हलिया पुनर्स्थापन रकममा भ्रष्टाचार गर्ने दोषीलाई कारबाही गर्न सांसदले गराए सरकारको ध्यानाकर्षण

समाज

नेपाल लाइभ बुधबार, साउन २३, २०७५ ०८:४९

काठमाडौं– राष्ट्रियसभाका सदस्य चक्रप्रसाद स्नेहीले डडेलधुरामा हलिया मुक्त पुनर्स्थापन कार्यक्रमअन्तर्गत सरकारले हलियाका लागि उपलब्ध गराएको रकममा भ्रष्टाचार भएको भन्दै दोषीलाई कारबाही गर्न सरकारको ध्यानाकर्षण गराएका छन्।

राष्ट्रियसभाको बुधबारको बैठकको विशेष समयमा बोल्दै सदस्य स्नेहीले डडेलधुरा मालपोत कार्यालयका सहायक दानबहादुर बिक, लेखापाल दिलबहादुर ऐर र मुक्त हलियाका जिल्ला अध्यक्ष तुलाराम सार्कीले हलिया पुनर्स्थापन कार्यक्रमअन्तर्गत हलियालाई उपलब्ध गराइएको रकमबाट प्रतिव्यक्ति २० हजार रुपैयाँका दरले ३ करोड ३८ लाख रुपैयाँ घुस लिएको प्रमाणित भइसकेको भन्दै कडा कारबाहीका लागि सरकारको ध्यानाकर्षण गराएका हुन्। घुस लिएको प्रमाणित भएपछि केही रकम उनीहरुले फिर्ता गरेको र त्यही बहानामा छुट दिने काम नहोस् भनी उनले सरकारको ध्यानाकर्षण गराएको बताए। सदस्या स्नेहीले घुस लिने काममा संलग्न सबैलाई कडा कारबाही गर्न मागसमेत गरे।

डडेलधुरामा १ हजार ५ सय ५८ जना हलिया पुनस्र्थापित भइसकेका छन् भने २ हजार ५ सय ५१ जना हलिया सरकारको हलिया पुनर्स्थापन कार्यक्रमअन्र्तगत सेवा लिने क्रममा छन्। हलिया पुनर्स्थापन कार्यक्रम अन्तर्गत सरकारले घर निर्माणका लागि ३ लाख २५ हजार, मर्मतका लागि १ लाख २५ हजार र जमिन खरिदका लागि २ लाख रुपैयाँ जिल्ला मालपोत कार्यालय मार्फत उपलब्ध गराउँदै आएको छ।

सरकारले सरकारी निकायमार्फत नै उपलब्ध गराएको रकममा भ्रष्टाचार र घुसखोरी हुनु दुःखद भएको भन्दै सदस्य स्नेहीले दोषीमाथि कारबाही गरी पीडितलाई न्याय दिन सरकारसँग मागसमेत गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

मुलुक प्रधानमन्त्रीले नभई बिचौलियाहरुले चलाइरहेछन् : उपेन्द्र यादव

गीत बजाएको आरोपमा १४ जना पक्राउ

कावासोतीमा मोटरसाइकल दुर्घटनामा परी दाजुभाइको मृत्यु