लाल मोहम्मद हत्याकाण्ड: काठमाडौंको लोलाङमा भेटियो २ थान पेस्तोल

सुरक्षा/अपराध

नारायण अधिकारी मंगलबार, पुस १२, २०७९ १६:४८

काठमाडौं– लाल मोहम्मद (लाल महम्द दर्जी)को हत्यामा प्रयोग भएका २ थान पेस्तोल काठमाडौंको लोलाङमा भेटिएको छ। सुटरले भाडामा लिएर बसेको कोठा खानतलासी गर्दा २ थान पेस्तोल भेटिएको हो।

प्रहरी स्रोतका अनुसार १ थान अटोमेटिक र अर्को कटुवा गरी २ थान पेस्तोल भेटिएको छ। ‘सुटर भाडामा बसेको कोठाबाट २ थान पेस्तोल भेटिएको हो। उक्त पेस्तोल फरेन्सिक जाँचका लागि पठाएका छौं,’ प्रहरीको उच्च स्रोतले नेपाल लाइभसँग भन्यो।

लोलाङमा एउटा फ्ल्याट नै लिएर सुटरहरु बसेका पाइएको छ। गत वैशाखदेखि नै उनीहरुले मासिक १६ हजार रुपैयाँ तिरेर एउटा फ्ल्याट भाडामा लिएर बसेका थिए। कपडाको व्यापार गर्ने भन्दै उनीहरुले भाडामा लिएको पाइएको छ।

उनीहरुले तल्लो तलामा रहेको होटलमा खाना खाने र माथिल्लो तलामा बसेर मोहम्मद हत्याको योजना बुन्ने गरेको प्रहरी अनुसन्धानबाट खुलेको छ। मोहम्मद हत्यापछि फ्ल्याट बन्द थियो। लामो समयसम्म भाडामा लिएकाहरु फ्ल्याटमा नआएपछि घरधनीले ढोका फुटाएर हेर्दा कोठामा पेस्तोल फेला परेपछि प्रहरीलाई खबर गरेका थिए।

सुटरहरुले प्रयोग गर्ने गरेको मोबाइल लोकेसन समेत लोलाङ एरियामा देखिएको र घरधनीले दिएको हुलिया सुटरसँग मेल खाएको प्रहरीले जनाएको छ। कोठामा पलङ, एउटा दराज र केही लत्ताकपडाहरु रहेका पाइएको छ।

पेस्तोल भेटिएपछि प्रहरी वृत्त बालाजुले मुचुल्का समेत उठाएर उक्त पेस्तोल लगेको छ। अहिले उक्त पेस्तोल फरेन्सिक जाँचका लागि पठाइएको हो।

मोहम्मदको हत्यामा २ थान पेस्तोल प्रयोग भएको पाइएको थियो। २ जना सुटरले २ वटा पेस्तोलबाट मोहम्ममाथि गोली प्रहार गरेका थिए। एउटा पेस्तोल भने घटनास्थलमै छाडेर भागेको अवस्थामा प्रहरीले बरामद गरेको थियो।

अहिले फेरि २ थान पेस्तोल बरामद भएपछि मोहम्मद हत्या गर्नका लागि सुटरहरुले ३ थान पेस्तोल ल्याएको खुलेको छ।

उक्त घटनापछि १ जना सुटर भने लोलाङस्थित आफ्नो कोठामा समेत पुगेको पाइएको छ। लोलाङबाट उनले १ जनालाई ३०० रुपैयाँ दिएर मोटरसाइकलमा कलंकीसम्म पुर्‍याउन लगाएको समेत अनुसन्धानबाट खुलेको छ।

गत असोज ३ गते काठमाडौंको कागेश्वरी मनोहरा नगरपालिका–८ गोठाटारको कृष्ण मन्दिर नजिकै गोली प्रहार गरी मोहम्मदको हत्या गरिएको थियो। हत्यामा सुन्धारास्थित सेन्ट्रल जेल (केन्द्रीय कारागार)देखि भारतसम्मको नेक्कस जोडिएको खुलेको छ।

