काठमाडौं– नेपाल घुम्न आउने विदेशी पर्यटकको पहिलो गन्तव्य मानिन्छ, काठमाडौंको ठमेल। ट्राभल एजेन्सी, होटल तथा रेस्टुरा र पर्यटनसँग सम्बन्धित सामानहरु पाइने ठमेल रातिसम्म जागा रहने बजारका रुपमा पनि लिइन्छ।
नेपालको सुन्दरता ‘एक्सप्लोर’ गर्न आउने पर्यटकलाई ठमेल अनुभव भने निकै ‘कुरुप’ लाग्छ। ठमेल कुरुप हुनुको मुख्य कारण हो– यत्रतत्र छरिएका तारहरु।
खास गरेर इन्टरनेट सेवा प्रदायकहरुले तारहरु व्यवस्थित नबनाउँदा ठमेलसहित काठमाडौंका धेरै ठाउँ कुरुप बनेका छन्। अव्यवस्थित तारका कारण आगलागी हुने, तारहरु सडकमै लत्रिएर दुर्घटना हुने जोखिम पनि बढी हुन्छ।
पछिल्लो समय भने ठमेलमा तार व्यवस्थापनको अभियान सुरु गरिएको छ। ठमेल पर्यटन विकास परिषद्को अगुवाइमा ठमेलका गुजिल्टिएका, अव्यवस्थित तारहरु काटेर हटाउन थालिएको छ।
करिब २ महिना अगाडिदेखि सुरु गरिएको तार–जाली व्यवस्थापनको काम अन्तिम चरणमा पुगेको ठमेल पर्यटन विकास परिषद्का अध्यक्ष भिवश्वर शर्माले जानकारी दिए। बिहीबारसम्म ९० प्रतिशत काम सकिएको र अंग्रेजी नयाँ वर्षसम्म सबै तार–जाली व्यवस्थापन सकिने शर्माको भनाइ छ।
‘हामीले विभिन्न निकायसंग समन्वय गरेर, ठमेल क्षेत्रका तारजाली हटाइँदै छ। यसले गर्दा ठमेलको सुन्दरता बढाउने काममा पनि केही मद्दत पुग्नेछ,’ शर्मा भन्छन्।
परिषद्का उपाध्यक्ष तथा तारजाली व्यवस्थापन संयोजक सहदेव धमला अव्यवस्थित तारजाली हटाउँदा मात्रै पनि ठमेल सुन्दर देखिन थालेको बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
