काठमाडौं– मतदान पूर्वको २ दिनको मौन अवधिको समयमा उम्मेदवार समेत रहेका मुख्य दलका शीर्ष नेताले नै मतदातालाई पैसा बाँडेको आरोप लागेको छ। निर्वाचनको निकै संवेदशील मानिने यो अवधिमा देश हाँकी रहेका तथा राज्यको उपल्लो तहमा पुगेकाहरुबाटै अवज्ञा भएको आरोपहरु लागेका छन्।
मौन रहनु पर्ने पहिलो दिन शुक्रबार साँझ प्रधानमन्त्री शेरबहादुर देउवा बसेको डडेलधुराको रातो गुराँस रिसोर्टमा कार्यकर्ताको भीड लागेपछि विवाद शुरु भएको थियो। प्रतिनिधि सभाको निर्वाचन अघिको मौन (स्थिर) समयमा रिसोर्टमा कार्यकर्ताको भीड लागेपछि विपक्षी दलहरूले पैसा वितरण वा चलखेल भएको आरोप लगाएका थिए।
प्रधानमन्त्रीले नबोलाएको, तर गाउँका समस्या राख्न मानिसहरु आएको हुन सक्ने देउवा निकटले बताएका छन्। यता, डडेलधुराका मुख्य निर्वाचन अधिकृत बालकृष्ण वाग्लेले प्रधानमन्त्री देउवा बसेको होटलमा भीड जम्मा भएको स्वीकार गर्दै भीड हटाइएको बताएका थिए।
यस्तै, शुक्रबार साँझ नै गण्डकी प्रदेशका अर्थमन्त्री तथा नेकपा माओवादीको तर्फबाट कास्की क्षेत्र नम्बर ३ का उम्मेदवार रामजी बराल अन्नपूर्ण गाउँपालिका–१ भिरमुनि भन्ने ठाउँमा पुगेर मतदातालाई प्रलोभन गरेको भन्दै एमाले समर्थित कार्यकर्ताले लखटेका थिए। मत माग्न आएको भन्दै बराल, पूर्व सांसद एवं माओवादी नेतृ दुर्गा विकलगायत माओवादी कार्यकर्तालाई एमालेका कार्यकर्ताले लखेटेका हुन्। उम्मेदवार बरालले भने आफन्त बिरामी भएकाले भेट्न आएको दाबी गरेका थिए।
यस्तै, काठमाडौं क्षेत्र नम्बर ५ प्रदेश सभा (२) मा नेकपा एमालेका प्रदेश सभा तर्फका उम्मदेवार दीपक निरौलालाई पैसा बाँडेको आरोपमा शुक्रबार साँझ स्थानीयले प्रहरी बोलाएर बुझाए। यो क्षेत्रमा नेकपा एमालेका वरिष्ठ उपाध्यक्ष ईश्वर पोखरेल प्रतिनिधि सभाका उम्मेदवार रहेका छन्। पोखरेललाई जोडेर विभिन्न टिप्पणी हुन थालेपछि उनले शनिबार एक विज्ञप्ति जारी गर्दै चरित्र हत्या गरिएको र राज्य संयन्त्रको दूरूपयोग गरिएको बताएका छन्।
निरौलाले भने आफूहरु बिरामीलाई भेट्न गएकोले पैसा बाँडेको आरोप निराधार भएको बताए।
मौन अवधिमा पैसा बाँडेको तथा उल्लघंन गरेको विषयमा निर्वाचन आयोगले गम्भीरतापूर्वक अनुगमन गरिरहेको बताउँछन् आयोगका सहप्रवक्ता कमल भट्टराई। सञ्चारमाध्यममा आएका समाचारलाई आयोगले आफैँ पनि अनुसन्धान गर्ने र उजुरी परेको अवस्थामा ठोस प्रक्रिया बढाउने भट्टराईले बताए। ‘आयोगदे आफ्नै संयन्त्रमार्फत् पनि अनुसन्धान गरिरहेको हुन्छ साथै त्यस्ता घटनाहरुको विषयमा कतैबाट उजुरी आए आयोगले त्यसमा थप प्रक्रिया बढाउँछ,’ नेपाल लाइभसँग कुरा गर्दै भट्टराईले भने,‘पैसा बाँडेको भन्ने विषयका समचारहरुलाई आयोगले गम्भीरतापूर्वक लिएर अनुसन्धान गरिरहेको छ। प्रमाणहरु बटुलिरहेको छ। पुष्टि भए आवश्यक कारबाही हुन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
