करिब डेढ करोडसहित नागढुंगाबाट पक्राउ परेका गुप्ता र थारूलाई सार्वजनिक गर्दै प्रहरी। तस्बिर : नेपाल प्रहरी
काठमाडौं- महानगरीय प्रहरी प्रभाग नागढुंगाले गत सोमबार बिहान साढे ४ बजेतिर १ करोड ४७ लाख ८६ हजार रुपैयाँसहित दुई जनालाई पक्राउ गर्यो। स्रोत नखुलेको उक्त रकमसहित भारतको गोरखपुरस्थित घण्टाघर घर भएका ३० वर्षीय अमितकुमार गुप्ता र कपिलवस्तुको बाँडगंगा नगरपालिका-४ का २२ वर्षीय संगम थारू पक्राउ परेका थिए।
प्रदेश ३-०१-०२३ च २२५९ नम्बरको कारका चालक थारू हुन् भने गुप्ता उक्त रकम लिएर काठमाडौं आएका ‘भरिया’ हुन्। कार जाँच गर्ने क्रममा कारको डिक्कीमा स्पेयर टायरमुनि र कारकै अन्य भागमा लुकाएर राखेको अवस्थामा ३ वटा झोला प्रहरीले बरामद गरेको थियो। झोलाबाट प्रहरीले १ करोड ४७ लाख र गुप्ताको साथबाट ८६ हजार बरामद भएको थियो।
प्रहरीले बरामद गरेको उक्त रकमसहित थप अनुसन्धानका लागि सम्पत्ति शुद्धीकरण विभाग पुल्चोक पठायो। विभागले सुरु गरेको अनुसन्धानमा उक्त रकमको सम्बन्ध भने अवैध सुन खरिदमा प्रयोग हुन लागेको देखिएको छ। विभागले गरेको एक साताको अनुसन्धान प्रगति नेपाल लाइभलाई सुनाउँदै विभागका एक अधिकारीले भने, ‘यो रकमको नेक्सस अवैध सुन खरिदसम्म देखिएको छ। हामी अनुसन्धान गर्दैछौं।’
विभाग स्रोतका अनुसार उनीहरूका साथबाट बरामद भएको मोबाइलमा सुन कारोबारको विवरण, सुनको फोटोसमेत भेटिएको छ।
गुप्ता र थारू पक्राउ परेकै दिन सोमबार महानगरीय प्रहरी परिसर काठमाडौंले दुवै जनालाई विभागमा बुझाएपछि विभागले उनीहरूसँग सोधपुछ गरेको थियो। सोमबार राति १२ बजेतिर भने उनीहरूले उक्त रकम सुन खरिदका लागि आएको विभागलाई बताएका थिए। गुप्ताको मोबाइलमा भएको सुनको विवरण र उनको बयान मेल खाएको थियो।
बरामद भएको रकम। तस्बिर : नेपाल प्रहरी
‘चालक थारूले आफूलाई केही थाहा नभएको बताए। भारतीय नागरिक गुप्ताले राती १२ बजेतिर उक्त रकम सुन खरिदका लागि आएको 'क्लू' दिए,’ विभाग उच्च स्रोतले भन्यो।
पक्राउ परेका गुप्ता पैसा र सुन बोक्न प्रयोग भएका भरिया मात्रै भएको हालसम्मको विभागको अनुसन्धानले देखाएको छ। उक्त रकम कहाँबाट आयो? कसलाई दिने? र कोबाट सुन लिने भन्नेसम्म गुप्ता जानकार भएको अनुसन्धानबाट खुलेको छ।
अवैध सुन खरिद गरेर स्थलमार्ग हुँदै भारत लैजाने उनीहरूको योजना देखिएको अनुसन्धानबाट खुलेको प्रहरी स्रोतले बताएको छ। यो घटना भएसँगै नेपालमा अवैध सुनको कारोबार जारी रहेको निष्कर्ष विभागले निकालेको छ।
000
तीन महिनाअघि असोज २७ गते राजस्व अनुसन्धान विभागले एक सुनचाँदी व्यवसायीले मात्रै दुई वर्षमा साढे २ अर्ब बराबरको सुन तस्करी गरेको भन्दै मुद्दा दायर गरेको थियो।
