महासेठले गिराएको भौतिक पूर्वाधारको साख उठाउँदै नेम्वाङ

पूर्वाधार

शिव बोहरा सोमबार, वैशाख १, २०७७ ११:२३

काठमाडौं- केपी ओली सरकारको आकर्षक मानिएको भौतिक पूर्वाधार तथा यातायात मन्त्रालयको सुरुवाती जिम्मेवारी पाए इन्जिनियर समेत रहेका रघुवीर महासेठले। २०७४ को अन्त्यतिर मन्त्री बनेका महासेठ २०७६ मंसिरमा आइपुग्दा पदच्युत भए।

दुईतिहाइ मतसहित बनेको सरकारका भौतिक पूर्वाधार मन्त्रीले केही गर्लान् भन्ने अपेक्षा आम मानिसमा थियो। तर महासेठबाट अपेक्षाकृत कामभन्दा विवाद बढी भएपछि बहिर्गमनमा परेका हुन्। मन्त्री भएलगत्तै महासेठले ३ महिनामा काठमाडौंका सडकमा खाल्डाखुल्डी नहुने बताएका थिए। तर आममानिसले त्यो देख्न बसन्तकुमार नेम्वाङलाई नै कुर्नुपर्‍यो।

विवादित छविसहित बाहिरिए महासेठ
२०७४ फागुन ३ गते प्रधानमन्त्री बनेका केपी ओलीले चैत २ गते महासेठलाई भौतिक पूर्वाधार तथा यातायात मन्त्रालयको जिम्मेवारी सुम्पेका थिए। मन्त्रालयको जिम्मेवारी सम्हाल्दा उनले जुन उत्साह र आशा देखाएका थिए, त्यसको ग्राफ मन्त्रीबाट हट्ने बेलासम्म ऋणात्मक भइसकेको थियो।

उनी मन्त्रीबाट हटेको केही समयमै पदको दूरुपयोग गरी अनियमियता गरेको भन्दै अख्तियार दुरुपयोग अनुसन्धान आयोगमा उजुरी परेको छ। उनले मन्त्रालयको जिम्मेवारी सम्हालेदेखि सडक विभाग, यातायात व्यवस्था विभाग र रेल विभागमा आफ्नो निजी सचिवालयमार्फत अनियमितता गरेको अख्तियार दुरुपयोग अनुसन्धान आयोगमा परेको उजुरीमा उल्लेख छ। महासेठले श्रीमती जुली महतोमार्फत विभागीय प्रमुख र अन्य कार्यालय प्रमुखलाई सरुवा र जागिर खाइदिने डर धम्की देखाइ कानुन विपरीतका काम गर्न दबाब दिएको आरोप समेत लगाइएको छ।

सडक विभागका तत्कालीन महानिर्देशक रवीन्द्र श्रेष्ठलाई हटाई केशव शर्मालाई महानिर्देशक बनाउन, रेल विभागमा बलराम मिश्रलाई ल्याउन ठूलो आर्थिक चलखेल गरेका आरोप उनीमाथि छ। मन्त्रीको दबाबकारी भूमिकाका कारण पूर्वपश्चिम रेलमार्ग खण्डको निजगढ-भरतपुर खण्डको पुनः विस्तृत परियोजना प्रतिवेदन (डीपीआर) प्रक्रियाको फाइल रोकेर राखेका थिए। उनी मन्त्रीबाट पदच्युत भएपछि मात्र उक्त ठेक्का सम्झौता अघि बढेको हो।

नागढुङ्गा सुरूङ, धुलिखेल सुरूङ सहित सडक विस्तारलगायत विभिन्न आयोजनामा प्रत्यक्ष हस्तक्षेप गरेको आरोप उनीमाथि छ।

त्यस्तै, महासेठले सार्वजनिक यातायातको क्षेत्रमा समेत सुधारलाई मोहरा बनाएर आर्थिक चलखेल गरेको आरोप छ। हट्नै लागेको सार्वजनिक यातायातको सिन्डिकेट महानिर्देशक नै परिवर्तन गरेर कायम राख्नमा महासेठले नै भुमिका खेलेका हुन्। स्मार्ट लाइसेन्स छपाइमा समेत अनियमितता गरी छपाइ ढिलो गराएको आरोप उनले खेपिरहेका छन्।

