काठमाडौं– निर्वाचन आचारसंहिता लागू हुनुुअघि पूर्वसन्ध्यामा सरकारले हतारहतार नेपाल आयल निगमका कर्मचारी परिवर्तन गर्ने तयारी गरेको छ। सरकारले आयल निगमका कांग्रेसनिकट मान्छेहरुलाई आकर्षक ठाउमा सरुवा गर्ने तयारी गरिएको हो। विगत दुई महिनादेखि योजना बनाएर निर्वाचनलाई प्रभावित गर्ने किसिमले आचारसंहिता लाग्नुअघि कांग्रेस निकट कर्मचारीलाई सरुवा गर्ने तयारी भएको छ।
सोमबार राति १२ बजेबाट आगामी मंसिरमा हुने प्रतिनिधि सभा र प्रदेश सभाको चुनावकेन्द्रित भएर निर्वाचन आचारसंहिता लागु हुँदैछ। आचार संहिता लाग्नुअगावै सरकारले भने आयल निगमका केहि कर्मचारीहरुको सरुवा गर्ने तयारी भएको हो। यसरी सरुवा हुने तयारीमा अधिकांश कांग्रेस निकट मानिन्छन्। सरुवा हुने तयारीमा कांग्रेस निकटका कमला न्यौपाने, दुर्गा पछाई, मनोहर डिसीलगायतका कर्मचारीहरु छन्।
निगममा कम्प्युटर अपरेटरका रुपमा छिरेर जागिर सुरु गरेकी न्यौपाने कांग्रेसनिकट स्वतन्त्र कर्मचारी युनियनको उपाध्यक्ष पनि रहेकी छिन्। उनलाई यसअघि लगातार कार्यालय प्रमुखको जिम्मा पनि दिइएको थियो। उनले नेपालगञ्जको आयल निगमको कार्यालयमा प्रमुखको जिम्मेवारी सम्हालिसकेकी छिन। योग्यता नै नपुगेकी उनैलाई रातारात भैरहवा डिपो प्रमुखको रुपमा सरुवा गर्न लागिएको छ।
न्यौपाने आठौंं तहको कर्मचारी हुन्। भैरहवा डिपोमा नवौं तहको कर्मचारी रहने प्रावधान छ। स्रोतले भन्यो, ‘योग्यता नै नपुग्दा समेत कांग्रेसनिकट भएकै कारण उनलाई आकर्षक ठाउँमा सरुवा गर्न लागिएको छ। कर्मचारी सरुवाको कार्यविधि २०६५ समेत लत्याइएको छ।’
भैरहवामा अहिले दीपक घिमिरे प्रमुख छन्। उनलाई राम्रो ठाउँमा सरुवा गर्ने प्रलोभन देखाएर उनको ठाउँमा न्यौपानेलाई सरुवा गर्न लागिएको श्रोतले बतायो।
‘दुई महिना अघिबाटै योजना बनाएर यो सरुवाको काम भएको छ,’ स्रोतले बन्यो, ‘कांग्रेसको कहाँ कहाँ वर्चश्व पार्ने भन्ने किसिमले यो काम भएको हो।’
दुर्गा पछाइलाई आयल निगमको आकर्षक ठाउँको डिपो प्रमुख बनाउने तयारी भएको छ। निगमका हालका एमडी उमेशप्रसाद थानी आफैं कांग्रेस निकट छन्। थानीकै अग्रसरतामा पछाइलाई आकर्षक कार्यालयको जिम्मा सुम्पिने तयारी भएको स्रोतले जनाएको छ।
त्यस्तै, पोखरास्थित निगमको कार्यालयमा पनि कांग्रेसनिकट रहेका मनोहर डिसीलाई प्रमुखका रुपमा सरुवा गर्न लागिएको छ।
स्रोतकाअनुसार यी तीनै जना कांग्रेससँग सम्बन्धित रहेका छन्। निर्वाचन आचारसंहिता लाग्नु पूर्वसन्ध्यामा उनीहरुलाई सरुवा गरेर कांग्रेसले आफ्नो वर्चश्व कायम गर्न खोजेको छ। स्रोतले भन्यो- ‘हवाई इन्धन शाखामा पनि यस्तै गर्ने किसिमले योजना भइरहेको छ। अहिले चुनावको मुखमा सुनियोजित रुपमा चुनाव प्रभावित गर्ने र आयल निगमलाई कांंग्रेसकै बनाउने हिसाबले यो निर्णय भएको हो। दुई महिनाबाटै यो योजना बनेर काम भएको छ।’
क्षेत्रीय इन्धन डिपोमा मात्रै नभएर अन्य डिपो तथा हवाई इन्धनका डिपोहरुमा पनि कांग्रेसनिकट कर्मचारी सरुवा गर्ने योजना रहेको स्रोतले जनाएको छ। योग्यता दक्षताको कदर नगरी दरबन्दीको आवश्यकतालाई बेवास्ता गर्दै राजनीतिक चलखेलको आधारमा सरुवाको तयारी गरिएको छ। स्रोतले भन्यो, ‘कांग्रेसको प्रभाव पार्ने किसिमले सुनियोजित ढंगबाट यो निर्णय भएको छ। सम्भवतः भोलि बिहान सार्वजनिक रुपमा यो जानकारी आउँछ होला।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
