काठमाडौं- बझाङको मस्टा गाउँपालिका–२ खिकालाकी १२ वर्षीया बालिका सम्झना विकको बलात्कारपछि हत्या आरोपमा पक्राउ परेका राजेन्द्र बोहराले यसअघि पनि बलात्कार गरेको पाइएको छ।
खिकालाकै १८ वर्षीय बोहराले एक महिना अघि मस्टाकै १४ वर्षीया बालिकालाई बलात्कार गरेको अनुसन्धानबाट खुलेको छ। त्यसबेला भने उक्त घटना स्थानीयको रोहबरमै मिलापत्र गरेको पाइएको अनुसन्धानमा संलग्न एक प्रहरी अधिकृतले नेपाल लाइभलाई जानकारी दिए।
गत साउन २९ गते बोहराले पानी घट्टामा आएकी १४ वर्षीया बालिका बलात्कार गरेका थिए। उक्त घटना गाउँमा फैलिएपछि साउन ३१ गते नै स्थानीयको रोहबरमा मिलापत्र गरेको पाइएको छ।
मिलापत्रमा ती बालिकाको पेटमा बच्चा भएको अवस्थामा भने राजेन्द्रले नै स्वीकार गर्नेसमेत उल्लेख गरिएको पाइएको छ।
त्यस्तै बोहराले बालिकालाई कुटपिट समेत गरेको पाइएको छ। मिलापत्रको कागजमा अबदेखि बालिका कुटपिट नगर्ने उल्लेख गरेको देखिन्छ।
अहिले भने १२ वर्षीया सम्झना विकको बलात्कार र हत्या आरोपमा बोहरा पक्राउ परेपछि पीडित पक्षले यस घटनाबारे प्रहरीलाई जानकारी गएका हुन्। त्यसबेला बलात्कारको घटना मिलापत्र गराउने विरुद्ध समेत अनुसन्धान सुरु गरिएको प्रहरी सुदूरपश्चिम प्रदेश प्रहरी कार्यालयका प्रवक्ता मुकेश सिंहले नेपाल लाइभलाई जानकारी दिए। मिलापत्र गराउने विरुद्ध भने मतियारको कसुर आकर्षित हुने उनको भनाइ छ।
बलात्कारपछि हत्या
गत बुधबार मन्दिरमा मृत भेटिएको बालिका सम्झनाको पोस्टमार्टम रिपोर्टमा बलात्कारपछि हत्या भएको पाइएको छ। प्रहरी स्रोतका अनुसार जिल्ला अस्पतालले उपलब्ध गराएको पोस्टमार्टम रिपोर्टमा बलात्कारपछि हत्या भएको पाइएको हो।
प्रहरी स्रोतका अनुसार सम्झनाको टाउको, यौनाङ्ग वरपर, र यौनांगको भित्री भागमा समेत चोट रहेको पोस्टमार्टम रिपोर्टमा उल्लेख छ। बाहिरी चोट बलात्कार गर्नेबेला प्रतिकार गर्दाखेरिको हुनसक्ने आँकलन प्रहरीले गरेको गरेको छ।
यौनांगको भित्री भागको चोटबाट बलात्कारको पुष्टि भएको प्रहरी स्रोतले जानकारी दियो। उनको मृत्युको कारण भने कलेजोको चोट देखिएको छ। बलात्कारपछि पनि बोहराले बालिकालाई कुटपिट गरेको र उक्त चोटको असर कलेजोसम्म पुगेकाले बालिकाको मृत्यु भएको प्रहरी स्रोतले जानकारी दिएको छ।
कारबाहीको माग गर्दै सडक प्रर्दशन, सुरक्षाको प्रत्याभूति दिलाउन कांग्रेसको माग
सम्झनाको विकका हत्यारालाई कारबाहीको माग गर्दै सडकमा प्रर्दशन समेत भइरहेको छ। बझाङबाट सुरु भएको प्रर्दशन यतिबेला काठमाडौंसम्म आइपुगेको छ। यसअघि बझाङको चैनपुरमा स्थानीयले सम्झनाका हत्यारालाई कारबाहीको दायरामा ल्याउनुपर्ने भन्दै प्रदर्शन गरेका थिए।
