वीरगन्जमा राति १० बजेपछि बाजा बजाउन प्रतिबन्ध

समाचार

नेपाल लाइभ बुधबार, वैशाख १७, २०८२ २०:५७

पर्सा– स्थानीय प्रशासनले वीरगन्जमा राति १० बजेपछि बाजा बजाउन प्रतिबन्ध गरेको छ । जिल्ला प्रशासन कार्यालयमा बुधबार सम्पन्न सरोकारवालाहरुको बैठकले यस्तो निर्णय गरेको हो । पछिल्लो समय स्थानीयबाट यस विषयमा व्यापक गुनासो आएको थियो ।

हाल वैवाहिक सिजन चलिरहेको र यस्ता समारोहमा पार्टी प्यालेसहरुले मध्यरातसम्म डिजे तथा चर्को स्वरमा संगीत बजाएर स्थानीयलाई सास्ती दिइरहेको जनगुनासो बढेको छ ।

प्रमुख जिल्ला अधिकारी गणेश अर्यालयको अध्यक्षतामा प्रहरी उपरीक्षक गौतम मिश्र तथा जिल्लास्थित पार्टी प्यालेस सञ्चालकहरुको उपस्थितिमा सम्पन्न बैठकले यस्तो निर्णय गरेको हो । बैठकले सर्वसाधारणको स्वास्थ्य र दैनिकी समेत प्रभावित हुने गरी विवाह, व्रतबन्ध तथा धार्मिक/सांस्कृतिक कार्यक्रममा हुने डिजे लगायतका उपकरणहरुको प्रयोगलाई क्रमशः निरुत्साहित गर्न यस्तो निर्णय गरेको हो ।

बैठकले यस्ता सांस्कृतिक कार्यक्रमहरुमा गरिने आतिसबाजी र पटाकाको प्रयोगलाई पूर्णरुपले प्रतिबन्ध गराउने निर्णय समेत गरेको छ । यो निर्णयविरुद्ध कार्य गर्ने/गराउनेलाई कानुनको दायरामा ल्याउने निर्णय समेत गरेको छ । सिमावर्ती क्षेत्रबाट हुने पटाका, डिजेलगायतका उपकरणहरुको प्रवेशलाई कडाइका साथ नियमन गर्ने निर्णय पनि बैठकले गरेको छ ।

बुधबार उपरान्त हुने विवाह, व्रतबन्ध तथा धार्मिक/सांस्कृतिक कार्यक्रमहरुको बुकिङ कन्फर्मेसन गर्दा सम्बन्धित होटल/पार्टी प्यालेससँग डिजे पटकाको प्रयोगलाई पूर्णरुपमा बन्देज लगाइएको विषय खुलाइ त्यसको व्यहोरामा सहमति पत्रमा अनिवार्य रुपले हस्ताक्षर गराएर मात्र बुकिङ गर्ने निर्णय समेत बैठकले गरेको छ ।

बैठकले विवाह ब्रतबन्ध लगायतका सांस्कृतिक क्रियाकलापहरु सञ्चालन गर्ने होटल तथा पार्टी प्यालेसहरु अगाडि अनावश्यक सवारी साधन राखी सर्वसाधारणको आवागमन अवरुद्ध हुने कार्य नगर्ने/नगराउने पनि निर्णय गरेको छ । यस्ता सवारी साधनहरु सम्बन्धित होटल तथा पार्टी प्यालेसहरुले नै व्यवस्थापन गर्ने र यसलाई अझ प्रभावकारी रुपमा कार्यान्वयन गर्न ट्राफिक जाँचलाई कडाइका साथ लागु गर्ने निर्णय पनि बैठकले गरेको छ ।

बैठकले यस क्षेत्रका व्यवसायीहरुले नेपाल सरकारलाई बुझाउनु पर्ने राजश्व/बक्यौता नियमित रुपमा बुझाउने र त्यसको सुक्ष्म अनुगमन गरी कारबाहीको दायरामा ल्याउने निर्णय पनि बैठकले गरेको छ ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

शिक्षकको सडक आन्दोलन र शैक्षिक हडताल स्थगित

यी हुन् सरकार र शिक्षकहरूबिच भएका ९ बुँदे सहमति

१५ असारभित्र विद्यालय शिक्षा ऐन जारी गर्ने प्रतिबद्धता