विभागले रुपन्देहीको सिद्धार्थनगर नगरपालिका-१२ स्थित सोनी गोल्ड एन्ड सिल्भर प्रालिका सञ्चालक सुनील सुनारविरुद्ध उच्च अदालत तुल्सीपुर, बुटवलमा मुद्दा दायर गरेको थियो। उनले पछिल्लो दुई वर्ष अवधिमा सुनचाँदीको भन्सार छली चोरी पैठारी तथा निकासी गरी २ अर्ब ३९ करोड, ५५ लाख १५ हजार ९ सय ४३ रुपैयाँ बराबरको राजश्व चुहावट गरेको विभागको अनुसन्धानले देखाएको थियो।
बुटबल उपमहानगरपालिका–११ स्थित चौराहाबाट सुनारको कारभित्र बोरामा लुकाएर राखेको नगद र उनको साथमा रहेको मोबाइल असार ३० गते बरामद भयो । मोबाइलमा अवैध सुनको कारोबारका विवरण भेटिएपछि त्यसतर्फ अनुसन्धान गर्दा ठूलो मात्रामा सुन तस्करी भएको पाइएको थियो।
अहिले पक्राउ परकोहरूमाथि अनुसन्धान गर्दा पनि उक्त रकमको नेक्सस अवैध सुन खरिदका लागि देखिएपछि नेपाललाई ट्रान्जिट बनाउँदै सुन तस्करी हुने क्रम जारी रहेको प्रहरी र विभागको अनुसन्धानले देखाएको छ।
प्रहरीको हतारले प्रमाण गायब, एक फरार
सोमबार झन्डै डेढ करोड रुपैयाँसहित दुई जना पक्राउ परेको केही बेरमै महानगरीय प्रहरी परिसर काठमाडौंले पत्रकार सम्मलेन गरेर जानकारी गराएको थियो। प्रहरीको यो कदमले प्रमाण नै नष्ट भएको विभागले आरोप लगाएको छ। विभाग उच्च स्रोतले भन्यो, ‘डेढ करोड बरामद भएपछि प्रहरीले हतार गरेर पत्रकार सम्मलेनमार्फत् सार्वजनिक गर्यो। पत्रकार सम्मलेन संदिग्ध व्यक्तिका लागि भने प्रमाण नष्ट गर्ने उचित मौका बन्यो।’
प्रहरीले रकमसहित दुवै जनालाई सार्वजनिक गरेपछि सम्पत्ति शुद्धीकरण विभाग पठाइएका उनीहरूले बयानका क्रममा पैसा पठाउने व्यक्ति र पैसा लिने व्यक्तिको नाम लिएका थिए। त्यसपछि विभागले प्रहरीकै समन्वयमा कपिलवस्तुको कृष्णनगरबाट पैसा पठाउने एक जनालाई ४४ लाख रुपैयाँसहित पक्राउ गरेको थियो।
पैसा बुझ्ने व्यक्तिलाई पनि प्रहरीले काठमाडौं बत्तिसपुतलीबाट पक्राउ गर्न सफल भयो। तर एक जना भने अझसम्म पनि फरार छन्। ‘काठमाडौंबाट बाबुछोरा नै पक्राउ गर्नुपर्ने थियो। छोरा भागिसकेपछि बाबुलाई मात्रै पक्राउ गर्न सफल भयौं,’ विभाग स्रोतले नेपाल लाइभसँग भन्यो, ‘पक्राउको विवरण प्रहरीले गोप्य रोखेको भए सायद बाबुछोरा नै पक्राउ पर्थे।’
काठमाडौंबाट पक्राउ परेका व्यक्तिले सबै प्रमाण नष्ट गरिसकेको विभागको अनुसन्धानबाट खुलेको बताइएको छ। ‘काठमाडौंबाट पक्राउ गरेका व्यक्तिको बत्तिसपुतलीमा आलिसान घर छ। पक्राउ परेका दुई जना प्रहरीले सार्वजनिक गरेपछि उनले आफ्नो मोबाइल, ल्यापटप, आइप्याडलगायत सबै विद्युतीय उपकरणबाट सुन कारोबार खुल्ने विवरण हटाइसकेका रहेछन्। अझ घरमा भएका सामानसमेत उनले अन्यत्र सारेको पाइयो,’ अनुसन्धानमा संलग्न एक अधिकारीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
