काठमाडौं- गत साउन १३ गते साढे १४ किलो नक्कली सुन, आधा किलो सक्कली सुन र दुई वटा पेस्तोल बरामद काण्डमा प्रत्यक्ष संलग्न भएको पाइएपछि दुई प्रहरी जवान अहिले हिरासतमा छन्।
प्रहरी जवानहरू बहादुरसिंह कठायत, प्रशन्न श्रेष्ठसहित १७ जनाविरुद्ध हातहतियार खरखजना, अवैध सुनचाँदी चोरीपैठारी तथा चोरीनिकासी, डाँकाचोरी र संगठित अपराधको कसुरमा आइतबार काठमाडौं जिल्ला अदालतमा मुद्दा दर्ता भएसँगै थुनछेक बहस सुरु भएको छ।
प्रहरीसँग मिलेमतो गरेर नै सुन बरामदको नाटक गरिएको घटनामा संलग्न प्रहरीले बयान दिएका छन्। पक्राउ परेका प्रहरीद्वय पनि १५ लाख रुपैयाँमा लोभिएर मिलेमतोमा सुन बरामदको 'नाटक मञ्चन'मा सहभागी भएको पाइएको छ।
जवान प्रशन्न श्रेष्ठको बयान – बहादुरले भनेका थिए, ‘एउटा गाडीमा गैरकानूनी सामान छ’
'साउन १२ गते राति साढे ८ बजे प्रहरी जवान बहादुरसिंह कठायतले मलाई फोन गरी 'एउटा ठूलो काम आएको छ, भेटेर कुरा गरौं' भनेका थिए। त्यसपछि त्रिचन्द्र कलेजको गेट अगाडि बहादुरसिंह कठायतसँग भेट भयो। उनले 'मान्द्रो थकाली आउनू' भनेकोले त्यसबेलै राती साढे १० बजे म त्यहाँ गएँ,' घटनामा संलग्न भएको आरोपमा पक्राउ परेका प्रशन्न श्रेष्ठले अनुसन्धान गर्ने प्रहरीसँग बयान दिएका छन्।
मान्द्रोमा उमेश श्रेष्ठ पनि थिए। त्यसबेला बहादुरले भनेका थिए, ‘एउटा गाडीमा गैरकानूनी सामान छ।’
'त्यसपछि मैले उनलाई सम्बन्धित मान्छे मलाई भेटाइदेऊ भनेँ। यो कुरा मैले डिएसपी रन्जन दाहाललाई जानकारी गराइसकेको थिएँ,' प्रहरीसँगको बयानमा श्रेष्ठले भनेका छन्, 'म, बहादुरसिंह कठायत र उमेश श्रेष्ठ त्यहाँबाट न्यूरोड महाबौद्ध जाने बाटोमा गई कौशल पटेललाई भेट्यौं। ‘स्कोर्पियो गाडीको डिक्कीमा सामान आउँदै छ। सामान ढुङ्गामाटो, सुनचाँदी जे भए पनि समातेर मलाई दिनू, म तपाईहरूलाई १५ लाख दिन्छु।’
त्यसपछि साउन १३ गते बिहान ६ बजे वीर अस्पताल अगाडि भेट्ने कुरा भयो। ‘डिएसपीसाप एउटा ठूलो सूचना आएको छ। पूरै विवरण मलाई पनि थाहा छैन। कमलपोखरीको एरियामा गैरकानुनी सामान छ, उक्त सामान भोलि बिहान ८ बजे बाहिरिँदैछ। तर गाडी नम्बर र रुट अहिलेसम्म खुलेको छैन भनेर डिएसपी दाहाललाई सुनाएँ,' उनको बयानमा उल्लेख छ।
साउन १३ गते बिहान प्रशन्न, बहादुरसिंह कठायत र कठायतको साथी उमेश श्रेष्ठ वीर अस्पताल अगाडि चिया पिइरहेका बेला पूर्वयोजना अनुसार कौशल पटेल पनि आइपुगेका थिए।
कौशलले ८ बजे कमलपोखरीबाट सामान निस्कने बताएका थिए। त्यतिन्जेल उनले गाडी नम्बर खुलाएका थिएनन्। त्यसपछि उनीहरु कमलपोखरी अगाडीको अपार्टमेन्टमा पुगे। जहाँ पूर्वयोजना अनुसार नै कौशलका दाई देवान भन्ने देवाँगसँग पनि भेट भयो। देवाँगले नै अवैध सामान बोक्ने गाडीको फोटा मोबाइलमा देखाए।
