काठमाडौं– नेपाली कांग्रेसका नेता उत्पादन गर्ने नर्सरीको रुपमा रहेको नेपाली कांग्रेस निकट नेपाल विद्यार्थी संघमा विदेशमा बस्नेदेखि अर्कै पार्टीका कार्यकर्तासम्म समेटिएको गुनासो आएको छ। यही साउन २२ गते पार्टी सभापति शेरबहादुर देउवाले ७१० जनाको नेविसंघको जम्बो तदर्थ समितिको विस्तार गर्दा विदेशमा बस्नेदेखि अर्कै पार्टीका कार्यकर्तासमेत मनोनित गरिएका छन्।
०७८ चेत्र ९ गते सभापति देउवाले नेविसंघको तदर्थ समितिको अध्यक्षमा दुजाङ शेर्पालाई मनोनित गरेका थिए। तदर्थ समितिलाई स्थानीय तह, प्रदेश सभा र प्रतिनिधि सभा सदस्य निर्वाचनको अन्तिम परिणाम प्राप्त भएको मितिले ३ महिनाभित्र केन्द्रीय अधिवेशन सम्पन्न गर्ने ‘म्यान्डेड’ दिइएको थियो। तर पार्टी सभापति देउवाले नेविसंघ अध्यक्ष शेर्पाको अध्यक्षतामा ७१० जनाको तदर्थ समिति गठन गरे। नेविसंघमा क्रियाशील भएर काम गरेका विद्यार्थीहरुलाई नसमेटेको तर अर्कै पार्टीका कार्यकर्तालाई मनोनित गरेको भन्दै सामाजिक सञ्जालमा आलोचना भएको छ।
विदेशमा भएकादेखि अर्को पार्टीसम्मका व्यक्तिहरु मनोनित
काभ्रेपलाञ्चोक जिल्लाबाट २९६ को सूचीमा रहेकी अस्मी तिमिल्सिना अर्कै पार्टीमा आबद्ध भएको भन्दै नेविसंघका कार्यकर्ताहरुले आलोचना गरेका छन्। स्थानीय तहको निर्वाचनमा लौरो चिह्न लिएर काठमाडौं महानगरपालिकाको मेयरका उम्मेद्वार बनेका बालेन शाहको समर्थनसहित प्रचार गरेकी अस्मीले प्रतिनिधि सभा निर्वाचनमा भने गोकुल बाँस्कोटाको पक्षमा मत मागेकी थिइन्।
त्यसैगरी हाल अस्ट्रेलियामा रहेका रवीन ढुंगाना, विप्लव पंगेनी, रितेश चिमोरियालगायतका विदेशमा रहेका व्यक्तिहरुसमेत नेविसंघ केन्द्रीय सदस्यमा मनोनित भएका छन्। नेविसंघ केन्द्रीय सदस्य एवम् रामपुर कृषि क्याम्पसमा अध्यनरत विद्यार्थी नेता असिम देवकोटाले केन्द्रीय समितिमाथि नै प्रश्न उठाए। उनले आफू केन्द्रीय सदस्यमा मनोनित भए पनि तदर्थ समिति विधान विपरीत गठन भएको दाबी गरे।
नेपाल लाइभसँग कुरा गर्दै देवकोटाले भने, ‘तदर्थ समिति आयो ठीक छ। तर यसमा जो/जो आउनुपर्ने हो, उहाँहरु अटाउन सक्नु भएको छैन। टीके प्रथामा ७१० जनाको कमिटी बनेको छ। अब उहाँहरु सबैलाई जिल्लामा खटाएर अधिवेशनमार्फत् नयाँ नेतृत्व चयन गर्नुपर्छ।’ उनले चिठ्ठी बाँडेर जिल्ला अध्यक्ष मनोनित नगर्न सुझाव दिए। उनले कतिपय कलेजमा नपढ्ने, व्यापार गरिरहेका र पदका लागि मरिहत्ते गर्नेहरु तदर्थ समितिमा आउनु दु:खद भएको बताए।
नेता देवकोटाले नेविसंघ देशकै ठूलो विद्यार्थी संगठन भए पनि शैक्षिक अजेण्डा बिर्सेको बताए। साथै उनले पेट्रोलियम पदार्थको मूल्यवृद्धि, त्रिवि सेवा आयोगको अध्यक्षको रिक्तता, शैक्षिक बेथितिका विषयमा नेविसंघ चुकेको बताउँदै नेविसंघले आफ्नो सवाल र अजेण्डा बनाएर अघि बढ्नुपर्नेमा जोड दिए।