सर्लाहीको गडौता नगरपालिका–८ घर भएका महोम्मदले गोठाटारमा रामकृष्ण श्रेष्ठको साढे २ तले घर पुरै भाडामा लिएर गार्मेन्ट फ्याक्ट्री सञ्चालन गर्दै आएका थिए।

प्रहरीका अनुसार महोम्मदको हत्यामा प्रत्यक्ष रुपमा ९ जना संलग्न भएको पाइएको छ। जसमा ३ जना नेपाली छन्। तीनै जनालाइ प्रहरीले यसअघि नै पक्राउ गरेर सार्वजनिक गरेको थियो।

लाल मोहम्मद हत्याकाण्डमा पक्राउ परेका ३ जना

भारतीय नागरिक बब्लु पासवान भनिने गणेश कुमारको मुख्य योजनामा मोहम्दको हत्या भएको अनुसन्धान टोलीको ठहर छ। गणेश कुमारले महोम्मदको हत्याका लागि आफ्नी प्रेमिका भारतीय नागरिक ममता तिवारीलाई समेत प्रयोग गरेका थिए। यस्तै, नेपाली युवती सुमी स्याङतान, पर्साको वीरगञ्ज–१६ का १९ वर्षीय मोहराम मिया भनिने मोहरम मिया, १७ वर्षीय रेहान मियाको प्रयोग भएको थियो।

मोहम्मदको हत्याका लागि काठमाडौंमा सबै बन्दोबस्त भारतको दिल्लीस्थित राना प्रताप बागमा घर भइ काठमाडौं बस्दै आएका नितिन खान भनिने नितिन मदानले गरेका थिए। भारतमा बसेर सबै योजना भने उनै बब्लुले बनाएको पाइएको छ।

पक्राउ परेका दुई नेपाली युवा मोहराम र रेहानले रक्सौलदेखि काठमाडौंसम्म पेस्तोल ल्याएर सुटरलाई दिएका थिए। त्यसवापत उनीहरुले ३५ हजार रुपैयाँ लिएका थिए। अर्की नेपाली युवती सुमीले भने मोहम्मदको गतिविधि निगरानी गर्ने र भारतमा रहेका बल्लुलाई मोहम्मदको गतिविधिको फोटो, भिडियो पठाउने गरेको अनुसन्धानबाट खुलेको छ।

घटनामा संलग्न भएका भारतीय नागरिकहरु बब्लु, नितिन, ममतासहित राजु भनिने दिनेश गुड्डु पटेल, महोम्मद नेजामुदिन भने अहिलेसम्म फरार छन्।

ममता तिवारी लागु औषध मुद्दामा केन्द्रीय कारागार हुँदा सुमी पनि जेल परेका बेला उनीहरुले जेलमै चिनजान भएको थियो। जेलबाट छुटेपछि ममताकै आग्रहमा रक्सौल पुगेर सुमीले बब्लुलाई भेटेपछि मोहम्मको रेकी गर्न तयारी भएकी थिइन्।

सुमीले मोहम्मदको रेकी गरेकी थिइन्। रेकी गरेवापत बब्लुले १ लाख ४५ हजार दिने बताएका थिए। प्रहरीसँगको बयानमा सुमीले उक्त रकम भने नपाएको बताएकी छन्।

महोम्मदलाई गोली हान्ने व्यक्ति मोटरसाइकलमा आएर मोटरसाइकलमै फरार भएका थिए। तर अहिलेसम्म उक्त मोटरसाइक भने प्रहरीले पत्ता लगाउन सकेको छैन। सीसीटीभी फुटेजमा सुटरले पल्सर मोटरसाइकल प्रयोग गरेको देखिए पनि नम्बर प्लेट नखुल्दा समस्या भएको प्रहरीले जनाएको छ।

सम्बन्धित समाचार :