मृतक बालिकका परिवार आफन्त, नागरिक अधिकारकर्मीलगायतले 'निर्दोष नफसोस्, अपराधी नउम्कियोस्' भन्दै प्रर्दशन गरेका थिए। उनीहरुले बलात्कारीलाई फाँसीसम्मको सजाय हुनुपर्ने भन्दै प्लेकार्ड प्रर्दशन गरेका थिए।
आइतबार ११ बजे माइतीघर मण्डलामा संयुक्त राजनीतिक दल संघर्ष समिति, दलित नागरिक समाजले सम्झनाको न्यायका लागि भन्दै प्रदर्शन गरेको छ। उनीहरुले दोषीलाई कडा भन्दा कडा कारबाही हुनुपर्ने माग राखेका थिए।
त्यसैगरी सरकारले बलात्कारका दोषीलाई कारबाही गर्न नसक्दा बझाङमा दलित बालिकाको बलात्कारपछि हत्या हुनुले सरकार नागरिकका सुरक्षाप्रति चुकेको कांग्रेस महिला संघकी अध्यक्ष उमा रेग्मीले बताएकी छिन्। सरकारको लाचारी र गैरजिम्मेवार प्रवृत्तिकै कारण बालिकाले ज्यान गुमाउनुपरेको उनको भनाइ छ।
नागरिकमा शान्ति सुरक्षाको प्रत्याभूति दिलाउन सरकार असफल भएको उल्लेख गर्दै रेग्मीद्धारा जारी विज्ञप्तिमा नेपाली महिलाहरु बलात्कृत हुने र ज्यान गुमाउनु पर्ने कहिलेसम्म भन्दै सरकासँग प्रश्न गरिएको छ।
बलात्कार घटनामा विशेष दलित समुदाय बढी शिकार हुने गरेको सांसद प्रकाश स्नेही रसाइलीले बताए। राज्यले जनतालाई सुरक्षा दिन नसकेको बताउँदै उनले सरकार असफल बन्दै गएको बताए।
यस्तो थियो घटना
गत बुधबार दिउँसो करिब ४ बजेतिर सम्झना करिब ३० मिनेट परको पैदल दुरीमा रहेको गोठमा वस्तुलाई घाँस हाल्न भनेर डोको बोकेर गएकी थिइन्। तर उनी अबेरसम्म घर फर्किनन्। सम्झना घर नफर्किएपछि परिवारले उनको खोजी गरे। खोज्दै जाने क्रममा सिममाडौं भन्ने ठाउँको शिव मन्दिरमा उनको शव अर्धनग्न अवस्थामा भेटिएको थियो। शव अर्धनग्न अवस्थामा भेटिएको जानकारी आएपछि लगत्तै घटनास्थलमा प्रहरी खटिएको बझाङका डिएसपी रुपक खड्काले बताएका छन्।
सम्झनाले बोकेको नाम्लो, डोको मन्दिरभन्दा कसर डेढ समय मिटर पर खोल्सामा भेटिएको थियो। घटनाको स्थलगत अनुसन्धानमा खटिएको प्रहरी टोलीले सम्झनाको बलात्कारपछि हत्या हुनुपर्ने प्रारम्भिक निष्कर्ष निकालेपछि सोही अनुसार प्रहरी टोली अनुसन्धानमा खटिएको थियो।
सोही क्रममा प्रहरीको लेन्समा परेका थिए सोही ठाउँका राजेन्द्र बोहरा। उनलाई पक्राउ परेपछि भने घटनाका विभिन्न पाटाहरु खुल्दै गएका छन्। उनले यसअघि पनि सोही ठाउँकी एक बालिकालाई बलात्कार गरेको र स्थानीयकै रोहबरमा उक्त घटना मिलाएको पाइएको छ। राजेन्द्रविरुद्ध जिल्ला प्रहरी कार्यालयमा यसअघि पनि उनले बलात्कार गरेको भन्दै उजुरी दर्ता भएपछि सो कुरा बाहिर आएको हो। यी दुवै घटनामा उनीमाथि अनुसन्धान सुरु गरिएको सुदूरपश्चिम प्रदेशका प्रवक्ता सिंहले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749559264.jpg)
-1749558784.png)
-1749544996.jpg)
-1749541695.jpg)
-1749539455.jpg)