बसन्त नेम्वाङले जगाएको आशा
तत्कालीन भौतिक पूर्वाधार तथा यातायात मन्त्रालयको जिम्मेवारीबाट रघुवीर महासेठलाई हटाएपछि उनको ठाउँमा आए पाँचथरबाट निर्वाचन सांसस बसन्तकुमार नेम्वाङले। नेम्वाङले २०७६ मंसिर ५ भौतिक पूर्वाधार तथा यातायात मन्त्रीको रूपमा सपथ लिएर कार्यभार सम्हालेका थिए।

कार्यभार सम्हाल्दा उनले आफू काठमाडौंको सडकको अवस्थाबारे जानकार रहेको प्रतिक्रिया दिएका थिए। त्यसपछि उनले कहिँकतै सार्वजनिक प्रतिक्रिया दिएनन्। र एकै पटक मन्त्रालयको जिम्मेवारी सम्हालेको सय दिनमा पत्रकार सम्मेलन गरेर आफूले गरेका प्रयासको बारेमा जानकारी गराए।

सय दिनमा उनले सडक विभागअन्तर्गत रहेका २४ हजार ३ सय वर्गमिटर अर्थात् ९ हजार ५ सय वटा खाल्डा पुरिएको बताएका थिए। उपत्यकाको २७ किलोमिटर सडक मर्मत भएको छ। मन्त्री नेम्वाङले यसै आर्थिक वर्षको अन्त्यसम्ममा काठमाडौं उपत्यकामा थप ८५ किलोमिटर सडक कालोपत्रे गर्ने लक्ष्यसहित काम भइरहेको बताएका हुन्।

वर्षौदेखि बल्न नसकेको उपत्यकाका विभिन्न चोकमा रहेका ट्राफिक लाइट बल्न थालेका छन्।

नेम्वाङले मुख्य गरी तीनवटा विषयलाई व्यवस्थित गर्ने सोच मन्त्रालयले बनाएको बताएका छन्। नीतिगत सुधारका कुराहरु, सांगठनिक सुधारका कार्यहरु र विकास निर्माणलाई तीव्रता दिने र त्यसको पर्याप्त अनुगमन सुपरीवेक्षण गर्दै समस्याहरुलाई निराकरण गर्दै विकास र निर्माणको गतिलाई तीव्रता दिनेमा उनको जोड छ।

रूग्ण ठेक्का सक्ने लक्ष्य
मन्त्री नेम्वाङले वर्षौदेखि नबनी बसेका रूग्ण अवस्थामा रहेका ठेक्का सक्ने नीति लिएका छन्। सार्वजनिक खरिद नियमावली संशोधन गरेर जुनसुकै ठेक्काको १ वर्ष म्याद थप्ने र काम नगरे स्वतः ठेक्का तोडिन भएको छ। यसले पुराना ठेक्काको काम सकिने र नसकिनेहरूलाई नयाँ तरिकाबाट काम अघि बढाउन सजिलो हुनेछ। देशभर यस्ता आयोजनाको संख्या करिब १८ सय भन्दा बढी हरेको छ। भौतिक पूर्वाधार मन्त्रालय अन्तर्गतका अधिकांशको म्याद थप भइसकेको छ।

फेरिएका काठमाडौंका सडक र कोरोनाबीच काम
काठमाडौंका सडकमा खाल्डो भेटिनु सबैका लागि सामान्य भइसकेको थियो। यहाँको सडक नै यस्तै हो भन्ने आममानिसलाई परिसकेकै थियो। तर नेम्वाङले मन्त्रालयको जिम्मेवारी सम्हाल्दा भनेका कुरा व्यवहारमा लागू गरे र काठमाडौंका सडक चिल्ला बने। अहिले पनि त्यो काम जारी छ। अहिले विश्व नै कोरोनाको चपेटामा छ, देश लकडाउनमा। यहीबीच पनि मजदुर उपलब्ध भएसम्म उपत्यकाका सडक मार्किङ गर्ने काम भई नै रहेको छ।

त्यस्तै उपत्यकाबाहिर पनि विभिन्न सडक आयोजनाहरूमा काम भइरहेको छ। विभिन्न सडक खण्डमा ओभरलेदेखि पुल समेत मर्मतको काम सडक विभाग अन्तर्गतका आयोजनाले गरिरहेका छन्। यसले के देखाउँछ भने सकारात्मक सोच सहित काम गर्ने हो भने परिणाम देखिन धेरै समय कुर्न पर्दैन। मन्त्री नेम्वाङको काम गराइले त्यो पुष्टि गरिसकेको छ। आशा गरौं, कोरोनाको चपेटा चाँडै नै अन्त्य हुनेछ र हाम्रा पूर्वाधार आयोजनहरूको गति नेम्वाङको नेतृत्वमा तिब्र हुनेछ!