गोसाइँकुण्ड मेला व्यवस्थापनको तयारी थालियो

समाज

नेपाल लाइभ मंगलबार, साउन २२, २०७५ १६:२८

धुन्चे– जनैपूर्णिमामा रसुवाको धार्मिक तीर्थस्थल गोसाइँकुण्डमा लाग्ने मेलाको व्यवस्थापनका लागि तयारी सुरु भएको छ। हरेक वर्ष पुत्रदा एकादशीदेखि साउन शुक्ल पूर्णिमा अर्थात् जनैपूर्णिमाका दिनसम्म लाग्ने गोसाइँकुण्ड मेलाको व्यवस्थापनका लागि तयारी थालिएको हो।

मेला व्यवस्थापनका लागि ९ वटा उपसमिति गठन गरी काम सुरु गरिएको गोसाइँकुण्ड क्षेत्र बिकास समिति रसुवाका अध्यक्ष सञ्जीव डिएमले बताए। गोसाइँकुण्ड मेला भर्न आउने भक्तजनको सुविधालाई ध्यानमा राखी खानेपानी तथा सरसफाइ उपसमिति, स्वास्थ्य उपसमिति, प्रचारप्रसार उपसमिति, वातावरण उपसमिति, स्वयंसेवक व्यवस्थापन उपसमिति, आर्थिक व्यवस्थापन उपसमिति, अनुगमन उपसमिति, यातायात व्यवस्थापन समिति र दररेट निर्धारण उपसमिति गठन गरिएको छ।

उपसमितिहरुले शुक्रबारसम्मका कार्ययोजना बनाई गोसाइँकुण्ड क्षेत्र विकास समितिमा पेश गर्ने र त्यसलगत्तै सबै टोली परिचालन गरिने डिएमले जानकारी दिए।

साउन ३१ देखि भदौ १० सम्म गोसाइँकुण्डमा मेला लाग्दैछ। त्यस्तै, विगतको वर्ष जस्तै यस वर्ष पनि तीर्थालको यात्रा सहज बनाउन गोसाइँकुण्ड जाने गोरेटो तथा घोडेटो बाटो मर्मत गरिने डिएमले जनाए।

गोसाइँकुण्डमा स्नान गरी गोसाइँबाबा भगवान शिवको दर्शन गर्नाले पापबाट मुक्ति पाउने, पितृ तर्ने र आफूले चिताएको पुरा हुने जनविश्वास रही आएका छ।

समुद्री सतहदेखि ४ हजार ३ सय ८० मिटरको उचाइमा रहेको गोसाइँकुण्डमा बर्सेनि हजारौं मानिस पुग्ने गर्छन्। गोसाइँकुण्डमा हरेक वर्ष गंगादशहरा र जनैपूर्णिमा गरी दुई पटक मेला लाग्ने गर्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

मुलुक प्रधानमन्त्रीले नभई बिचौलियाहरुले चलाइरहेछन् : उपेन्द्र यादव

गीत बजाएको आरोपमा १४ जना पक्राउ

कावासोतीमा मोटरसाइकल दुर्घटनामा परी दाजुभाइको मृत्यु