काठमाडौं– काठमाडौंका अव्यवस्थित बसोबासी तथा सुकुम्बासीले आफूहरुको वैकल्पिक व्यवस्थापन नगरी हटाउन खोजिएको भन्दै आन्दोलन सुरु गरेका छन्।
अधिकार सम्पन्न बागमती सभ्यता एकीकृत विकास समितिले गोरखापत्रमा सूचना प्रकाशन गरी काठमाडौं उपत्यकाभित्रका बागमती र यसका सहायक नदी किनारामा बनाइएका घरटहराहरु हटाउन भनेको थियो। यस्ता घरटहराहरु मंसिर ४ गतेभित्र नहटाइए आफैं हटाउने पनि समितिले सूचनामा चेतावनी दिएको छ।
समितिले घरटहराहरु हटाउन दिएको म्याद नजिकिँदै गर्दा सुकुम्बासीहरु आन्दोलित बनेका हुन्।
बिहीबार विभिन्न संघ–संस्थाको अगुवाइमा सुकुम्बासीहरुले काठमाडौंमा विरोध प्रदर्शन गरेका छन्।
काठमाडौंको माइतीघरमा आयोजित विरोध प्रदर्शनमा सहभागीहरुले वैकल्पिक व्यवस्था नगरी आफूहरुको उठीबास गर्न नपाइने बताए।
प्रदर्शनकारीहरुले ‘डोजर आतंक बन्द गर, बिना विकल्प उठीबास बन्द गर, मानव अधिकार सुनिश्चित गर,’ लगायतका नारा लेखिएका प्लेकार्ड बोकेका थिए।
समितिले सुकुम्बासी तथा अव्यवस्थित बसोबासीलाई जग्गा खाली गराउन सूचना जारी गरेपछि राजनीतिक दलका नेताहरु पनि विरोधमा उत्रिएका छन्।
नेकपा एमालेले संस्थागत रुपमै समितिको उक्त सूचनाप्रति विरोध जनाएको छ। सरकारको नेतृत्व गरिरहेको नेपाली कांग्रेसका नेता एवम् सत्ता गठबन्धनबाट काठमाडौं क्षेत्र नम्बर १ का प्रतिनिधि सभा उम्मेदवार प्रकाशमान सिंहले पनि सुकुम्बासीलाई विना विकल्प हटाउन खोजिएको भन्दै विरोध जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
