काठमाडौं- त्रिभुवन विश्वविद्यालयले एक वर्षभन्दा बढी समय बितिसक्दा पनि केही संकायहरुको नतिजा सार्वजनिक गर्न सकेको छैन। समयमा नतिजा सार्वजनिक नहुँदा उज्वल भविष्यको सपना बोकेका विद्यार्थीहरु निराश भएका छन्। कतिपयले विदेश पलायन हुनुपर्ने अवस्था आएको गुनासो गरेका छन्।
त्रिविले समयमै नतिजा प्रकाशन नगरेको र आफ्नै क्यालेन्डर लागू नगरेको भन्दै विद्यार्थी संगठनहरुले पटकपटक डिन कार्यालयदेखि परीक्षा नियन्त्रण कार्यालयसम्म ध्यानाकर्षण गराए। तर त्रिविले भने आफ्ना माग सम्बोधन नगरेको विद्यार्थीले बताएका छन्।
२०७४ सालमा नेपाल ल क्याम्पसमा भर्ना भएकी अस्मिता दाहाललाई त्रिविले नतिजा सार्वजनिक नगरेकोमा चित्तदुखाइ छ। ‘तीन वर्षमा सकिने कोर्ष त्रिविले पाँच वर्ष लगायो। कहिले कोरोना महामारीलाई दोष दियो त कहिले एकापसमा दोषारोपण गरेर पन्छिने काम भयो,’ उनले भनिन्, ‘त्रिवि सुध्रिन्छ भन्ने मलाई विश्वास छैन। समयको बर्बादी हुनुका साथै पैसा पनि त्यत्तिकै खर्च भइरहेको छ। भविष्य नै अन्योल भइसक्यो।’
अस्मिताले थपिन्, ‘समयमै रिजल्ट प्रकाशित गरिदिएको भए समयमै अधिवक्ताको लाइसेन्स प्राप्त गरिन्थ्यो। सरकारी वकिलमा पनि भिड्न पाइन्थ्यो। म एक्लै पनि परीक्षा नियन्त्रण कार्यालय बल्खु पुगेर चर्को स्वरमा कराएकी छु। अरु साथीहरुले पनि पटकपटक ध्यानाकर्षण गराएका छन्। तर हामीलाई वास्ता नै गरेनन्।’
उनले नेपालको शिक्षा क्षेत्र निश्चित व्यक्तिहरुको कब्जामा पुगेको आरोप लगाइन्। शिक्षा क्षेत्रमा सिन्डिकेडको अन्त्य गर्नुपर्ने उनको माग छ।
विद्यार्थी भुवन भट्टको आक्रोश पनि उस्तै छ। उनी भन्छन्, ‘विद्यार्थीका अधिकारमाथि कुठाराघात गर्ने र १७ महिनासम्म रिजल्ट प्रकाशित गर्न नसक्ने त्रिवि पदाधिकारीले तत्काल राजीनामा गर्नुपर्छ।’
त्रिभुवन विश्वविद्यालय अन्तर्गतका विभिन्न संकायका नतिजा तत्काल सार्वजनिक गर्न माग गर्दै भट्ट स्नातकोत्तरका नयाँ सेसनका लागि भर्ना प्रकिया सुचारु गर्नुपर्ने उनको भनाइ छ।
शैक्षिक क्यालेन्डर अनुसार असोजमै मास्टर्सको नयाँ भर्ना खोलिसक्नुपर्ने भए पनि स्नातककै रिजल्ट नआउनु गम्भीर लापरबाही भएको भट्ट बताउँछन्।
गत मंगलबार विद्यार्थीहरुले परीक्षा नियन्त्रण कार्यालय अगाडि पुगेर धर्ना दिए। उनीहरुले टियु हाम्रो रिजल्ट खोई? टियु किन मौन? विद्यार्थी रिजल्ट कुर्न नसकेर खाडी गइसके लगायतका नारा लेखिएका ब्यानरसहित प्रदर्शन गरेका थिए।
उक्त अभियानको नेतृत्व गरिरहेका आरआर क्याम्पसका विद्यार्थी नेता विनोद जैशीले त्रिविभित्र ढिलासुस्ती र अनियमिताको कारणले लामो समयदेखि नतिजा प्रकाशन हुन नसकेको आरोप लगाए। उनले भने, ‘त्रिवि भित्र ढिलासुस्ती र अनियमितता व्याप्त छ। व्यवस्थापकीय पक्ष पनि भताभुंग अवस्थामा छ। परीक्षा दिएको एक वर्ष बितिसक्दा पनि रिजल्ट नआउँदा थुप्रै साथीहरु अन्योलमा छन्। त्यसैको खबरदारीका लागि यो अभियान सुरु गरेका हौं।’
उनले आफू विद्यार्थी अगुवा भएका कारण थुप्रै विद्यार्थी साथीहरुले बारम्बार रिजल्ट कहिले आउँछ भन्दै प्रश्न गर्ने गरेको बताए। उनले विद्यार्थीहरुबाट रिजल्ट प्रकाशन गर्नका लागि दबाब दिन आग्रह गरेको बताउँदै कयौं साथीहरुले रिजल्ट आउँदैन भने विदेश जान्छौं भन्दै गुनासो गर्ने गरेको बताए।
जैशीले परीक्षाफल प्रकाशनको विषयमा त्रिविका रजिष्ट्रार, भिसी तथा पदाधिकारीहरुसँग भेटेर गुनासो राख्दा समेत बेवास्ता भएका कारण रचनात्मक रुपमा दबाब दिएको बताए। शान्तिपूर्ण तरिकाले विद्यार्थीको माग राखिएको बताउँदै उनले माग पूरा नभए थप आन्दोलन गर्ने चेतावनी समेत दिए।
त्यसैगरी आन्दोलनको अगुवाइ गरिरहेकी नेविसंघ आरआर क्याम्पसकी नेतृ अप्सना अधिकारीले ६ महिनामा प्रकाशन भइसक्नुपर्ने रिजल्ट एक वर्ष बितिसक्दा पनि प्रकाशन हुन नसकेको बताइन्। उनले भनिन्, ‘रिजल्ट प्रकाशित नहुँदा त्रिवि परीक्षा नियन्त्रण कार्यालय अगाडि धर्ना दिन बाध्य भयौं।’
त्रिविको लापरबाही
परीक्षा नियन्त्रण कार्यालयले तीन वर्षे बीए कार्यक्रमको तेस्रो वर्ष, चार वर्षे बीबीएस कार्यक्रमको चौथो वर्षको नतिजा सार्वजनिक गर्न सकेको छैन। सबै नतिजा नआउँदै स्नातकोत्तरमा भर्ना खुलाएको छ। रिजल्ट प्रकाशन नगरी भर्ना खुलाएको भन्दै विद्यार्थीहरुले विरोध गर्दै आएका छन्।
यस विषयमा बुझ्न त्रिभुवन विश्व विद्यालय परीक्षा नियन्त्रक पुष्पराज जोशीलाई बारम्बार फोन र म्यासेज गर्दासमेत कुनै प्रतिक्रिया दिन मानेनन्।
त्रिभुवन विश्व विद्यालयबाट ६२ वटा आंगिक क्याम्पस र १ हजार ४० वटा सामुदायिक तथा निजी क्याम्पसले सम्बन्धन प्राप्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_9DjWlLHwUU-1748326423.jpg)
