काठमाडौं– नयाँ बानेश्वरस्थित ट्राभल एजेन्सी रुड अफ डेस्टिनेसनले क्यानडाको भिसा लागेका ६० भन्दा बढी विद्यार्थीलाई ठगी गरेको पाइएको छ।
क्यानडाको टिकट काटिदिने भन्दै पैसा असुलेको उक्त एजेन्सीले ठगी गरेको पाइएपछि पीडित विद्यार्थीहरूले यतिबेला कार्यालय घेराउ गरिरहेका छन्।
एजेन्सीका सञ्चालक अनिल रिजाललाई पीडितहरूले घेरिरहेका छन्। ‘घरबाट बिदाइ भएर हिँडेकाहरू एअरपोर्टमा पुगेपछि अलपत्र परे। कसैको जाने दिन आज (बुधबार) थियो, कसैको भोलि (बिहीबार) छ,’ पीडित विद्यार्थी विशालप्रसाद शर्माले भने , ‘न टिकट मिलाइदिन्छ। न पैसा फिर्ता दिन्छ। हामी त अलपत्र पर्यौँ।’
विशाल आफ्नो क्यानडाको भिसा लागेपछि नबिल बैंकको डेढ लाखको जागिर छाडेर उड्ने तयारीमा थिए। तर नक्कली टिकट परेपछि उनीसँग न उड्नका लागि टिकट छ, न पैसा। ‘मेरो आज पौने १२ बजेको फ्लाइट थियो। अब बिजोग भयो,’ उनले भने।
पीडितहरू भन्छन्– हाम्रो जिन्दगी बर्बाद भयो
४७ वर्षीय घनश्याम रेग्मीले छोरी सन्ध्या रेग्मीलाई क्यानडामा पढ्न पठाउन ३२ लाख खर्च गरे। उनले बैंकमा जग्गा धितो राखे, सहकारी र आफन्तबाट ऋण लिए। छोरीको भिसा लाग्यो। भिसा लागेपछि इण्डियन आर्मीको जागिर छाडेर उनी घर फर्किए।
सन्ध्याले चार महिनाअघि टिकट काट्नका लागि रुड अफ डेस्टिनेसनलाई १ लाख ८५ हजार रुपैयाँ अग्रिम दिएकी थिइन्। ‘उसले उतिबेलै फेक टिकट जारी गरेको रहेछ। इन्टरनेटमा टिकट छ कि छैन भनेर खोज्दा कहीँ पनि देखिएन। जाने बेला भयो भनेर हतारिएर घरबाट बिदाइ भएर छोरी आइन्। आउँदा टिकट नै बनेको रहेनछ,’ घनश्यामले सुनाए। उनकी छोरी ३० अगस्टसम्म क्यानडा पुगिनन् भने भिसाको म्याद सकिन्छ। ‘अर्को टिकट काट्ने पैसा छैन। हाम्रो जिन्दगी नै बर्बाद हुने भयो,’ घनश्यामले पीडा पोखे।
दगिरी शेर्पाकी छोरी कृष्णरु शेर्पा १४ अगस्टमा क्यानडा जान घरबाट बिदा भएर त्रिभुवन अन्तर्राष्ट्रिय विमानस्थल आइन्। विमानस्थल आइपुगेपछि थाहा पाइन्, टिकट त नक्कली परेछ। ‘भएभरको जायजेथा बेचेर छोरीलाई क्यानडा पठाउन लागियो। भिसा लागेपछि हामीले २ लाखमा गत वैशाखमा टिकट बुक गरेका थियौँ। तर टिकट नक्कली भएपछि हामी बिचल्लीमा छौँ,’ दगिरी शेर्पाले भने, ‘छोरीको होस्टेल छुट्यो, ओरेन्टेसन कक्षा पनि छुट्ने भयो। उनका साथीहरू जागिरमा सेटल्ड भइसके। छोरीको भिसा क्यान्सिल हुने अवस्थामा पुगिसक्यो।’
तत्काल टिकट काट्नुपर्यो भने ४ लाखभन्दा बढी लाग्ने उनले बताए। ‘न टिकटको ग्यारेन्टी छ, न पैसा फिर्ता गर्छ। तत्काल ५ लाख खोज्न सक्दिनँ म। हर्टअट्याक नै होला जस्तो भइसक्यो,’ उनले रुँदै भने।
अर्का पीडित अभिशेष श्रेष्ठकी दिदी रोमिता पनि यतिबेला रुड अफ डेस्टिनेशनको कार्यालय घेराउ गरिरहेकी छन्। ‘३ महिनाअगाडि टिकट बुक गरेका थियौँ। भाइ बुझ्न आइरहेको थियो। १ हप्तादेखि बा नै आएर बुझ्न थाल्नुभयो। भोलि आउँछ भन्दाभन्दै टिकट आएन,’ रोमिताले भनिन्।
झापाका प्रवेश घिमिरेको फ्लाइट २४ अगस्टमा थियो। उनले जुन टिकट पाएका थिए, शंका लागेर बुझ्दै जाँदा त्यो नक्कली टिकट रहेछ। उनले एजेन्सीको अनिल रिजाललाई यसबारे भने। अनिलले भने, ‘नक्कली टिकट हैन। हामी विश्वासिलो कम्पनी हौँ। अहिले अनलाइनमा टिकट नदेखाएको मात्र हो।’
२४ अगस्टमा भनिएको फ्लाइट क्यान्सिल भएर २६ मा पुगेको उनै अनिलले बताए। ‘म जान भनी ठीक्क परेर घरबाट आएँ। अफिस आउँदा फ्लाइट रिजेक्ट भएर ५०/६० जना पीडित अफिस घेराउ गरिरहेका रहेछन्,’ उनले भने।
एजेन्ट भन्छन्– केही दिन कुर्नुस्, ब्याजसहित जोडेर दिन्छु
एजेन्सीका अनिल रिजाल यतिबेला आफ्नै कार्यालयमा पीडितहरूको घेराबन्दीमा छन्। उनलाई र पीडितलाई सँगै राखेर प्रहरी पनि छलफलमा जुटिरहेका छन्। पीडित विद्यार्थीहरूको आग्रह छ, ‘कि टिकट काटिदेऊ। कि हाम्रो पैसा फिर्ता देऊ। नत्र भविष्य बर्बाद हुन्छ।’
रिजाल न उनीहरूको टिकट काट्न सक्छन्, न पैसा फिर्ता दिन नै। उनी आश्वासन दिँदै भन्छन्, ‘केही दिन पर्खनुस्। म तपाईंहरूलाई सावाको ब्याजसहित जोडेर दिन्छु।’
छलफलमा जुटिरहेको छ प्रहरी
रिजालको कार्यालयमा प्रहरी वृत्त नयाँ बानेश्वरका डिएसपी निशान श्रीवास्तव सहितको टोली खटिएको छ।
प्रहरीका अनुसार पीडितहरूले अहिलेसम्म मुद्दा दर्ता गरेका छैनन्। ‘हामीले पीडित र एजेन्टसँग छलफल गरिररहेका छौँ। पीडितहरूले मुद्दा दर्ता गर्नुभएको छैन। उहाँहरू कतिको आजभोलि नै क्यानडा उडने मिति रहेछ। थुनामा लग्यो भने न टिकट हुन्छ न पैसा। उहाँहरू छलफलमा नै जुटिरहनुभएको छ। हामी समाधानको कोसिस गरिरहेका छौँ,’ डिएसपी श्रीवास्तवले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