त्यसैगरी त्रिभुवन विश्वविद्यालयका पूर्व नेता गणेश भण्डारीले स्ववियु सभापतिदेखि नेविसंघका सक्रिय सदस्यहरुलाई मनोनित नगरेको भन्दै आलोचना गरे। उनले भने, ‘यो तदर्थ समितिप्रति मेरो विमति छ। स्ववियुमा निर्वाचित साथीहरु छुटेका छन्। जिल्ला, क्याम्पस र नेविसंघमा योगदान दिएकाहरु छुटेका छन्। मुद्दा लाग्यो भनेर हाम्रा साथीहरुलाई उपेक्षा गरिएको छ। उहाँहरुको लेबी चल्ने, पद नचल्ने? उहाँहरुले स्ववियु निर्वाचन जिताउनु भएको छ। उहाँहरुलाई उपेक्षा गर्न मिल्छ?’ उनले नेविसंघको चाडोभन्दा चाडो अधिवेशन हुनुपर्नेमा जोड दिए।
सबैभन्दा धेरै काठमाडौंबाट मनोनित
नेविसंघमा सबैभन्दा धेरै काठमाडौं जिल्लाबाट केन्द्रीय सदस्यहरुमा मनोनित भएका छन्। केन्द्रीय सदस्यमा काठमाडौंबाट ४३, कैलालीबाट २४, मोरङबाट २४, चितवनबाट २०, नुवाकोट, स्याङ्जा र रुपेन्दीहीबाट १६/१६ जना मनोनित भएका छन्।
सबैभन्दा कम मनोनित हुने जिल्लामा म्याग्दीबाट एक, मनाङबाट एक, संखुवासभाबाट २ जना, मनाङबाट २, डोल्पा २, तेह्रथुमबाट ३ जना रहेका छन्।
नेविसंघ आफूले नभई पार्टीले चयन गरेको हो : अध्यक्ष शेर्पा
नेविसंघको तदर्थ समिति सार्वजनिक भएपश्चात असन्तुष्ट पक्षले समानान्तर कमिटी सार्वजनिक गर्नेसम्मका धम्की दिइरहेका छन्। नेविसंघमा असन्तुष्ट समूहले तदर्थ समितिमाथि प्रश्न उठाउँदै डा शेखर कोइराला र कांग्रेस संसदीय दलका सचेतक रमेश लेखकलाई ज्ञापनपत्रसहित ध्यानाकर्षणपत्र बुझाएका छन्।
नेविसंघ तदर्थ समितिको विवाद र मापदण्डबारे नेविसंघ अध्यक्ष दुजाङ शेर्पाले तदर्थ समिति आफूले नभई पार्टीले चयन गरेको बताए। उनले भने, ‘नेविसंघ मैले होइन, पार्टीले चयन गरेको हो। पार्टीको नेता, पार्टी पदाधिकारीहरु सबै जना बसेर नेविसंघको अधिवेशन नभएको ५/६ वर्ष भयो, धेरै साथीहरु जिम्मेवारविहीन छन्। धेरै साथीहरुले स्ववियुमा महत्वपूर्ण भूमिका खेल्नुभयो। तदर्थ समिति पनि ठूलो बनाउनुपर्छ भनेर निर्णय गर्नु भएको हो।’
उनले नेविसंघको तदर्थ आयोजक समिति यति नै सदस्यीय हुनुपर्ने नलेखेको बताए। ‘महाधिवेशन विधान अनुसार हुन्छ। तदर्थ समितिमा यति सदस्य, यति पदाधिकारी भनेर लेखिएको छैन,’ उनले भने, ‘पार्टीलाई आवश्यक लागेको कुरा पार्टीले नै निर्णय गर्ने हो।’ उनले नेपाल विद्यार्थी संघ देशको सबैभन्दा पूरानो र ठूलो विद्यार्थी संगठन भएको उल्लेख गर्दै, यसपालीको स्ववियु निर्वाचनमा त्रिविलगायत भ्यालीका महत्त्वपूर्ण क्याम्पस र देशका अन्य ठूला क्याम्पसमा जित निकालेर एक नम्बर भएको बताए।
उनले नेविसंघमा एक हजार, दुई हजार जति बनाए पनि असन्तुष्टि रहिरहने दाबी गरे। उनले बढी आक्रामक भएकालाई त्रिविका उपप्रध्यापक प्रेम चलाउनेको केसको कारणले गर्दा समेट्न नसकिएको बताए। अध्यक्ष शेर्पाले अदालतमा विचाराधीन मुद्दा भएका कारणले उनीहरुलाई नसमेटेको बताए।
‘नैनसिंह महर दाई अध्यक्षमा निर्वाचित हुनुभयो। उहाँलाई अमेरिकामा रहेका विद्यार्थीले पनि भोट हालेको हो। उहाँलाई युके, चाइना, अस्ट्रेलिया, भारतबाटलगायतका ९ वटा देशका प्रतिनिधिहरु आएर पनि भोट हालेको हो,’ उनले भने, ‘विदेशमा रहेका विद्यार्थीहरु बस्नै पाउँदैनन् भन्ने होइन। विप्लव पंगेनी क्यामब्रिज विश्वविद्यालयको एमफील हो। डा रितेश चिमोरिया सिटी युनिर्भसिटीका पीएचडी हुन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_9DjWlLHwUU-1748326423.jpg)
