काठमाडौं– सवारी ज्यान मुद्दामा ‘सेटिङ’ मिलाएर प्रहरीले ‘उन्मुक्ति’ दिएको पाइएको छ। मिनी ट्रक चलाउने अनुमति नै नभएका व्यक्तिलाई प्रहरीको सेटिङमा चालक भएको प्रमाणित गर्दै उन्मुक्ति दिएको पाइएको हो।
यो प्रकरणमा अख्तियार दुरुपयोग अनुसन्धान आयोगमा समेत उजुरी परेको छ। मिनी ट्रक चलाउने अनुमति नै नभएका चालकसँग रकम लिएर प्रहरी निरीक्षकले सेटिङमा उन्मुक्ति दिएको भनिएको घटना विगत ३ वर्षदेखि अनुसन्धानरत छ।
यो घटनाको सुरुवात २०७६ कात्तिक २ गतेबाट हुन्छ। कात्तिक २ गते बिहान साढे १० बजेतिर सिन्धुपाल्चोकको मेलम्ची नगरपालिका–७ सेल्ले पाखिन टोलमा बा ५ ख ९५४ नम्बरको मिनी ट्रकको ठक्करबाट स्थानीय १३ वर्षीय बालक राजन श्रेष्ठको मृत्यु भएको थियो।
ढुंगा बोकिरहेको उक्त मिनी ट्रकले ठक्कर दिँदा बालकको घटनास्थलै ज्यान गएको थियो। त्यसपछि इलाका प्रहरी कार्यालय मेलम्चीको प्रहरी टोलीले मिनी ट्रकका चालक मेलम्ची–७ कै ३२ वर्षीय सुवन तामाङलाई नियन्त्रणमा लिएको थियो। त्यतिबेला इलाका प्रहरी कार्यालय मेलम्चीका प्रमुख थिए, प्रहरी निरीक्षक (इन्सपेक्टर) महेन्द्र दर्नाल।
मिनी ट्रक चलाउने अनुमित नै नभएका उनै चालकलाई इन्सपेक्टर दर्नालले सेटिङमा उन्मुक्ति दिएको भन्दै उक्त विषय अहिले अख्तियार दुरुपयोग अनुसन्धान आयोग हुँदै प्रहरीको केन्द्रीय अनुसन्धान ब्यूरो (सीआईबी)सम्म पुगेको छ। सवारी चालक अनुमतिपत्र (लाइसेन्स) को (च, एफ) वर्गीकरणको मिनी बस र मिनी ट्रक हाँक्ने अनुमति रहेको भन्दै इन्सेक्टर दर्नालले चालकसँग पैसा असुलेर उन्मुक्ति दिएको आरोप लागेको छ।
पीडितलाई ५ लाख दिएर जेलमा हुनुपर्ने व्यक्तिलाई उन्मुक्ति
दुर्घटना भएपछि प्रहरीले चालकलाई नियन्त्रणमा लिएर अनुसन्धान गरेको थियो। हाँक्ने अनुमति नै नभएका व्यक्तिले चलाएको सवारीको दुर्घटनाबाट कसैको ज्यान गएमा यातायात व्यवस्था ऐन २०४९ अनुसार कम्तीमा ३ वर्षदेखि जन्म कैदसम्मको सजाय हुने व्यवस्था छ। तर, सुवनको हकमा भने त्यो नभएको पीडित पक्षको आरोप छ।
सुवन तामाङको सवारी चालक अनुमतिपत्रको प्रतिलिपि (जुन नक्कली भएको दाबी गरिएको छ)
एक्कासी कोदोबारीबाट हाम फालेर बाटो काट्न लाग्दा सवारी अनियन्त्रित भएर दुर्घटना भएको भन्दै दुबै पक्षबीच क्षतिपूर्ति भराउने सहमति भएको थियो। जसमा क्षतिपूर्ति वापतको ५ लाख रुपैयाँ पीडित पक्षलाई गाडीधनी मेलम्ची–७ कै रमेश श्रेष्ठ र कृष्णलाल श्रेष्ठले उपलब्ध गराएका थिए।
