेका थिए, ‘दुई अध्यक्षको नेतृत्वको व्यवस्थापनको कुरा मात्र महत्वपूर्ण होइन। दललाई विधि र प्रक्रियामा लैजाने कुरा महत्वपूर्ण हो।’

अध्यक्ष प्रचण्डसहित वरिष्ठ नेता झलनाथ खनाल, माधव नेपाललगायत बहुमत सचिवालय सदस्यले ओलीलाई दुवै पदबाट राजीनामा मागरेपछि मंसिरमा माहाधिवेसन गर्ने प्रस्ताव अघि सारेका हुन्।

‘आजको सचिवालय बैठकमा अध्यक्ष प्रचण्ड कमरेडले प्रधानमन्त्री ओलीको राजीनामाको विषय उठानुभएन। जनादेशको सम्मान गर्दै नयाँ सहमति गरेर जानुपर्छ भन्ने कुरा गर्नुभयो,’ सचिवालय एक सदस्यले भने, ‘उल्टै प्रधानमन्त्रीज्यूले प्रचण्ड कमरेडलाई मंसिरमा महाधिवेसन गरौँ। तपाईं पार्टी अध्यक्ष हुनुस् भनेर भन्नुभयो। प्रचण्ड कमरेड मुसुमुसु हाँस्नु भयो केही बोल्नु भएन।’

तर, पार्टी महासचिव विष्णु पौडेलले मंसिरमा महाधिवेसन गर्ने प्रस्ताव दुई अध्यक्षकै भएको दाबी गरे। ‘प्रधानमन्त्रीज्यूले मात्रै मंसिरमा महाधिवेसन गरौँ भन्नु भएको होइन’ पौडेलले भने, ‘मंसिरमा महाधिवेसन गरेर नेतृत्व हस्तान्तर गरौ भनेर दुवै अध्यक्षले प्रस्ताव भन्नुभएको हो।’

प्रधानमन्त्री ओलीको यस्तो प्रस्तावलाई प्रचण्ड पक्षले छलफल गरिरहेको बताइएको छ। यद्यपि, उनीनिकट कतिपय नेताले प्रस्तावलाई सकारात्मक रुपमा लिएका छन्।