काठमाडौं- जनशक्ति अभाव देखाउँदै सशस्त्र प्रहरी प्रधान कार्यालय हल्चोकले दरबन्दी थप गर्नुपर्ने प्रस्ताव अघि बढाएको छ। वर्षेनी बोर्डर आउट पोस्ट (बीओपी) र विभिन्न युनिटहरु थपिँदै जाने तर जनशक्ति भने थप नहुँदा समस्या हुने गरेको भन्दै सशस्त्रले दरबन्दी थपको प्रस्ताव अघि बढाएको हो।
सशस्त्र हेडक्वाटर हल्चोकले सशस्त्रका युनिटहरु र त्यहाँ हुनुपर्ने जनशक्तिबारे अध्ययन गरेको थियो। सो क्रममा अहिलेकै युनिटहरुका लागि ६ हजार ५ सयभन्दा बढी दरबन्दी आवश्यक रहेको औंल्याइएको थियो। आवश्यक रहेको सबै दरबन्दी एकै पटक थप गर्न गाह्रो हुने भन्दै ४ हजार २ सय दरबन्दी तत्काल थप गर्न सशस्त्र हेडक्वाटरले प्रक्रिया अघि बढाएको छ।
सशस्त्र हेडक्वाटर स्रोतका अनुसार करिब एक महिनाअघि नै ४ हजार २ सय दरबन्दी थप गर्नुपर्ने प्रस्ताव गृहमा पठाइसकिएको छ। गृहले उक्त प्रस्तावमा सहमति जनाउँदै प्रक्रिया समेत अघि बढाएको छ। गृहबाट दरबन्दी थप गर्नुपर्ने प्रस्ताव अहिले अर्थ मन्त्रालयमा पुगेको गृह स्रोतले नेपाल लाइभलाई जानकारी दियो।
दरबन्दी थपको विषयलाई सशस्त्र हेडक्वाटरले वृत्ति विकासको रुपमा समेत लिएको छ। सशस्त्र प्रहरी निरीक्षकमा ठूलो संख्यामा भर्ना हुने तर माथिल्लो पदको दरबन्दी भने न्यून हुँदा वृत्ति विकासमै असर परेकाले माथिल्लो पदहरुको दरबन्दी पनि थप गर्नुपर्ने सशस्त्र प्रहरीको राय छ।
माथिल्लो पदको दरबन्दी कम हुँदा प्रहरी निरीक्षकमा भर्ना भएको १८ वर्ष पुग्दा बल्ल डीएसपी हुनुपर्ने अवस्था सशस्त्र प्रहरीमा छ। गत असार १६ गते ५६ जना इन्स्पेक्टरहरु सेवा प्रवेश गरेको १६ वर्षसम्म बल्ल डीएसपीमा बढुवा भएका थिए। तर उनीहरुसँगै भर्ना भएकाहरु अझै बढुवा हुन सकेका छैनन्।
माथिल्ला पदहरुमा हुने बढुवाको जाम र आवश्यक जनशक्तिलाई मध्यनजर गरेर दरबन्दी थपको प्रस्ताव गरिएको सशस्त्रका एक उच्च अधिकारीले नेपाल लाइभलाई बताए।
सात महिनादेखि हुन सकेन डीआईजी बढुवा
गत वैशाख १८ गते राजु अर्याल सशस्त्र प्रहरी प्रमुख (आईजी) मा बढुवा भएपछि डीआईजी पद रिक्त हुन सुरु गरेको थियो। उनीसँगै नारायणदत्त पौडेल र चन्द्रप्रकाश (सीपी) गौतम एआईजीमा बढुवा भएपछि सशस्त्रमा तीन डीआईजी पद रिक्त भयो।
त्यसपछि एआईजीको दरबन्दी थप गर्दै गत भदौ ६ गते वंशीराज दाहाललाई एआईजीमा बढुवा गरेपछि चार डीआईजीको दरबन्दी सशस्त्रमा रिक्त भएको थियो। तर अहिलेसम्म डीआईजी बढुवाको प्रक्रिया अघि बढ्न सकेको छैन।
यसबारे जिज्ञासा राख्दा सशस्त्र हेडक्वाटरले भने प्रस्ताव गरेर पठाइएको दरबन्दी स्वीकृत भएर आएपछि बढुवा प्रक्रिया अघि बढाइने बतायो।
सिं सं. १ दीपेन्द्र शाह, सुरेशकुमार श्रेष्ठ, पुरुषोत्तम थापा, अन्जनीकुमार पोख्रेल, दीपक अधिकारीलगायत डीआईजी बढुवाका प्रतिस्पर्धी छन्। उनीहरुलाई समेत उछिनेर सि सं. २ का दीपेन्द्र कुँवर समेत डीआईजी बढुवाको दाउमा छन्।
प्रधानमन्त्री शेरबहादुर देउवाका नातेदार कुँवर बढुवाका लागि अयोग्य भएपछि सरकारले नियमावली नै संशोधन गरेर बढुवा गरेको थियो। एसपी भएको ४ वर्ष पूरा भएपछि बल्ल एसएसपी हुने प्रावधानलाई संशोधन गरेर ३ वर्षमा झार्दै कुँवरसहित १४ जनालाई गत साउन ६ गते कामु एसएसपीबाट कन्फर्म एसएसपी बनाइएको थियो। ११औं नम्बरमा रहेका कुँवर बढुवामा छलाङ मार्दै पहिलो नम्बरमा आएका थिए। उनै कुँवरलाई बढुवा गर्नका लागि डीआईजी बढुवा रोकिएको स्रोतको दावी छ।
सशस्त्र प्रहरीको डीआईजीमा बढुवा हुनका लागि स्टाफ कलेज पास गर्नुपर्ने हुन्छ। तर कुँवर भने स्टाफ कलेजको प्रवेश परीक्षामै दुई पटकसम्म फेल भएका थिए। उनै कुँवरलाई स्टाफ कलेज पास गर्नका लागि गत वर्ष त्रिभुवन विश्वविद्यालयको उपस्थितिविना नै परीक्षा लिएर पास गराइएको थियो।
रोचक त के भने एसपीकै कार्यसम्पादन मूल्यांकन (कासमू)ले कुँवर डीआईजी हुने अवस्था आउँछ। हरेक वर्ष साउन ६ गतेदेखि असोज २२ गतेसम्म प्रहरीको कासमू विवरण भर्ने र संकलन गर्ने गरिन्छ।
बढुवाका लागि पछिल्लो तीन वर्षको कार्यसम्पादन मूल्यांकन हेर्नुपर्ने प्रावधान छ। साउनमा कन्फर्म एसएसपी भएका कुँवरको भने पछिल्लो तीन वर्षको कार्य सम्पादन मूल्यांकन हेर्दा उनको एसएसपीको कार्य सम्पादन मूल्यांकन हुँदैन।
असारमै कन्फर्म एसएसपीमा बढुवा भएको भए उनको पछिल्लो वर्षको कार्य सम्पादन मूल्यांकन एसएसपीको हुन्थ्यो। जसकारण रिक्त रहेको डीआईजी पदमा कुँवर बढुवा भएको अवस्थामा सशस्त्र प्रहरीको इतिहासमै पहिलो पटक एसपीको कासमूले डीआईजी बढुवा हुने उनी भाग्यमानी ठहरिनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