सुवन तामाङको सवारीचालक अनुमतिपत्रबारे यातायात व्यवस्था विभागले उपलब्ध गराएको विवरण। जसमा उनले क (ए) वर्गको मोटरसाइकल, स्कुटर र मोपेड चलाउन मात्रै अनुमति पाएको उल्लेख छ।
अख्तियारमा उजुरी, सीआईबीमा अनुसन्धान
यो घटनाको अनुसन्धान अहिले प्रहरीको केन्द्रीय अनुसन्धान ब्यूरो (सीआईबी)ले गरिरहेको छ। इन्सपेक्टरले मिलेमतोमा पैसा खाएर मुद्दा चलाउनुपर्ने व्यक्तिलाई छाडेको भन्दै अख्तियारमा उजुरी परेको थियो।
उजुरीमा चालकसँग १ लाख रुपैयाँ लिएर हुँदै नभएको ‘च’ वर्गको सवारी हाँक्ने अनुमति समेत रहेको भन्दै लाइसेन्स कीर्ते गरेर ‘च’ वर्गको पनि अनुमित रहेको दाबी उजुरीमा गरिएको छ। मिनी ट्रक हाँक्ने अनुमति भएको लाइसेन्स रहेपछि मृतकका परिवारलाई क्षतिपूर्ति दिलाएर प्रहरीले मिलापत्र गराउँदै चालकलाई उन्मुक्ति दिएको पनि उजुरीमा उल्लेख छ।
त्यसपछि अख्तियारले २०७७ चैत १० गते अन्यन्त जरुरी, गोप्य भन्दै जिल्ला प्रहरी कार्यालय सिन्धुपाल्चोकलाई पत्र लेखेर उक्त दुर्घटनाका सम्पूर्ण कागजात पठाउन र पीडित पक्षको परिवारको नाम, ठेगान र मोबाइल नम्बर समेत पठाउन निर्देशन दिएको थियो।
अख्तियारले जिप्रका सिन्धुपाल्चोकलाई लेखेको पत्र
अख्तियारले उक्त घटनाको अनुसन्धान गर्दा पैसा खाएको पुष्टि हुने प्रमाण फेला पार्न सकेन। ‘पैसा खाएको आरोप लगाए पनि प्रमाण भने फेला पार्न सकिएन,’ अख्तियार स्रोतले भन्यो, ‘बरु अनुसन्धानको क्रममा कीर्ते कसुर आकर्षित हुनसक्ने भन्दै हामीले उक्त फाइल सीआईबीमा पठाएका छौं।’
‘च’ वर्गको सवारी हाँक्ने अनुमति छ–छैन भनेर पठाइएको पत्रमा लाइसेन्स जारी भएको यातायात कार्यालयले ‘छैन’ भनेर लेखेको ठाउँलाई छ बनाइएको हुनसक्ने भन्दै अहिले सीआईबीले उक्त घटनाको अनुसन्धान गरिरहेको छ। अहिले अनुसन्धानकै क्रममा रहेको भन्दै सीआईबी स्रोतले थप विवरण भने खुलाउन चाहेन।
प्रहरीको दोष छैन: इन्सपेक्टर दर्नाल
यस घटनामा प्रहरीको कुनै दोष नरहको दाबी इन्सपेक्टर दर्नालको छ। अनुसन्धान गर्ने जिम्मा प्रहरीको रहेकाले सोही अनुसार अनुसन्धान गरेर बुझाएको र यसमा कुनै मिलेमतो तथा सेटिङ नगरेको उनले दाबी गरे।
‘प्रहरीको काम त अनुसन्धान गर्ने मात्रै भयो। यसमा अभियोजन गर्ने सरकारी वकिलदेखि फैसला गर्ने अदालतसम्म जोडिएको हुन्छ। हामीले अनुसन्धानको पाटो गरेका हौं, त्योभन्दा बढी हामीलाई थाहा छैन,’ इन्सपेक्टर दर्नालले भने।
‘आरोप लगाएजस्तो मिनी ट्रक चलाउने अनुमति नै नभएकाले प्रहरीले चलाउने अुनमति छ भन्न मिल्ने कुरा भएन। प्रहरीले त्यो गर्दा पनि गरेको छैन,’ दर्नालले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
