भैरहवा- काठ तस्करीमा प्रयोग हुने तीन मोटरसाइकलसहित अवैध सालका गोलिया रुपन्देही प्रहरीले बरामद गरिएको छ। रुपन्देहीको कञ्चन गाउँपालिकास्थित जगेडी बजारबार शुक्रबार राती करिब २ बजेको ३ वटा मोटरसाइकलमा दुईवटा सालका गोलिया तस्करी गरिरहेको अवस्थामा सशस्त्र प्रहरी बल लोण्डिहवा बेसक्याम्पको नियमित गस्ती टोलीले बरामद गरेको हो।
सशस्त्र प्रहरी बल लोण्डिहवा बेसक्याम्पका प्रहरी निरीक्षक गंगा बहादुर कार्कीका अनुसार शसस्त्र प्रहरी बल लोण्डिहवाको नियमित गस्ती टोलीले गजेडी बजारमा नियमित गस्ती गरिरहेको अवस्थामा ३ जना मोटरसाइकलमा सालका अवैध काठहरु ल्याउदै गरेको र सुरक्षाकर्मीलाई देख्नासाथ उनीहरु मोटरसाइकल र अवैध काठ छोडेर भागेका थिए।
तस्करहरुले कञ्चनको साविक रुद्रपुरका सामुदायिक वनहरुबाट अवैध रुपमा काटेर ल्याएको हुन सक्ने भन्दै कञ्चन गाउँपालिका वडा नम्बर ४ का वडा अध्यक्ष दुर्गा सिंह क्षेत्री र वडा नम्बर २ का वडाअध्यक्ष शेर बहादुर थारुको रोहवरमा लु. १५ प ७७०९, लु. १० प ५३५६ र लु १८ प ५२५४ नम्बरको ३ वटा होण्डा साइन मोटरसाइकल र १३ दशमलव ५ क्युफिटका २ थान सालका गोलिया बरामद गरी सब डिभिजन वन कार्यालय भैसाहीमा बुझाइएको सशस्त्र प्रहरी निरीक्षक गंगा बहादुर कार्कीले जानकारी दिए।
यस अघि पनि वैशाख २ गते कञ्चन–४ कञ्चन टोलका स्थानीयहरुले करिब ५१ क्यूफिटको ६ थान सालका गोलिया बिहान करिब ४ बजेतिर बरामद गरेका थिए। कञ्चनको साविक रुद्रपरुका सामुदायिक वन तथा कपिलवस्तुको जंगलहरुबाट अवैध रुपमा सालका रुख काटेर तस्करहरुले ओसारपसार गरिरहेको र सुरक्षा प्रशासनले कुनै ध्यान नदिएको भन्दै स्थानीयहरुको व्यापक गुनासो गरे पनि सुरक्षा गस्तीले तस्करहरुलाई नियन्त्रणमा लिन सकिरहेको छैन्। तर यो साता स्थानीय र सुरक्षा गस्तीको नियमित गस्तीले करिब तस्करहरुलाई पक्राउ गर्न नसके पनि अवैध काठहरुको बरामद गर्न सफल भएका छन्।
तस्करहरुले अवैध रुपमा सालका गोलियाहरु ओसारपोसार गर्ने गरेको भन्ने स्थानीयहरुको जनगुनासो आएपछि गाउँपालिकाको समन्वयमा सुरक्षा गस्तीलाई नियमित गर्न लगाइएको र सोही अनुसार सुरक्षाकर्मीहरुले अवैध काठ ओसारपसार गर्न प्रयोग गरिने सवारीसाधनसहित काठ बरामद गर्न सफल भएको कञ्चन गाउँपालिका वडा नम्बर ४ का वडाअध्यक्ष दुर्गा सिंह क्षेत्रीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_9DjWlLHwUU-1748326423.jpg)