‘मैले देवाँगको माबोइलमा रहेको गाडीको फोटो खिचे। यो कुरा डिएसपीसापलाई जानकारी पनि गराईसकेको थिएँ,’ प्रशन्नले बयानमा भनेका छन्।
त्यसपछि दुईवटा मोटरसाइकलमा उनीहरुले बा ६ च ५५१९ नम्बरको गाडी पिछा गरेका थिए।
‘थापाथली र त्रिपुरेश्वर चोकको बीचमा बहादुरसिंह कठायत र उमेश श्रेष्ठले गाडी रोकी केही कुरा गरेको मैले देखेँ,’ प्रशन्नले भनेका छन्, ‘त्यसपछि गाडी थापाथली, माइतीघर चोक, भद्रकाली हुदै सहिदगेट क्रस गरी केही अगाडी बस बिसौनी नजिक उक्त गाडीबाट एउटा मान्छे झोलासहित झरेको जस्तो लाग्यो।’
बहादुर सिंह कठायतले आकाशेपुलमाथि सेतो झोला देखाउँदै सामान देखाएको श्रेष्ठको भनाई छ।
झोला दिएपछि मलाई छोडिदिनुस् भनेर तस्कर बाटो लागे : जवान कठायत
घटनामा संलग्न अर्का प्रहरी बहादुरसिंह कठायतले पनि आफ्नो बयानमा घटनाबारे बताएका छन्।
सात-आठ वर्ष पहिले लाजिम्पाट प्रहरी बिटमा कार्यरत रहँदा लाजिम्पाटको र्याडिसन होटल जाने बाटोमा जेम्स एण्ड ज्वेलरी पसल सन्चालन गरेका कौशल पटेलसँग चिनजान नै नक्कली सुन लुट प्रकरणको सेतु बनेको कठायतको भनाइ छ।
उनै कौशलले भेट्न बोलाएपछि साउन १२ गते साँझ साढे ७ बजे कठायत र उनको साथी उमेश श्रेष्ठ न्यूरोड पिपलबोटमा भेट पुगेका थिए। जहाँ कौशलको मोबाइल पसलसमेत छ।
‘एउटा कारमा गैरकानूनी सामान आउँदैछ त्यो सामान समात्नु पर्ने छ,’ कौशलले त्यसबेला कठायतसँग भनेका थिए। त्यसबेला कौशलका दाजु देवाँग पनि सँगै थिए।
त्यसबेला देवाँगले भनेका थिए, ‘एउटा मान्छेले हामीलाई गैर कानूनी सामान ल्याएर मार्केटमा धेरै घाटा खुवाएको छ। त्यो मान्छेलाई समात्नु पर्यो भनेको थिए’ देवाँगको भनाई कठायतले बयानमा भनेका छन्।
त्यसपछि कठायतले यो कुरा सादा पोशाकका प्रहरी जवान श्रेष्ठलाई भनेका थिए। १५ लाख रुपैयाँ दिने सहमति भएपछि प्रहरी कौशल र देवाँगको योजानमा सहमत भएका थिए।
‘सहिदगेटको पुल नजिक कार रोकेर एकजना मानिस ओर्लिए। मैले उनलाई आकाशेपुल माथि लगेँ। ती व्यक्तिले मलाई छोडी दिनुहोस् भनेँ। आफूसँग भएको एउटा झोला आकासेपुल माथि राखेँ। त्यसपछि ति व्यक्ति त्यहाँबाट बाहिरिए,’ कठायतले प्रहरीमा दिएको बयानमा उल्लेख गरिएको छ, ‘सेतो झोलामा भएको सामानबाट सुन जस्तो देखिने १ थान मैले खल्तीमा राखी सकेपछि प्रशन्न श्रेष्ठलाई फोन गरेँ।’
उक्त एक पिस सुनजस्तो वस्तु कठायतले आफ्नो साथी उमेशलाई राख्न दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749559264.jpg)
-1749558784.png)
-1749544996.jpg)
-1749541695.jpg)
-1749539455.jpg)
